التايدا اتقا ءمىنۋ ساباعى مەكتەپ باعدارلاماسىنا ەنگىزىلدى - شەتەلدەگى قازاق ءتىلدى ب ا ق-قا شولۋ

نۇر-سۇلتان. قازاقپارات - «قازاقپارات» ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

التايدا اتقا ءمىنۋ ساباعى مەكتەپ باعدارلاماسىنا ەنگىزىلدى - «التاي اقپارات» سايتى

قىتايدىڭ التاي قالاسىنداعى 10 مىڭ جاسوسپىرىمگە اتقا ءمىنۋدى ۇيرەتەتىن، ەرەكشە سپورت جانە دەنە شىنىقتىرۋ ساباعى وتكىزىلە باستادى، دەپ حابارلايدى altxw.com سايتى.

اتالعان ب ا ق-تىڭ جازۋىنشا، بۇل اتقا ءمىنۋدى ۇيرەتىپ، ات سپورتى ونەرىنە باۋليتىن ەرەكشە باعدارلاما التاي قالاسىنداعى وقۋ جاسىنداعى بارلىق مەكتەپ وقۋشىلارىنىڭ ءسوزسىز وقيتىن مىندەتتى ساباعىنا اينالعان. «التايدىڭ التىن قاندى اسىل تۇقىمدى جىلقى شارۋاشىلىعى» ج ش س-نىڭ باس مەنەدجەرىنىڭ جۋرناليستەرگە بەرگەن مالىمەتىنشە، جىلقى فەرماسى مەن ۇكىمەت 10 جىلدىق وقىتۋ تۋرالى كەلىسىمگە قول قويعان. ولار وسى جىلدىڭ وزىندە 5000 وقۋشىعا ات سپورتىنىڭ قىر-سىرىن ۇيرەتپەك.

قازىرگى كۇنى ەرەكشە باعدارلاما بويىنشا وقىتاتىن، جىلقى شارۋاشىلىعى بويىنشا جوعارى وقۋ ورىندارىنان ءبىلىم العان 25 وقىتۋشى دايىندالعان. 2019 -جىلى التاي ايماعى ءار كۇنى 100 وقۋشىنىڭ يپپودرومعا بارىپ ات ونەرى ساباعىنا قاتىناسۋىن جوسپارلاعان.

«ات سپورتى ساباعىندا وقۋشىلار الدىمەن جىلقىلاردىڭ تىرشىلىك ەتۋ ورتاسى مەن جىلقىلاردىڭ جالپى سيپاتى جانە ات سپورتى ونەرى تۋرالى جان- جاقتى ماعلۇماتتارمەن تانىسادى. سودان كەيىن اتقا ءمىنۋدى ۇيرەنەدى. مامانداردىڭ ايتۋىنشا، بۇل باعدارلاما وقۋشىلاردىڭ كۇيزەلىسىن جەڭىلدەتىپ، دەنە شىنىقتىرۋ ساباعىنا قىزىعۋشىلىعىن ارتتىرادى. سونداي-اق، جاستاردىڭ وزىنە دەگەن سەنىمدىلىگىن كۇشەيتىپ، ات ۇستىندە تەپە-تەڭدىكتى ساقتاي وتىرىپ، دەنە ءبىتىمىنىڭ شىمىر، ءتۇزۋ وسۋىنە، اعزانى نىعايتاۋعا كومەكتەسەتىن ەرەكشەلىكتەرى بار. التايداعى وقۋشىلاردىڭ قىسقى ماۋسىمدا دەنە شىنىقتىرۋ ساباعى شاڭعى تەبۋ بولسا، جازعى ماۋسىمداعى دەنە شىنىقتىرۋ ساباعى ات سپورتى ونەرىن ۇيرەنۋمەن تولىقتى»، - دەپ جازادى «التاي اقپارات» سايتى.

ادامنىڭ ازامات قاتارىنا قوسىلۋىنىڭ ءوزىن «ات جالىن تارتىپ ءمىندى» دەپ بەينەلەيتىن قازاق حالقى ءۇشىن جىلقى تۇلىگى قاشاندا ەرەكشە ماڭىزعا يە بولعان. قىتايداعى قازاقتار شوعىرلى قونىستانعان التاي ايماعىنداعى ءتول مادەنيەتىمىزدى ۇلىقتاعان، قازاق ەلىنە ۇلگى بولارلىق بۇل جاڭالىعى كوڭىلگە قۋانىش ۇيالاتادى.

