كورنەكتى كۇيشى سەكەن تۇرىسبەك ستۋدەنتتەرگە كۇي قۇدىرەتىن ءتۇسىندىردى

الماتى. قازاقپارات - قازاقستان رەسپۋبليكاسىنىڭ ەڭبەك سىڭىرگەن ءارتىسى، كورنەكتى كۇيشى- كومپوزيتور سەكەن تۇرىسبەك قازاق ۇلتتىق قىزدار پەداگوگيكالىق ۋنيۆەرسيتەتىنىڭ ستۋدەنتتەرىنە شەبەرلىك سىنىبىن وتكىزدى، دەپ حابارلايدى قازاقپارات وقۋ ورنىنىڭ باسپا ءسوز قىزمەتىنە سىلتەمە جاساپ.

ونەر جانە مادەنيەت فاكۋلتەتىنىڭ ستۋدەنتتەرى قاتىسقان شارادا مادەنيەت مايتالمانى بابادان بالاعا مۇرا بولىپ كەلە جاتقان كۇي ونەرى حاقىندا، ۇلتتىق مۋزىكا توڭىرەگىندە ساليقالى ويلارىمەن ءبولىستى.

قازاقستاننىڭ تۇڭعىش پرەزيدەنتى - ەلباسى نۇرسۇلتان نازاربايەۆ «بولاشاققا باعدار: رۋحاني جاڭعىرۋ» اتتى ماقالاسىندا «جاڭا تۇرپاتتى جاڭعىرۋدىڭ ەڭ باستى شارتى - ۇلتتىق كودىڭدى ساقتاي ءبىلۋ. ونسىز جاڭعىرۋ دەگەنىڭىزدىڭ قۇر جاڭعىرىققا اينالۋى وپ-وڭاي» دەگەن بولاتىن. ال تۇيسىنە بىلگەن ادامعا ۇلتتىق كودىمىز قازاقتىڭ ءسوز ونەرىندە، كلاسسيكالىق ءانى مەن كۇيىندە جاتىر. سەكەن تۇرىسبەك جاستارمەن كەزدەسۋدە اڭگىمەنىڭ ءالقيسساسىن وسى توڭىرەكتەن باستادى.

- ۇلى جازۋشى مۇحتار اۋەزوۆتىڭ «قازاقتىڭ ونەرىندەگى ەڭ كۇردەلىسى، تولعاۋلىسى، سىرلىسى ول - كۇي ونەرى» دەگەن ءسوزى بار. تاعى دا مۇحاڭ «قازاقتىڭ ۇياتى مەن قاسيەتى تەك قانا كۇيىندە قالدى» دەيدى. راسىندا دا، كۇي - ءبىزدىڭ حالىققا عانا ءتان ونەر. ءدال قازاقتاي كۇيدى قۇرمەتتەيتىن ەل جوق. ماسەلەن، ءبىزدىڭ باتىسىمىزدا دا، شىعىسىمىزدا دا، ارقادا دا كۇي مەكتەپتەرى قالىپتاستى. بۇل - ءبىزدىڭ باعا جەتپەس بايلىعىمىز.

كەيبىرەۋلەر قازاقتا بەس مىڭ نەمەسە جەتى مىڭ كۇي بار دەپ جاتادى. ءتىپتى، قۇرمانعازى اتىنداعى قازاق ۇلتتىق كونسەرۆاتورياسىندا ارنايى ساناق جۇرگىزىلىپ، 5030 كۇي دەگەن سان شىققان. ءوز باسىم تىڭقىلداتقان دۇنيەنىڭ ءبارىن كۇي دەپ تانىمايمىن. شىققان مىڭ كۇيدىڭ ىشىنەن ون بەس-جيىرماسى جانىمىزعا جىلىلىق اكەلسە، جۇرەگىمىزدى قوزعاسا، وي سالاتىن بولسا، ءيىرىمى، فورماسى، دياپازونى، بوياۋى ساي كەلىپ تۇرسا، مىنە - ناعىز كۇي، قالعاندارى قاتارداعى دۇنيەلەر. ماسەلە سانىندا ەمەس، ساپاسىندا.

ماسەلەن، نۇرعيسا تىلەنديەۆتىڭ «اققۋ» كۇيىنەن نە الا المايسىڭ، نە قوسا المايسىڭ. نۇراعامىز سياقتى جۇرەگىڭدى، جانىڭدى قوزعايتىن دۇنيە شىعادى-اۋ دەگەن كۇيدى دامىتىپ، سوعان ءوزىمىزدىڭ ۇلەسىمىزدى قوسىپ جاتساق، ول حالىقتىڭ ەرتەڭگى يگىلىگىنە اينالادى، - دەدى سەكەن تۇرىسبەك.

سونداي-اق شەبەرلىك سىنىپ بارىسىندا داۋلەسكەر كۇيشى بىرنەشە شىعارمانى توگىلتە ورىنداپ، جينالعانداردىڭ ىستىق ىقىلاسىنا بولەندى.

باسقوسۋدا ستۋدەنتتەر ونەر يەسىنە وزدەرىن قىزىقتىرعان ساۋالدار قويىپ، شىعارماشىلىق جوسپارلارى تۋرالى سۇرادى.

قىزدار ۋنيۆەرسيتەتىنىڭ رەسمي وكىلى جاندار اساننىڭ ايتۋىنشا، بۇل شارا «75 جىلعا - 75 يگىلىكتى ءىس» جوباسى اياسىندا جۇزەگە اسىرىلىپ وتىر.