اتىراۋدا «باستاۋ» تۇلەگى ءۇش ءتىلدى وقۋ ورتالىعىن اشتى

اتىراۋ. قازاقپارات - اتىراۋدا «باستاۋ» تۇلەگى ءۇش ءتىلدى وقۋ ورتالىعىن اشتى، دەپ حابارلايدى قازاقپارات ءتىلشىسى.

«انار مۇقانوۆانىڭ ماماندىعى - ماتەماتيكا ءپانىنىڭ وقىتۋشىسى. بەس جىل بويى نازاربايەۆ زياتكەرلىك مەكتەبىندە جۇمىس ىستەگەن. كەيىن وتباسى جاعدايىنا بايلانىستى رەپەتيتورلىقپەن اينالىسۋىنا تۋرا كەلگەن. بەرتىن كەلە ءوزىنىڭ وقۋ ورتالىعىن اشۋعا بەل بۋدى. بيزنەس يدەياسىن كاسىپكەرلەر پالاتاسىنا اكەلىپ، وسى جەردە «باستاۋ» جوباسىنا قاتىستى، بيزنەسكە قاجەتتى اقپاراتتى الدى»، - دەپ مالىمدەدى اتىراۋ وبلىسىنىڭ كاسىپكەرلەر پالاتاسىنىڭ باسپا ءسوز قىزمەتى.

جاڭادان اشىلعان «YS Education» وقۋ ورتالىعىندا 60 قا جۋىق بالا وقيدى. مۇندا نەگىزىنەن تابيعي پاندەر وقىتىلادى. قازىر تاجىريبەسى مول بەس وقىتۋشى بار. جاس كاسىپكەر الداعى ۋاقىتتا گرانتقا ءوتىنىم بەرىپ، بيزنەسىن كەڭەيتپەك.

اتىراۋ وبلىسى كاسىپكەرلەر پالاتاسىنىڭ ديرەكتورى ابدوللا يدرەسوۆتىڭ ايتۋىنشا، «باستاۋ» جوباسىنىڭ تۇلەكتەرى العاشقى جىلدارى اۋىل شارۋاشىلىعى مەن ساۋدا سالاسىنا كەتكەن بولسا، ەندى بىرتە-بىرتە قىزمەت كورسەتۋ سالاسىن دا قولعا الا باستاعان.

«بيىل جوبا جوسپار بويىنشا اتىراۋدا 1900 ادامدى قامتۋى ءتيىس. سونىڭ 1100 ى وقىپ شىقتى. 272 ادامعا 709 ميلليون تەڭگە قارجى بەرىلدى. سونىڭ ىشىندە «ەڭبەك» باعدارلاماسى ارقىلى سوماسى 61 ميلليون تەڭگەدەن اساتىن 141 گرانت بەرىلدى»، - دەيدى ابدوللا يدرەسوۆ.

اۆتورى: ا. سوكولوۆ