قازاقستاندا ءبىلىم الاتىن اۋعان ايەلدەرىنىڭ العاشقى توبى الماتىعا كەلدى

None
None
الماتى. قازاقپارات - ەۋروپالىق وداقتىڭ ءبىلىم بەرۋ جوباسى اياسىندا اۋعان ايەلدەرىنىڭ العاشقى توبى قازاقستانعا وقۋعا كەلدى، قازاقپارات قازاقستانداعى ەو وكىلدىگىنىڭ باسپا ءسوز قىزمەتىنە سىلتەمە جاساپ.

18 -قازاندا Almaty Management University-ىندە (بۇدان ءارى - Alma U) ەۋروپالىق وداق قارجىلاندىراتىن جانە قازاقستانداعى بۇۇ دامۋ باعدارلاماسى جۇزەگە اسىراتىن جوباعا قاتىسۋشى وتىز اۋعان ايەلىنىڭ العاشقى توبى قازاقستانعا وقۋعا كەلۋى قارساڭىندا رەسمي قابىلداۋ جۇرگىزىلدى. ءىس- شاراعا قازاقستانداعى ە و ەلشىسى سۆەن-ولوۆ كارلسسون، ق ر سىرتقى ىستەر ءمينيسترىنىڭ ورىنباسارى رومان ۆاسيلەنكو، ب ۇ ۇ دب- نىڭ قازاقستانداعى تۇراقتى وكىلى ياكۋپ بەريش جانە قازاقستانداعى اۋعانستان يسلام رەسپۋبليكاسىنىڭ ەلشىسى موحامماد فارحاد ازيمي قاتىستى.

«اۋعان ستۋدەنتتەرى Alma U- دا وتكەن ءبىر اپتالىق كۋرسى بارىسىندا الداعى وقۋ باعدارلاماسىمەن، كامپۋستىڭ ورنالاسۋى جانە ۋنيۆەرسيتەتتە جاسالعان جاعدايلار، سونداي-اق قازاقستاننىڭ ەرەكشەلىكتەرىمەن تانىستى. ەندى ولار سەگىز ايلىق تەرەڭدەتىلگەن اعىلشىن ءتىلى كۋرسىن ءتامامداعاننان كەيىن قازاقستاندىق ۋنيۆەرسيتەتتەردىڭ باكالاۆريات، ماگيستراتۋرا جانە تەحنيكالىق باعدارلامالارىنا وقۋعا تۇسۋگە مۇمكىندىك الادى»، دەلىنگەن حابارلامادا.

«ءبىز ايەلدەردىڭ ەكونوميكالىق ءوسىم مەن تۇراقتى دامۋدا ەلەۋلى ءرول اتقاراتىنىڭ جانە ولاردىڭ ەكونوميكالىق مۇمكىندىكتەرى ءار ەلدىڭ وركەندەۋى مەن گۇلدەنۋى ءۇشىن ماڭىزدى دەپ سانايمىز. ەۋروپالىق وداق، اۋعانستان جانە ورتالىق ازيا اراسىنداعى ورتاق كوزقاراسقا نەگىزدەلگەن نىق سەنىمدىلىك، ول ءۇش ەلدى - اۋعانستان، قازاقستان جانە وزبەكستاندى ءبىلىم سالاسىنا قارجى ءبولۋ ارقىلى بىرىكتىرە وتىرىپ، ولاردىڭ اراسىنداعى الەۋمەتتىك جانە ەكونوميكالىق بايلانىستاردى نىعايتۋعا ۇلەس قوسۋ. بۇل ورتاق قاۋىپسىزدىك ماسەلەلەرىن شەشۋگە جانە ودان دا بەيبىت ورتانى قۇرۋعا سەپتىگىن تيگىزەدى»، - دەپ اتاپ ءوتتى ە و ەلشىسى سۆەن- ولوۆ كارلسسون.