وسى دەرەككوزىنىڭ جازۋىنشا، ات سپورتى ونەرىن ۇيرەنۋ ساباعىندا، وقۋشىلار بۇرىن اتقا ءمىنىپ كورمەگەن سوڭ، باستاپقىدا قورىققان. كەيىننەن وقۋشىلار اتتىڭ قاسىنا بارىپ، باسىنان سيپاپ، جەتەلەپ، ءمىنىپ كورىپ ۇيىرەنە باستايدى. وسىلايشا التاي جەرىندە ءومىر سۇرگەن، ات جالىندا وسكەن اتالارىنىڭ جولىن قۋىپ، مادەنيەتىن ساقتاپ، جالعاستىرۋشى ۇرپاقتارى ءتول مادەنيەتىن قايتا بويىنا دارىتپاق نيەتتە. قىتاي ەلىندە مۇنداي وڭىرلىك ەرەكشەلىككە يە مىندەتتى كۋرستاردى ۇيرەتۋ ءداستۇرى قالىپتاسقان ەكەن. مىسالى، التايدا وقۋشىلارعا اتقا ءمىنۋ ساباعى وقىتىلسا، گۋاڭجوۋدا وقۋشىلار «سورپا جاساۋدى»، حايناندا سۋدا ءجۇزۋدى مىندەتتى ساباققا ەنگىزگەن.

قازاقستاندا وندىرىلگەن 15 توننا پەچەنە ونىمدەرى قىتايعا جەتكىزىلدى - قىتايدىڭ «ورتالىق حالىق راديوسى» (CNR)

قازاقستاندا وندىرىلگەن 15 توننا ساپالى، ءدامدى پەچەنە ونىمدەرى شىڭجاننىڭ «دۋلاتى» وتكىزۋ پۋنكتىنەن قىتاي جەرىنە جەتكىزىلدى، ءونىمدى ءۇرىمجى قالاسىندا ساۋداعا شىعارماق، دەپ جازادى قىتايلىق kazakcnr.com سايتى.

اتالعان اقپارات كوزىنىڭ مالىمەتىنشە، وسى جولعى قازاقستاندىق ءتۇرلى پەچەنە ونىمدەرىن يمپورت ەتكەن «ي حىرۇڭ» ج ش س تاۋارلاردى كەدەننەن ەش قيىندىقسىز، جىلدام راسىمدەپ وتكىزگەنىن ءمالىم ەتكەن. ولار الداعى ۋاقىتتاردا «دۋلاتى» وتكىزۋ پۋنكتى ارقىلى تاعى دا قازاقستاننان ءتۇرلى كونديتەر ونىمدەرىن جانە ماقسارى مايى سەكىلدى ازىق-تۇلىك تاۋارلارىن يمپورتتاۋدى جوسپارلاپ وتىرعانىن ايتادى.

وزبەكستان مەن قازاقستان شەكاراسى ۋاقىتشا جابىلادى - «ءوزا» اقپاراتتىق اگەنتتىگى

مەملەكەتتىك شەكارا كوميتەتىنىڭ مالىمەتىنشە، وزبەكستاننىڭ قازاقستانمەن شەكاراسىنداعى «ياللاما» (وزبەكستان) وتكىزۋ پۋنكتىن كەڭەيتۋ ماقساتىندا، ۋاقىتشا كەلەر جىلدىڭ العاشقى جارتى جىلدىعىنا دەيىن جابىلادى، دەپ حابارلايدى وزبەكستاننىڭ «ءوزا» مەملەكەتتىك اقپاراتتىق اگەنتتىگى.

«1 -قاراشادان باستاپ «ياللاما» (وزبەكستان)، «ب. قونىسبايەۆ» (قازاقستان) شەكارالىق وتكىزۋ پۋنكتىندە، جاياۋ جۇرگىنشىلەر، جەڭىل اۆتوكولىكتەر مەن 3,5 تونناعان دەيىنگى جۇك تاسىمالداۋعا ارنالعان كولىكتەردىڭ قاتىناۋى، قۇرىلىس جۇمىستارىنىڭ جۇرۋىنە بايلانىستى 2020 جىدىڭ ءبىرىنشى جارتىسىنا دەيىن جابىلاتىن بولادى. وسىعان بايلانىستى، شەكارا كوميتەتى تاۋارلار مەن كولىك قۇرالدارىن تاسىمالداۋشىلارعا، كولىك قۇرالدارىنىڭ جۇرگىزۋشىلەرى مەن جاياۋ جۇرگىنشىلەرگە ۋاقىتتى ۇنەمدەۋ جانە ارتىق شىعىنداردىڭ سونىمەن كەلەڭسىز جاعدايلاردىڭ تۋىنداماۋى ءۇشىن وزبەكستان- قازاقستان شەكاراسىنداعى باسقا شەكارالىق وتكىزۋ پۋنكتتەرى ارقىلى جۇرۋلەرىن سۇرايدى»، - دەپ حابارلايدى «ءوزا» اقپاراتتىق اگەنتتىگى.

