+7 (701) 759 90 19
-19 °С : نۇر-سۇلتان
1 °С : الماتى
USD 388.49 EUR 427.26
RUB 6.06 CNY 55.32
جاڭالىقتار

اتاقتى ادامدار كۇنىنە نەشە كىتاپ وقىعان؟

21 قازان 14:06
:ءبولىسۋ
اتاقتى ادامدار كۇنىنە نەشە كىتاپ وقىعان؟

نۇر-سۇلتان قازاقپارات - كىتاپتى وتە تەز وقىپ، ماتىندەگى مالىمەتتەردى تەز قابىلداپ الۋ ەكىنىڭ ءبىرىنىڭ قولىنان كەلە بەرمەيتىن قاسيەت.

جىلدام وقۋ بۇل ارنايى ءادىس- ءتاسىلدى قاجەت ەتەتىن ءوز الدىنا عىلىم، ءتىپتى ونەر دەسە دە بولادى. عالىمداردىڭ ايتۋىنا قاراعاندا، ەرەسەك ادام مينۋتىنا 120-180 ءسوزدى وقي الادى. ەگەر ارنايى ءادىس- ءتاسىلدى مەڭگەرسەڭىز، مۇنى 3-4 ەسەگە دەيىن كوبەيتۋگە بولادى ەكەن. قازىر ەرەكشە قابىلەتتى، ونىڭ ۇستىنە ارنايى ءادىس-تاسىلدەردى ۇيرەنۋ ارقىلى مينۋتىنا 1000 ءسوز وقيتىن ازاماتتاردى دا كەزدەستىرۋگە بولادى.

الايدا مۇنشالىقتى شاپشاڭدىقپەن ءسىز ءماتىندى تولىق تۇسىنبەي قالۋىڭىز مۇمكىن. ال بار گاپ سول وقىعان دۇنيەنى ميىڭا سىڭىرۋدە عوي.

وتە تەز وقۋ قابىلەتىنە عىلىمي تۇرعىدان قاراعان ادام فرانتسۋزدىڭ كوزى دارىگەرى ەميل جيەۆال ەكەن. 1925 -جىلى ا ق ش-تا تەز وقۋعا داعدىلاندىراتىن ارنايى كۋرستار اشىلعان. 1940 -جىلى تەز وقۋعا جۇرتشىلىقتىڭ قىزىعۋشىلىعى قاتتى ويانىپ، بۇل جونىندە ارنايى وقۋلىقتار شىعا باستاعان. دەگەنمەن بۇدان ءماتىندى تەز وقىپ، ونداعى جازىلعان دۇنيەلەردى ميىنا سول مەزەتتە قوندىرىپ الا قوياتىن ادامداردىڭ سانى كوبەيمەگەن ەكەن. تەز وقۋ بۇل تابيعاتتىڭ ادام بالاسىنا دارىتقان سيرەك كەزدەسەتىن سىيى دەسەك تە بولادى. تاريحتا مۇنداي ادامدار از ەمەس، دەگەنمەن كوپ دەپ ايتۋعا دا بولمايدى. ماسەلەن...

گوركي. اتاقتى جازۋشى ماكسيم گوركيدىڭ قالاي كىتاپ وقىعانىن ونىڭ زامانداسى ا. س. نوۆيكوۆ- پريبويا بىلاي دەپ سۋرەتتەگەن ەكەن: «قولىنا العان ءبىرىنشى جۋرنالدى ول ورتاسىنان ءبولىپ قاراي باستادى. ونىڭ نە وقىپ وتىرعانىن، نە ءجاي عانا پاراقتاپ وتىرعانىن ءتۇسىنۋ قيىن ەدى. ءبىر جۋرنالدى قاراپ بولعان سوڭ ول ەكىنشىسىنە قول سوزدى. وسى كورىنىس قايتالانا بەردى. گوركي جۋرنالداعى ماتەريالدى سولدان وڭعا قاراي ەمەس، جوعارىدان تومەن قاراي وقىپ جاتقانداي سەزىلدى. جۋرنالدىڭ ءاربىر بەتىن وقىپ تاۋىسۋ ءۇشىن وعان ءبىر مينۋتقا جەتپەيتىن ۋاقىت كەتتى. سوڭعى بەتكە بارعانشا ول وسىلاي وقي بەرەدى. تاۋىسقان سوڭ كەلەسىسىن قولعا الادى».

