+7 (701) 759 90 19
-2 °С : نۇر-سۇلتان
-3 °С : الماتى
USD 388.07 EUR 427.54
RUB 6.08 CNY 55.36
جاڭالىقتار

اعاشتان كارتينا جاساۋعا قىزىعاتىن جاستاردى تاپپادىم - شەبەر

21 قازان 08:29
:ءبولىسۋ
اعاشتان كارتينا جاساۋعا قىزىعاتىن جاستاردى تاپپادىم - شەبەر

اقتوبە. قازاقپارات - شەبەر قىدىرباي ناۋشابايەۆ ءبىر جىلدا ەكى عانا تۋىندى جاساپ شىعارادى. تەمىر ۇستاسى بولىپ جۇمىس ىستەيتىن ول قولونەرگە قىزىعاتىن شاكىرت تابا الماي ءجۇر، دەپ حابارلايدى قازاقپارات ءتىلشىسى.

اقتوبە قالاسىندا تۇراتىن شەبەر قىدىرباي ناۋشابايەۆتى تانيتىن ادام از. سەبەبى ول كاسىبي شەبەرلەر سەكىلدى بۇيىمدارىن مول جاساپ ساتپايدى، ءبىر عانا اعاشتان جونعان تۋىندىلارىن كاسىپ ەتپەيدى. ول اكەسىنىڭ اعاش جونىپ، تۇرمىسقا قاجەتتى دۇنيەلەر جاساپ جۇرگەنىن كورەدى، قىزىعادى، ءوزى دە ماشىقتانادى. بەسىك، ساندىقتىڭ جاسالۋ جولىن ءبىلىپ وسكەن ول ماسكەۋ ونەر ۋنيۆەرسيتەتىنە ءتۇسىپ، ءۇش جىل ءبىلىم الدى. 90 -جىلدارى قازاقستان تاۋەلسىزدىگىن العان كەزدە تۇرمىس قامىمەن جۇرگەن قىدىرباي ناۋشابايەۆ وتباسىنا كوڭىل ءبولىپ، بالا-شاعا اسىراۋ جولىمەن ۆاحتالىق ادىسپەن جۇمىسقا ورنالاستى. اعاشتان قازاقتىڭ ءبىرتۋار ازاماتتارىنىڭ بەينەسىن جاساپ شىعارعان ول بىرەر تۋىندىسىن قابىرعاعا ءىلىپ قويعان. شاڭ باسقان ونەرىن ارادا 20 جىل وتكەن سوڭ قايتا قولعا العان.


«مەن 20 جىل بويى قارا جۇمىس ىستەپ، ونەرگە دەن قويا المادىم. تاۋەلسىزدىكتىڭ العاشقى جىلدارى ەل تۇرمىس قامىن ويلاپ، كۇن كورۋگە كوشتى. ال قولدان جاسالعان بۇيىمدارعا سۇرانىس بولماعان ەدى. قازىر ۆاحتالىق ادىسپەن جۇمىس ىستەۋدى قويىپ، ءبىر جىلدان بەرى اعاش جونۋعا كوشتىم. ابىلاي حان، نۇرپەيىس بايعانين، امانگەلدى يمانوۆ، اباي قۇنانباي ۇلى، قۇرمانعازى سەكىلدى ءبىرتۋار ازاماتتاردىڭ بەينەسىن سومداعاندى ۇناتامىن. ءوزىم شەبەرلەرمەن بايلانىس ورناتا المادىم. اقتوبەدە ءدال وسىنداي جولدى تاڭداعان شەبەرلەردى كورمەدىم»، - دەدى قىدىرباي ناۋشابايەۆ.


شەبەر اعاشتى بازاردان ساتىپ الىپ، قاراڭعىدا كەپتىرەدى. مىندەتتى تۇردە 3-4 جىل قاراڭعىدا، قۇرعاق جەردە ساقتالۋى ءتيىس. كەپتىرۋ تەحنولوگياسى دۇرىس ساقتالعان اعاش سۋ تيگەندە ءپىشىنىن وزگەرپەيدى. قىدىرباي ناۋشابايەۆ بازارعا ءبىر بارعاندا 10 دانا اعاشتى كەستىرىپ الادى. كەيىن كەپتىرىپ، ساقتاپ قويادى. ءبىر ساتتە ەكى تۋىندىنى قاتار باستايدى.

