نۇرسۇلتان نازاربايەۆ جاپون يمپەراتورىنىڭ تاققا وتىرۋ راسىمىنە قاتىسۋدا

توكيو. قازاقپارات - قازاقستاننىڭ تۇڭعىش پرەزيدەنتى - ەلباسى نۇرسۇلتان نازاربايەۆ جاپونيانىڭ يمپەراتورى نارۋحيتونىڭ تاققا وتىرۋىنا ارنالعان رەسمي شاراعا قاتىسۋدا.

ەلباسىن سالتاناتتى راسىمگە جاپونيا پرەمەر-ءمينيسترى سيندزو ابە ارنايى شاقىرعان بولاتىن، دەپ حابارلايدى قازاقپارات ءتىلشىسى.

177 ەلدىڭ دەلەگاتسياسى قاتىسىپ جاتقان سالتاناتتى شارا يمپەراتور سارايىنىڭ «Matsu-no-Ma» مەملەكەتتىك زالىندا وتۋدە. زالعا الدىمەن يمپەراتور نارۋحيتو كىرىپ، تاققا وتىردى. ىلە-شالا ونىڭ جۇبايى پاتشايىم ماساكو زالعا ءوتىپ ورنىنا جايعاسقاننان كەيىن مارتەبەلى مەيماندار ورىندارىنان تۇرىپ، يمپەراتورعا قۇرمەت كورسەتتى.

قازىرگى ۋاقىتتا يمپەراتور نارۋحيتو حالقىنا جانە بارشا الەمگە ءوزىنىڭ تاققا وتىرعاندىعىن جاريالاۋدا. جولداۋ اياقتالعاننان كەيىن جاپون حالقى اتىنان ءسوز سويلەيتىن جاپونيا پرەمەر-ءمينيسترى سيندزو ابە: «گو-سوكۋي و سيۋكۋ-سيتە تەننو حەيكا باندزاي!» (تاققا وتىرۋ قۇرمەتىنە وراي، ۇلى مارتەبەلى يمپەراتور جاساسىن!) دەپ قۇتتىقتاماق.

سالتاناتتى راسىمگە نارۋحيتو تەك يمپەراتورعا عانا ارنالعان «gosokutai» دەپ اتالاتىن ءداستۇرلى كيىم كيىپ كەلگەن. وڭ قولىنا ۇلىلىق نىشانى سانالاتىن «onshaku» (اعاش اساتاياق) ۇستاعان. يمپەراتوردىڭ تاققا وتىرۋ سالتاناتىنىڭ ۇلىلىعىن قىلىش، ساداق، قورامسا، ايبالتا جانە قالقاننان تۇراتىن سالتاناتتى زاتتار بىلدىرەدى.

جالپى يمپەراتور نارۋحيتونىڭ تاققا وتىرۋىنا ارنالعان سالتاناتتى شاراعا شۆەتسيا، ەسۆاتيني، لەسوتو، كامبودجا، بۋتان، تونگو، نيدەرلاندى، يسپانيا، بەلگيا، مالايزيا كورولدەرى، تۇرىكمەنستان، قىرعىزستان، توگو، نيگەر، فينليانديا، ۆەنگريا، كەنيا، بانگلادەش سىندى ەلدەردىڭ پرەزيدەنتتەرى كەلگەن.

ەستەرىڭىزگە سالا كەتەيىك، جاپونيا ۇكىمەتى 2019-جىلدىڭ 1- مامىرىندا جاڭا يمپەريالىق كەزەڭنىڭ باستالعانىن جاريالادى. بۇل كەزەڭ «رەيۆ» ءداۋىرى دەپ اتالادى - بۇل اتاۋ قازاق تىلىندە اۋدارعاندا «ءتارتىپ»، «ۇيلەسىم» جانە «گۇلدەنگەن الەم» دەگەن ماعىنا بەرەدى. قازىرگى «حەيسەي» دەپ اتالاتىن ءداۋىردىڭ اتاۋى قىتاي ادەبيەتىنەن الىنعان بولاتىن، ول «الەم جەتىستىگى» دەگەن ماعىنا بەرەدى. ول ءداۋىر 1989-جىلدىڭ قاڭتارىندا، حيروحيتو يمپەراتور قايتىس بولعان كەزدە باستالعان ەدى. ونىڭ ۇلى اكيحيتو جاپونيانىڭ 125- يمپەراتورى رەتىندە 30 جىلعا جۋىق ۋاقىت بيلىك قۇردى. ءسويتىپ ءوز ەركىمەن تاقتان باس تارتتى. ول بۇل شەشىمىن جاسىنىڭ ۇلعايعانىمەن ءتۇسىندىردى. حانزادا نارۋحيتو تاققا 1- مامىر كۇنى وتىردى.

1989-جىلدىڭ 7- قاڭتارىندا جاپونيانىڭ مۇراگەر حانزاداسى رەتىندە رەسمي جاريالانعان نارۋحيتونىڭ ءبىرقاتار ۇلتتىق جانە شەتەلدىك ناگراداسى، سونىمەن قاتار وكسفورد ۋنيۆەرسيتەتىنىڭ دوكتورى سىندى قۇرمەتتى اتاقتارى بار. ول سۋ ەكوجۇيەسىنىڭ پروبلەمالارىنا ايرىقشا نازار اۋدارىپ، سۋ رەسۋرستارى مەن سانيتاريا پروبلەمالارىنا ارنالعان حالىقارالىق عىلىمي فورۋمداردا ءجيى بايانداما جاساعان. جاپونداردىڭ ورتاعاسىرلىق پوەتيكالىق جانرى «ۆاكا» ءداستۇرلى پوەزياسىمەن اۋەستەنىپ، الت اسپابىندا وينايدى.