شۇعىلا ساپارعالي قىزى: قازاقستاندا تۇرعانشا، ۇرىمجىگە بارعانىم ارتىق دەپ ويلادىم

نۇر-سۇلتان. قازاقپارات – قىتايدا تۋىپ- وسكەن ءبيشى شۇعىلا ساپارعالي قىزى كوكەيىندە ەشۋاقىتتا وتانعا ورالۋ دەگەن ارمان بولماعانىن جاسىرمادى.

ءتىپتى، العاش كەلگەن كەزدە قازاقستاننان قىتايدى ارتىق كورگەن، دەپ حابارلايدى استانا ارناسىنىڭ «وڭاي ەمەس» باعدارلاماسى.

«شىنىن ايتۋ كەرەك، مەندە ونداي وي بولعان جوق. ويتكەنى مەن تيىتتەيىمنەن سول جاقتا تۋىپ- ءوستىم. ماعان قازاقستان دەگەن بوتەن دۇنيە بولدى. ول كەزدە وقىپ جۇردىك، بالا بولدىق، جاس بولدىق. ارمانىمىز باسقا بولدى. مەن سول مەملەكەتتىڭ استاناسى پەكين قالاسىندا ءبىلىم الىپ ءجۇردىم. سول جەردە جۇمىسقا قالىپ، ەۋروپا مەن امەريكا سەكىلدى دامىعان مەملەكەتتەرگە شىعۋىم كەرەك بولدى. جەتىستىكتەرگە قول جەتكىزۋىم كەرەك دەگەندەي. جاستىق كەزىمدە اتاقتى ءبيشى بولعىم كەلدى. ال «قازاقستانعا بارامىن، ەلگە ورالامىن» دەگەن بولعان ەمەس»، - دەپ شىنىن ايتتى ءبيشى قىز.

شۇعىلا ساپارعالي قىزى قازاقستانعا العاش رەت 1996 -جىلدىڭ كوكتەمىندە كەلگەن. جاركەنتتىڭ كەدەنىنەن ءوتىپ كەلگەن كەزدە وتانىنىڭ وزىنە اسا ىستىق بولىپ كورىنبەگەنىن جەتكىزدى.

«شىنىمدى ايتسام، بۇل جەرگە كەلگەن كەزدە شوشىپ كەتتىم. پەكيندە 22 جاستاعى قىزبىن. ال مىنا جاقتا قازاقستاننىڭ جاڭادان ەگەمەندىك العان ۋاقىتى: جارىقتىڭ ءبارىن ءسوندىرىپ قوياتىن، ال جولدىڭ ءبارى شۇڭقىر-مۇڭقىر. ماعان كەرەمەت دورەكى، ەرسى بولىپ كورىندى. قازاقستانعا كەلىپ مىندا ءومىر سۇرگەنشە، پەكيننەن ۇرىمجىگە بارىپ، سول جاقتا تۇرعانىم ارتىق دەپ ويلادىم. وزىمە سونداي ءسوز ايتتىم. شىنىندا ول كەزدە زامان سونداي ەدى...»، - دەدى شۇعىلا ساپارعالي قىزى.

https://www.youtube.com/watch?v=L5j2SUAvQPo