جاپونيادا يمپەراتور تاققا وتىرىپ، راحىمشىلىق جاريالاندى

نۇر-سۇلتان. قازاقپارات - جاپونيا يمپەراتورى نارۋحيتو يمپەراتور سارايىندا وتكەن سالتاناتتى ءراسىم كەزىندە رەسمي تۇردە تاققا وتىردى.

بۇل تۋرالى Kyodo باسىلىمى حابارلايدى.

 ءداستۇرلى تاققا وتىرۋ ءراسىمى 2 مىڭ قوناقتىڭ، ولاردىڭ قاتارىندا 190 مەملەكەت پەن حالىقارالىق ۇيىم وكىلدەرىنىڭ قاتىسۋمەن ءوتتى.

 «كونستيتۋتسياعا سايكەس ارەكەت ەتۋگە جانە مەملەكەت پەن جاپونيا حالقىنىڭ بىرلىگىنىڭ سيمۆولى رەتىندە ءوز مىندەتىمدى اتقارۋعا انت ەتەمىن»،- دەيدى 59 جاستاعى نارۋحيتو.

اتالعان ءراسىمنىڭ  قاۋىپسىز ءوتۋىن 26 مىڭ پوليتسەي قامتاماسىز ەتتى. كەشكىسىن نارۋحيتو پەن جۇبايى ماساكو ساراي ماڭىندا وتەتىن بانكەتكە قاتىسادى.

 باستاپقىدا تاققا وتىرۋ راسىمىنەن كەيىن سالتاناتتى شەرۋ وتەدى دەپ جوسپارلانعان ەدى. الايدا تاياۋدا بولعان تايفۋن داۋىلىنان كەيىن، شەرۋ قاراشا ايىنا قالدىرىلدى.

 Mainichi گازەتىنىڭ حابارلاۋىنشا، جاپونياداعى تاققا وتىرۋ راسىمىنە بايلانىستى، كەمى 3 جىل بۇرىن ۇساق قىلمىس جاساعان 550 مىڭعا جۋىق ادامعا راحىمشىلىق جاريالاۋدى ۇيعارعان. ولاردىڭ دەنى جول ەرەجەسىن بۇزعاندار ەكەن. راحىمشىلىققا ىلىككەندەردىڭ بارلىعىنىڭ ازاماتتىق قۇقىقتارى قالپىنا كەلتىرىلەدى. دەسە دە بۇل سوتتالعاندار مەن كاتورگالىق جۇمىستارعا تارتىلعاندارعا قاتىستى ەمەس.

 جاپونيادا راحىمشىلىق سوڭعى رەت 1993 -جىلى نارۋحيتو مەن ماساكونىڭ نەكەسىنە بايلانىستى جاريالانعان.