ا. س. نوۆيكوۆ- پريبويا بۇدان كەيىن گوركيدىڭ قاراپ بىتكەن جۋرنالدارىن جيناپ الىپ، باستان-اياق تۇگەل وقىپ شىعادى. وعان بىرنەشە ساعات ۋاقىت كەتكەن. جۋرنالداردا نەگىزىنەن اڭگىمەلەر، سىن ماقالالار جاريالانعان ەكەن. ەرتەڭىنە ول وقىعان دۇنيەلەرىن قانشالىقتى تۇسىنگەنىن ءبىلۋ ءۇشىن گوركيگە سۇراقتار قويا باستاپتى.

گوركي سۇراقتارعا جاۋاپ بەرگەنى بىلاي تۇرسىن، جۋرنالداعى اۆتورلاردىڭ كەيبىر ويلارىن جاتقا ايتىپ بەرىپ، تاڭ قالدىرىپتى.

لەنين: «يليچتىڭ كىتاپتى تەز وقىپ، ونداعى جازىلعان دۇنيەلەردى تولىق ءتۇسىنىپ الۋ قابىلەتى ادام تاڭقالارلىق ەدى. ول كىتاپتاعى ءاربىر ءسوزدى ەمەس، ءبىز مەزەتتە پاراقشانى تۇتاستاي وقىپ شىققانداي اسەر بەرەتىن. ارادا ءبىراز ۋاقىت وتكەندە ول وقىعان ماتىنەن مىسالدار كەلتىرە باستايتىن».

كوسەمنىڭ جانىندا جۇرگەن سەرىكتەرىنىڭ ءبىرى پ. لەپەشينسكي وسىلاي دەپ جازعان ەكەن. ال، ونىڭ ايەلى ءوزىنىڭ ەستەلىگىندە بىلاي دەپ جازادى: «يليچتىڭ قولىندا شەت تىلىندە جازىلعان ءبىر كىتاپ بار بولاتىن. ول كىتاپتى جارتى مينۋت وتپەي جاتىپ پاراقتاپ وتىردى. وسىدان كەيىن مەن ودان:

- ءسىز كىتاپتى وقىپ وتىرسىز با، الدە جاي عانا پاراقتاپ وتىرسىز با، - - دەپ سۇرادىم.

لەنين:

- ارينە، وقىپ وتىرمىن جانە دە وتە مۇقيات وقيمىن. ويتكەنى بۇل وقۋعا تۇرارلىق كىتاپ، - دەدى. «ءسىز كىتاپتى نەگە مۇنشالىقتى تەز وقيسىز؟» دەگەن ساۋالعا ول: «ەگەر مەن كىتاپتى ءجاي وقىسام، وندا وزىمە قاجەتتى دۇنيەلەرمەن تانىسىپ ۇلگەرە الماس ەدىم» دەپ جاۋاپ بەردى.

ستالين:

ستاليننىڭ جەكە كىتاپحاناسىندا رەسەي كلاسسيكتەرىنىڭ بارلىق دەرلىك كىتاپتارى، سونىمەن بىرگە رەسەي، سوۆەت ەنسيكلوپەديالارى، سوزدىكتەر، انىقتامالار جەكە شىعارمالار بولعان. اسىرەسە، ول پۋشكيندى جانە پۋشكين تۋرالى جازىلعان كىتاپتاردى جاقسى كورگەن ەكەن. ستالين بۇل كىتاپتاردىڭ كوپشىلىگىن وقىعان جانە وتە ىجداقاتتىلىقپەن وقىعان. وزىنە ۇناعان كىتاپتاردى بىرنەشە قايتارا وقىپتى. ونىڭ ۇستەلىنىڭ ۇستىندە ۇنەمى ءتۇرلى ءتۇستى كارانداش تۇرعان. كىتاپتاعى كەيبىر سوزدەردى ول وسى كارانداشپەن استىن سىزىپ، كەيدە بوس تۇرعان جەرگە ءوزىنىڭ ويلارىن جازىپ قالدىرعان. يوسيف ۆيسساريونوۆيچ كۇنىنە بىرنەشە كىتاپتى تاۋسىپتى. «مەنىڭ كۇندىزگى نورمام 500 بەت» دەگەندى ول كابينەتىنە كەلۋشىلەرگە ايتىپ وتىرادى ەكەن. ستاليننىڭ كىتاپقۇمارلىعىن، جان-جاقتى بىلىمدىلىگىن زامانداستارى دا ءوز ەستەلىكتەرىندە جازىپ كەتكەن.