ەۋروپالىق وداق قازاقستان جانە وزبەكستاننىڭ جوعارعى وقۋ ورىندارى مەن ماماندىققا دايارلاۋ ورتالىقتارىندا اۋعان ايەلدەرىنە ءبىلىم الۋعا مۇمكىندىك بەرەتىن ءۇشجاقتى ىنتىماقتاستىق جوباسىنا 2 ميلليون ەۋرو كولەمىندە گرانت ءبولدى.

«ايەلدەردىڭ ەكونوميكالىق مۇمكىندىكتەرىن كەڭەيتۋ، گەندەرلىك تەڭدىكتى قامتاماسىز ەتۋ جانە بىلىمگە قولجەتىمدىلىكتى جەڭىلدەتۋ - ب ۇ ۇ د ب- نىڭ الەم بويىنشا جۇمىسىنىڭ باسىمدىقتارى. ءبىز بۇدان بۇرىن قازاقستان ۇكىمەتىمەن ارىپتەستىك اياسىندا، اۋعان ايەلدەرىنىڭ وسىندا ءبىلىم الۋىنا مۇمكىندىك جاسادىق. اتالعان جاڭا باستامانىڭ وسى جيناقتالعان تاجىريبەگە سۇيەنۋى جانە ونى ىسكە اسىرۋ ءۇشىن ەۋروپالىق وداقتىڭ ب ۇ ۇ د ب- عا سەنىم ارتقانى قۋانتارلىق جايت. ءبىز بۇل ارىپتەستىگىمىزدىڭ تۇراقتىلىعىن ارتتىرۋعا جۇمىس جاساۋعا دايىنبىز»، - دەپ اتاپ ءوتتى ب ۇ ۇ د ب- نىڭ قازاقستانداعى تۇراقتى وكىلى ياكۋپ بەريش.

2025 -جىلعا دەيىن قازاقستان مەن وزبەكستاننىڭ وقۋ ورىندارىندا اۋىل شارۋاشىلىعى، قولدانبالى ستاتيستيكا جانە تاۋ-كەن ءوندىرىسى سالالارىندا باكالاۆريات، ماگيستراتۋرا جانە تەحنيكالىق ماماندىقتار بويىنشا 50 ستۋدەنت ءبىلىم الادى. «ب ۇ ۇ+ايەلدەر» جوباسىنىڭ سەرىكتەسى رەتىندە ولار جوباعا قاتىساتىن ايەلدەرگە ارناپ كاسىپكەرلىك جانە نەتۋوركينگ داعدىلارىن ارتتىراتىن جازعى مەكتەپتەر ۇيىمداستىرادى، بۇل ولاردىڭ ءارى قاراي جۇمىسقا ورنالاسۋىنا جانە ەكونوميكالىق قۇقىقتار مەن مۇمكىندىكتەرىنىڭ كەڭەيۋىنە جول بەرەدى.

«اتالعان باستاما ايەلدەر ءۇشىن كاسىپكەرلىك پەن جۇمىسقا ورنالاسۋ بويىنشا جاڭا مۇمكىندىكتەردى اشىپ، اۋعانستانداعى ولاردىڭ قاۋىمداستىقتارىنىڭ دامۋىنا ۇلەس قوسادى دەپ كۇتىلۋدە. ب ۇ ۇ د ب-نىڭ 2018 -جىلعا ارنالعان ادام دامۋى تۋرالى ەسەبىنە سايكەس، بارلىق ەرەسەك اۋعان ايەلدەرىنىڭ 11 پايىزى كەم دەگەندە ورتا ءبىلىم العان جانە ولاردىڭ تەك 19,5 پايىزى عانا جۇمىسپەن قامتىلعان، ال ەرلەر اراسىندا بۇل كورسەتكىشتەر سايكەسىنشە 37 جانە 87 پايىزدى قۇرايدى. 2016-2017 -جىلدارى اۋعانستان حالقىنىڭ جارتىسىنان كوبى كەدەيلىك شەگىندە ءومىر ءسۇردى»، دەلىنگەن حابارلامادا.

سوڭعى جاڭالىقتار