ق ر ءبىلىم جانە عىلىم ءمينيسترى ءبىلىم جۇيەسىن سىناعان كوكشەتاۋلىق مۇعالىممەن كەزدەستى

نۇر-سۇلتان. قازاقپارات – ق ر ءبىلىم جانە عىلىم ءمينيسترى اسحات ايماعامبەتوۆ ءبىلىم جۇيەسىندەگى ولقىلىقتار تۋرالى ايتقان كوكشەتاۋلىق مۇعالىم ءاليا احەتوۆامەن كەزدەسۋى تۋرالى ايتىپ بەردى، دەپ حابارلايدى قازاقپارات ءتىلشىسى.

«ءبىز ونىمەن كەزدەستىك جانە ءوزى سىناعان ماسەلەلەر بويىنشا تولىققاندى سويلەستىك. جالپى، ارامىزدا جاقسى ديالوگ ورنادى. بۇل جۇمىستى ءارى قاراي دا جالعاستىرامىز. بۇعان دەيىن بىرنەشە وزەكتى ماسەلە بويىنشا مينيسترلىكتىڭ شارا قابىلداعانىن ايتقانمىن. ماسەلەن، ۇلتتىق بىلىكتىلىك تەستىندە مۇعالىمدەردى مەتال ىزدەگىشپەن تەكسەرۋ، سۇراقتاردىڭ ساپاسى جانە اپەللياتسيا تۋرالى سىن بولدى. بۇل جۇيەنىڭ وزگەرەتىنىن تامىز كونفەرەنسياسىندا حابارلاعانبىز. قازىر دە وزگەرىستى باستاپ كەتتىك. سوندىقتان، ارىپتەسىمىز كوتەرگەن ماسەلەلەردىڭ ءبىرازى شەشىلگەن»، - دەپ اتاپ ءوتتى مينيستر بۇگىن ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

ايتا كەتەيىك، تاريح ءپانىنىڭ مۇعالىمى، كوكشەتاۋلىق ءاليا احەتوۆانىڭ ب ا ق- تاردىڭ بىرىنە بەرگەن سۇحباتى YouTube جەلىسىندە 3- قازاندا جاريالاندى. وندا 38 جىل ەڭبەك ءوتىلى بار پەداگوگ جاڭارتىلعان وقۋ باعدارلاماسىن، وقۋشىلاردىڭ ءبىلىمىن باعالاۋ جۇيەسىن جانە سىبايلاس جەمقورلىقپەن كۇرەس جۇمىستارىن سىنعا الدى.

كەيىن ق ر ءبىلىم جانە عىلىم ءمينيسترى اسحات ايماعامبەتوۆ قوعامدا قىزۋ پىكىرتالاس تۋدىرعان اتالمىش سۇحباتقا قاتىستى تۇسىنىك ءبىلدىردى.

«دوستار! سوڭعى كۇندەرى تاريح ءپانىنىڭ مۇعالىمى ءا. ك. احەتوۆانىڭ ۆيدەوسۇحباتى كەڭىنەن تارالىپ جاتىر. اتالعان روليكتە كوتەرىلگەن ماسەلەلەر قوعام تاراپىنان قىزۋ تالقىلانۋدا. ءدال قازىر بۇل ماتەريالدىڭ مازمۇنىنا قاتىستى ەشقانداي باعا بەرمەيمىن. ەڭ باستىسى، كەز كەلگەن مۇعالىم مەن اتا-انا ءوز پىكىرىن اشىق بىلدىرۋگە قۇقىلى ەكەنىن ءتۇسىنۋ - ماڭىزدى. ال ءبىزدىڭ مىندەتىمىز - وسى ۇسىنىستار مەن ەسكەرتۋلەردى نازارعا الۋ»، - دەپ جازدى مينيستر Facebook-تەگى ءوز پاراقشاسىندا.