بەيجىڭدە قىتايداعى از ۇلتتار ادەبيەتىنىڭ ماسەلەلەرىنە ارنالعان جينالىس ءوتتى - «جەنمين جيباو» (People Daily)

قىتايداعى سانى از ۇلتتار ادەبيەتىنىڭ اعىمداعى دامۋ ماسەلەلەرىنە ارنالعان 6-كەزەكتى جيىنالىس بەيجىڭدە اشىلدى، دەپ حابارلايدى kazakh.people.com.cn سايتى.

«قازىرگى كۇنى قىتاي جازۋشىلار قوعامىنا  12200 جازۋشى مۇشە. ولاردىڭ 464 ى از ساندى ۇلت جازۋشىلارى. اراسىندا قىتايدا تۇراتىن 55 از ساندى ۇلتتىڭ بارلىعىنىڭ جازۋشىلار بار. وسى از ساندى ۇلت جازۋشىلارىنىڭ قالامىنان تالاي تاڭداۋلى ادەبي تۋىندىلار ومىرگە كەلدى. بۇل جازۋشىلار قىتايداعى بەدەلدى «لۋ شىن ادەبيەت سىيلىعى»، «تۇلپار سىيلىعى» سەكىلدى كوپتەگەن ماراپاتتارعا يە بولدى. سونداي-اق، تاڭداۋلى تۋىندىلار سارالانىپ، «XXI عاسىرداعى ادەبيەت جۇلدىزى»، 

«قىتايداعى سانى از ۇلتتار ادەبيەتىنىڭ جۇلدىزى»، «جاڭا داۋىردەگى قىتاي از ساندى ۇلت ادەبي شىعارمالارىنان تاڭدامالىلار» سياقتى جوبالار اياسىندا جەلىلەس كىتاپتارعا ەنىپ، مەملەكەتتىڭ قارجىسىمەن جارىق كوردى»، - دەپ جازادى People Daily.

اتالعان ب ا ق-تىڭ جازۋىنشا، القالى باسقوسۋدا از ساندى ۇلتتار ادەبيەتىنىڭ اعىمداعى دامۋ ماسەلەلەرى جان- جاقتى تالقىلانىپ، بۇگىنگى قوعامدا جازۋشىلاردىڭ شىعارماشىلىق جۇمىسپەن الاڭسىز اينالىسۋىنا مۇمكىندىكتەر جاسالىپ وتىرعانى ايتىلعان. جازۋشىلاردىڭ جاڭا شىعارمالارىن جاريالاۋعا، وقىرماندارعا جىلدام جەتكىزۋگە، بەيجىڭدەگى «ۇلتتار ادەبيەتى» جۋرنالى جانە قىتايداعى 5 از ساندى ۇلتتار تۇراتىن اۆتونوميالى ولكەلەردەگى ادەبي جۋرنالدار ءوز ۇلەسىن قوسىپ كەلە جاتقانى بايان ەتىلگەن.

ۋراننىڭ العاشقى پارتياسى قازاقستانعا جەتكىزىلدى - TRT

اتوم ەنەرگياسى جونىندەگى حالىقارالىق اگەنتتىكتىڭ وسكەمەن قالاسىندا ورنالاسقان تومەن بايىتىلعان ۋران بانكىنە ماتەريالدىڭ العاشقى پارتياسى ساقتاۋ ءۇشىن جەتكىزىلدى، دەپ جازادى تۇركيا راديو تەلەۆيزيا پورتالى.

«ق ر سىرتقى ىستەر مينيسترلىگى وسكەمەن قالاسىندا ورنالاسقان تومەن بايىتىلعان ۋران بانكىندە 90 مەتريكالىق توننا ۋران گەكسافتوريدى ساقتالاتىنىن مالىمدەدى.

«ت ب ۋ-دىڭ بۇل قورى راديواكتيۆتى قالدىق ەمەس. حالىققا جانە قورشاعان ورتاعا قاۋىپ توندىرمەيدى» دەپ ايتىلدى. تومەن بايىتىلعان ۋراننان تۇراتىن العاشقى جۇك «قازاتومونەركاسىپ» كومپانياسى مەن فرانسيانىڭ «ارانوسيكل» كومپانياسىنىڭ ۇيىمداستىرۋىمەن قازاقستانعا تاسىمالداندى. قازاقستان شىعىس قازاقستان وبلىسىندا تومەن بايىتىلعان ۋران ساقتاۋ بانكىن قۇرۋ كەلىسىمىنە 2015 -جىلدىڭ تامىز ايىندا ا ق ح ا-مەن قول قويىپ، 2017 -جىلى قاڭتاردا جۇزەگە اسىردى»، - دەپ جازادى TRT.

اۆتور: باقىتجول كاكەش