تۇلپار ءمىنىپ، تۋ العان: قوبىلاندى باتىر جىرىن جاتتاعان وقۋشى ميلليونەر بولدى
«Qazaq Epos» رەسپۋبليكالىق اعارتۋ جوباسى «تۇلپار ءمىنىپ، تۋ العان!» بايقاۋىنىڭ وبلىستىق كەزەڭى اياقتالدى. ەلباسى ن. ءا. نازاربايەۆتىڭ «بولاشاققا باعدار: رۋحاني جاڭعىرۋ» جانە «ۇلى دالانىڭ جەتى قىرى» ماقالالارىنىڭ اياسىندا وتكەن شاراعا وبلىس اكىمى وڭداسىن ورازالين قاتىسىپ، بايقاۋ جەڭىمپازدارى مەن قاتىسۋشىلاردى قۇتتىقتادى.
«رۋحاني جاڭعىرۋ» باعدارلاماسى اقتوبە وبلىسىنىڭ دامۋىنا سەرپىن بەرىپ، قوعام تالابىمەن ۇيلەسىم تاپتى. ونىڭ ءبىر دالەلى - «تۇلپار ءمىنىپ، تۋ العان!» بايقاۋى. بۇل بايقاۋدىڭ اقتوبەلىك بالالار اراسىندا كەڭ قولداۋ تابۋىندا دا ەرەكشە ءمان بار. سەبەبى اقتوبە جەرى - باتىرلار مەكەنى. تاريحتا وشپەس ءىز قالدىرعان قوس ەسەت باتىر، قوبىلاندى مەن بوكەنباي، شىعىس جۇلدىزى اتانعان باتىر قىز ءاليا مولداعۇلوۆا - اقتوبەنىڭ ماقتانىشتارى.
مۇنداي ۇلىلار مەكەنىندە دۇنيەگە كەلگەن بالالاردىڭ باتىرلار جىرىنا قىزىقپاۋى مۇمكىن ەمەس. بايقاۋ ارقىلى اتا- بابامىزدىڭ تاربيە ءتاسىلى قايتا جاڭعىرىپ جاتىر. سوندىقتان بالا تاربيەلەۋدە باتىرلار جىرىن وقىتۋ قايتا قولعا الىنىپ، قايتا جاڭعىرتىلۋى يگى باستاما. ءبىز تەك اتادان قالعان سىرلى سوزدەر مەن رۋحاني ۇلگىمەن عانا رۋحاني تۇلەپ، سانالى تۇردە جاڭعىرامىز.
«تۇلپار ءمىنىپ، تۋ العان!» سەكىلدى جوبالار ارقىلى باي مۇرامىزدى بويىنا سىڭىرگەن، ۇلتتىق رۋحى مىقتى ۇرپاق ءوسىپ- ونەدى»، - دەپ اتاپ ءوتتى ايماق باسشىسى. وڭداسىن ورازالين بايقاۋ جەڭىمپازدارىنا جانە ولاردىڭ جەتەكشىلەرىنە قارجىلاي سىيلىق تابىس ەتتى.
1-ورىن العان العا اۋدانى №3-العا ورتا مەكتەبىنەن 10-سىنىپ وقۋشىسى مۇراعات بەكەنوۆكە 1000000 تەڭگە جانە ونىڭ جەتەكشىسى باقتىگۇل قويشىعۇلوۆاعا 2000000 تەڭگە، 2-ورىندى يەلەنگەن اقتوبە قالاسىنان №21 -مەكتەپتىڭ 6-سىنىپ وقۋشىسى اميرا ءسابيتوۆا 600 مىڭ تەڭگەگە، ونىڭ جەتەكشىسى روزا باەكەشوۆاعا 1,2 ميلليون تەڭگەنىڭ سەرتيفيكاتى بەرىلدى. 3-ورىنعا حرومتاۋ اۋدانىنان كەلكەن راۋان امانگەلدى قول جەتكىزدى.
№5-مەكتەپ گيمنازياسىنىڭ 8-سىنىپ وقۋشىسى 300 مىڭ تەڭگەگە يە بولدى. جەتەكشىسى تورعىن جانۇزاقوۆاعا 600 مىڭ تەڭگەنىڭ سەرتيفيكاتى بەرىلدى. اتالعان جەڭىمپازدار اقتوبە وبلىسى اكىمىنىڭ ديپلومىمەن ماراپاتتالدى.
ايتا كەتەيىك، بايقاۋعا قاتىسۋعا رەسپۋبليكا بويىنشا 5621 مەكتەپتىڭ 51328 وقۋشىسى مەن 23 128 مۇعالىم قاتىسسا، اقتوبە وڭىرىنەن 2311 وقۋشى جانە ولاردى دايىنداعان 979 مۇعالىم قاتىستى. ولاردىڭ ىشىندە 28 ى ءتۇرلى ەتنوس وكىلى. ءبىرىنشى ورىن العان وقۋشى كەلەر جىلى نۇر-سۇلتان قالاسىندا وتەتىن رەسپۋبليكالىق بايقاۋعا قاتىسادى.
اۆتور: التىناي ساعىندىقوۆا