پۋتين باسشىلىق ەتكەن اسكەري جاتتىعۋدا قانداي وقىس جاعداي بولدى؟

None
None
نۇر-سۇلتان. قازاقپارات - رەسەي ستراتەگيالىق يادرولىق كۇشتەرىنىڭ «گروم-2019» جاتتىعۋىن پرەزيدەنت ۆلاديمير پۋتين باسقارعان كۇنى، 17- قازاندا وقىس وقيعا بولعان.

بۇل اقپاراتتى رەسەيدىڭ «ۆەدوموستي» گازەتى رەسەي قورعانىس مينيسترلىگىندەگى ەكى دەرەككوزگە سۇيەنە تاراتتى.

ك-44 «ريازان» اتوم سۇڭگۋىر كرەيسەرى قۇرلىقارالىق بالليستيكالىق زىمىراندى جوسپارداعىداي ەكى رەت ەمەس، ءبىر-اق رەت ۇشىرعان. ەكىنشى زىمىران ۇشىرعىش قوندىرعىدان شىقپاي قالعان. كرەيسەر ۇشپاعان زىمىرانىمەن تۇراقتى ورنىنا قايتقان.

گازەت تىلشىسىمەن سويلەسكەندەردىڭ ايتۋىنشا، زىمىراننىڭ ۇشپاي قالۋىنا ۇشىرعىش جۇيەدەگى اقاۋ سەبەپ بولۋى مۇمكىن. رەسەي قورعانىس مينيسترلىگى «ۆەدوموستي» گازەتىنىڭ سۇراعىنا جاۋاپ بەرمەگەن. «ريازان» اتوم سۇڭگۋىر كرەيسەرى 1977-جىلى پايدالانۋعا بەرىلگەن، وسىعان ۇقساس باسقا سۇڭگۋىر قايىقتاردىڭ كەيبىرى جويىلعان، كەيبىرى ەندى جويىلادى، - دەپ حابارلايدى «ۆەدوموستي». بالليستيكالىق زىمىراننىڭ اتىلماي قالۋىنا كرەيسەردىڭ توزعاندىعى دا سەبەپ بولۋى مۇمكىن.

«گروم-2019» جاتتىعۋى بارىسىندا رەسەي اسكەرى 16 بالليستيكالىق قاناتتى زىمىران ۇشىرۋى ءتيىس بولعان. جاتتىعۋعا اسكەري كەمەلەر، الىسقا ۇشاتىن ۇشاقتار، «يارس» جانە «يسكاندەر» كەشەنى قاتىسقان.

«ازاتتىق»

سوڭعى جاڭالىقتار