پرەزيدەنت تاپسىرماسى: مۇعالىمدەردىڭ جالاقىسى قالاي كوتەرىلەدى؟
«مەملەكەت باسشىسى الداعى ءتورت جىلدا پەداگوگتاردىڭ جالاقىسىن كەمىندە ەكى ەسەگە ارتتىرۋ تۋرالى ۇكىمەتكە ناقتى تاپسىرما بەردى. ونىڭ ءۇشجىلدىق قاراجاتى بۇگىندە بيۋجەت جوباسىندا قاراستىرىلعان. قازىر دە پەداگوگتار تاراپىنان ەڭبەكاقىنىڭ قالاي كوتەرىلەتىنى تۋرالى سۇراقتار كوپتەپ تۇسۋدە. مۇندا بازالىق لاۋازىمدىق ەڭبەكاقى ەمەس، قىزمەتتىك ەڭبەكاقى تۋرالى ايتىپ وتىرمىز. سايكەسىنشە، قىزمەتتىك جالاقىمەن بىرگە، ۇستەمەاقىلار دا كوبەيەدى. وسىلايشا، ارىپتەستەرىمىزدىڭ جالاقىسىن ايتارلىقتاي كوبەيتەمىز»، - دەدى مينيستر بۇگىن ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
ەسكە سالا كەتسەك، تامىز ايىندا ق ر پرەزيدەنتى قاسىم-جومارت توقايەۆ 4 جىلدا مۇعالىمدەردىڭ جالاقىسىن ەكى ەسەگە ارتتىرۋ تۋرالى تاپسىرما بەردى.
«مۇعالىمدەردىڭ ەڭبەكاقىسى ەڭ تومەنگى ايلىقتاردىڭ ءبىرى بولىپ تۇر. ەكونوميكاداعى ورتاشا ەڭبەكاقىنىڭ 65 پايىزىن عانا قۇرايدى. ارينە، مۇنىمەن كەلىسپەيمىز. سوندىقتان ۇكىمەتكە ءبىلىم جۇيەسىنە بىلىكتى ماماندار تارتۋ ماقساتىندا جانە پەداگوگتاردىڭ مارتەبەسىن كوتەرۋ ءۇشىن مۇعالىمدەردىڭ ەڭبەكاقىسىن 4 جىلدىڭ ىشىندە 2 ەسەگە ارتتىرۋدى تاپسىرامىن»، - دەگەن بولاتىن پرەزيدەنت.