«بۇل ادامنىڭ جانىن، ويىن تىنشتاندىراتىن جۇمىس. سوندىقتان بىركەلكى جۇمىستان جالىققان كەزدە اعاشتى قولعا الامىن. قازىر ءوزىم كولىك جوندەۋ ورتالىعىندا تەمىر ۇستاسى بولىپ جۇمىس ىستەيمىن. اعاشتار مەن قاجەتتى قۇرال- جابدىقتاردىڭ ءبارىن جۇمىس ورنىنا اكەلىپ قويدىم. سەبەبى ۇيدە جاساۋعا مۇمكىندىك جوق، شاشىپ وتىرا دا المايمىن»، - دەدى ول.

شاكىرت تاربيەلەۋدى، بىلگەنىن ۇيرەتۋدى ويعا العانىمەن بۇل سالاعا قىزىققان جاستار كەزىكپەدى. بىلەك ءتۇرىپ كەلگەندەرى ۋاقىت پەن شىدامدىلىقتى قاجەت ەتەتىن جۇمىسقا ۇيرەنىسە المادى.


«الدىما كەلگەن جاستاردا قىر-سىرىن ايتىپ، ميراس ەتىپ قالدىرعىم كەلەدى. ءبىراق كەلمەدى، ۇيرەنبەدى. كەيبىرى كەلىپ، شىداماي كەتىپ قالادى. بۇل ويدى، شىعارماشىلىق ىزدەنىستى قاجەت ەتەدى. ماسەلەن مەن قۇرمانعازىنىڭ سۋرەتىن جونۋدى باستادىم. ونى ءبىر جىل بويى جاساپ شىعارامىن. ياعني، ءاربىر دەتالىن جاساعاندا ويلانامىن، كەيدە ادامداردان ۇقساستىق ىزدەيمىن. قۇلاعىن شىعارعان كەزدە ادامداردىڭ قۇلاعىم ۇستاپ كورەمىن. شىنايى بولۋى ءۇشىن اۆتوبۋس ىشىندە كەلە جاتقاندا دا جۇرتتىڭ جۇزىنە قاراپ جۇرەمىن. اقىندار قويىن داپتەرى مەن قارىنداشىن الىپ جۇرسە، مەن ويعا ءتۇيىپ الامىن»، - دەدى ول.

كەيبىر ادامدار ءوز پورترەتىن جاساپ بەرۋگە ۇسىنىس ايتادى. ءبىراق شەبەر قازاق حالقىنا ەڭبەگى سىڭگەن ادامداردىڭ بەينەسىن جاساپ شىعۋدى ماقسات ەتكەن.

«ساپالى سۋرەت تابۋ قيىن. سوندىقتان مەكتەپ وقۋشىلارىنىڭ وقۋلىقتارىن قاراپ جۇرەمىن. تاعى ءبىر ادەتىم - ەسكى دۇنيەلەردى لاقتىرمايمىن، جيناپ جۇرەمىن. قولىمنان كەلسە جوندەپ، كادەگە جاراتامىن. ماسەلەن، ەسكى ساعات، تەلەديدار، راديو جۇمىس ىستەپ تۇر»، - دەدى قىدىرباي ناۋشابايەۆ.

اقتوبە وبلىسىنداعى بارلىق مۋزەيدىڭ بايلانىس تەلەفونىن الىپ، قولونەر شەبەرلەرىنىڭ كورمەسى بولسا شاقىرۋدى سۇراعان. ازىرگە تەك ۇيىمداستىرۋشىلاردىڭ وزىمەن بايلانىسقانىن كۇتۋمەن كەلەدى. ءبىر رەت ورتالىققا شىعىپ، كورمەگە قاتىسقان كەزدە ۇسىنىستار بولاتىنىن ايتقان ادامدار بايلانىس ءنومىرىن دە جازىپ العان. ءبىراق شەبەر ءوز تۋىندىلارىن ساتپايدى، كەيدە كوڭىلى قالاعان ادامدارعا تەگىن بەرەدى.

اۆتور: التىناي ساعىندىقوۆا


باستى سوزدەر: قوعام,
:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
باقىتجول كاكەش
باقىتجول كاكەش
954-049
رەداكتور
ريزابەك نۇسىپبەك
ريزابەك نۇسىپبەك
954-049
رەداكتور
بەيسەن سۇلتان
بەيسەن سۇلتان
954-049

مۇراعات