چەرنىشەۆسكي: ورىستىڭ اتاقتى رەۆوليۋتسيونەر- دەموكراتى، جازۋشىسى نيكولاي چەرنىشەۆسكي ءبىر مەزگىلدە كىتاپتى دا وقىپ، حاتشىسىنا نەمىس تىلىنەن اۋدارىلعان ماتىندەردى داۋىستاپ ايتىپ وتىرعان. عالىمدار بۇل وتە سيرەك كەزدەسەتىن قابىلەت دەيدى

ۆاشينگتون: تاڭەرتەڭگىلىك گازەتتى ۆاشينگتون داۋىستاپ وقىپتى. ءوزىنىڭ بارىلداعان داۋسىمەن ول كورشىلەرىن دە ءجيى مازالاعان دەيدى. ول «گازەتتى داۋىستاپ وقۋ ارقىلى ءماتىندى تولىق تۇسىنەمىن جانە ونداعى وتىرىك پەن شىندىقتىڭ اراسىن اجىراتامىن» دەپتى.

ماركس: «كىتاپتار مەنىڭ قۇلدارىم» دەگەندى كارل ماركس ايتقان ەكەن. ول وقىعان ءاربىر پاراعىنا بەلگىلەر قالدىرىپ، ايباق-سايباق ەتكەندى جاقسى كورەدى ەكەن.

رۋزۆەلت: ا ق ش پرەزيدەنتى فرانكلين رۋزۆەلتتىڭ كىتاپ وقۋعا دەگەن قۇمارلىعى ەرەكشە بولعان. قارپايىم ادام ءبىر رەت نازار اۋدارۋ ارقىلى ءبىر ءسوزدى وقىسا، ول تۇتاس ابزاتستى ءبىراق وقىعان. ءبىر وتىرعاندا ءبىر كىتاپتى تاۋىسۋدى ادەتكە اينالدىرعان جانە كىتاپ اياقتالمايىنشا ورنىنان تۇرماعان. رۋزۆەلت تەز وقۋدى ەرەكشە ىنتا-ىقىلاسپەن يگەرگەن ادام. ول الدىمەن ءبىر مەزگىلدە ماتىندەگى ءتورت ءسوزدى وقۋدى مەڭگەرىپتى. بۇدان كەيىن بەس، التى ءسوز... اقىر اياعىندا ونى سەگىزگە دەيىن جەتكىزگەن.

بالزاك: كىتاپتى قالاي وقيتىنىن بالزاك بىلايشا سۋرەتتەگەن ەكەن: «مەن 7-8 ءسوزدى بىردەن وقۋدى ۇيرەندىم. وقىعان سوزدەردى ميىم دا سونشالىقتى تەز قابىلدايتىن. كەيدە سويلەمدەگى ءبىر ءسوزدى عانا وقۋ ارقىلى ونىڭ ءمان- ماعىناسىن تولىق تۇسىنە قوياتىنمىن».

گيتلەر: كىتاپقۇمار ادامنىڭ ءبىرى گيتلەر بولعان. ءبىر تاڭقالارلىعى، كىتاپ تاڭداماعان. قولى بوس كەزدە قولىنا تۇسكەن كىتاپتىڭ ءبارىن تالعامسىز وقي بەرگەن. ول الدىمەن كىتاپتى ءار جەرىنەن پاراقتاپ كورىپ شىعادى ەكەن. ەگەر ىشىندە قاجەت-اۋ دەگەن جەرى بولسا وقىعان، ءبىراق گيتلەردىڭ ءبىر ەرەكشەلىگى كىتاپتى باستان- اياق ەمەس، تەك قاجەت-اۋ دەگەن تۇستارىن عانا ءسۇزىپ وقىعان كورىنەدى. ونىڭ جەكە كىتاپحاناسىندا كلاسسيكالىق دۇنيەلەردەن ەشتەڭە بولماپتى. گيتلەر ءوزىنىڭ كوركەم دۇنيەلەردى وقىعىسى كەلمەيتىنىنە ءومىر بويى وكىنىپ وتكەن ەكەن.


باستى سوزدەر: الةم,
:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
ريزابەك نۇسىپبەك
ريزابەك نۇسىپبەك
954-049
رەداكتور
بەيسەن سۇلتان
بەيسەن سۇلتان
954-049

مۇراعات