ەردوعان: اسكەري وپەراتسيانى جالعاستىرامىز

نۇر-سۇلتان. قازاقپارات - قىزىل جارتى اي قوعامى تۇركيامەن شەكارالاس ورنالاسقان سيريالىق راس- ەل- اين قالاسىنىڭ تۇرعىندارىنا كومەك كورسەتىپ جاتىر. بۇل تۋرالى تۇركيا پرەزيدەنتى رەجەپ تايىپ ەردوعان مالىمدەدى.

 بۇعان دەيىن سيريالىق تاراپ وسى كومەكتىڭ جەتكىزىلۋىنە تۇركيالىق اسكەريلەر قاساقانا كەدەرگى جاساپ وتىر دەگەن ەدى. ەردوعان سونداي- اق كۇرد جاساقتارى بەلگىلەنگەن مەرزىمدە اۋماقتى بوساتپاسا، شابۋىلدى ۇدەتەتىنىن دە ەسكەرتتى.

 رەجەپ تايىپ ەردوعان، تۇركيا پرەزيدەنتى:

- ازىرگە ۋاقىتشا كەلىسىممەن وپەراتسيا توقتاتىلدى. دەگەنمەن 120 ساعات اياقتالا سالىسىمەن لاڭكەستەرگە قارسى شابۋىلدى قايتا جانداندىرامىز. كۇرد جاساعى بەكىتىلگەن شارتتاردى ورىنداپ، وڭىردەن كەتپەسە، ءوز وبالدارى وزدەرىنە.

دەسە دە، كۇرد جاساقتارى تۇركيانىڭ ءوزى ۋاقىتشا وق اتپاۋ كەلىسىمىن ورىنداپ وتىرعان جوق دەيدى. سەبەبى سولتۇستىك- شىعىستاعى كەيبىر ەلدى مەكەندەرگە ءالى دە اۋە سوققىسى جاسالىپ جاتقان كورىنەدى. ءتىپتى بۇل ۋاقىت ارالىعىندا 17 بەيبىت تۇرعىن قازا تاپتى دەگەن اقپارلار بار.

www.24.kz