الەم ەلدەرى اۆتوكولىك قوزعالىسىنا شەكتەۋ قويىپ جاتىر
مىسالى، ۆەنەتسيادا كولىك جۇرمەيدى، ال يسپانيانىڭ مادريد قالاسىندا، نورۆەگيانىڭ وسلو قالاسىندا كولىك قوزعالىسىن ازايتۋ جوسپارى قولعا الىنباق، دەپ جازادى bbc.
«كوشەدە بالالار ەركىن ويناپ، تۋريستەر اعىلىپ جاتقانىن، ەش جەردە كولىك، موتوتسيكل، اۆتوبۋس جۇرمەيتىنىن ەلەستەتىپ كورىڭىزشى. ۆەنەتسياداعى جاعداي وسىنداي. سوڭعى ءجۇز جىلدا اۆتوكولىك سانى كۇرت ارتقاندىقتان، مۇنداي تىنىشتىقتى ەلەستەتۋدىڭ ءوزى قيىنعا سوعادى. كولىك قۇرالدارى موبيلدىلىكتە رەۆوليۋتسيا جاساعانىمەن، جول-كولىك اپاتىنان قازا تاقاندار سانى مەن اۋانىڭ لاستانۋ كورسەتكىشىن ارتتىردى»، دەپ جازادى باسىلىم.
اۆتوردىڭ ايتۋىنشا، سوڭعى جىلدارى نورۆەگيانىڭ وسلو، يسپانيا استاناسى مادريد قالالارىنىڭ ورتالىعىندا اۆتوكولىك قوزعالىسىنا تىيىم سالۋ جوسپارى قولعا الىنعان.
ماقالادا وسى تاقىرىپتا بىرنەشە كىتاپ جازعان حاننا ماركۋسسەن كوشەلەردى ادامدارعا قايتارىپ بەرۋ كەرەك دەگەن پىكىرىن بىلدىرگەن. ونىڭ سوزىنشە، مۇنىڭ ەكولوگيالىق اسپەكتىلەرى دە بار. بيلىكتىڭ جەرگىلىكتى ورگاندارى سوڭعى ونجىلدىقتا اۋا ساپاسىنىڭ تومەندەگەنىن ايتقان. ال كولىكتەرگە تىيىم سالۋ وسى عانا ەمەس، باسقا دا پروبلەمالاردى شەشۋگە سەپتەسە الادى.
«اۆتوكولىكسىز قالالار تۋرالى الەمدىك ساراپشى دج. ح. كروۋفورد تا اۆتوكولىكتەر قوعامعا ۇلكەن ءقاۋىپ توندىرەتىنىن، سونىمەن قاتار الەۋمەتتىك كەڭىستىكتى ازايتاتىنىن ايتقان. ونىڭ ويىنشا، اۆتوكولىكتەردەن باس تارتۋ پروبلەمادان قۇتىلۋعا كومەكتەسەدى»، دەلىنگەن ماقالادا.
اۆتور «اۆتوكولىكسىز قالا قۇرۋ جوسپارىن جۇزەگە اسىرۋ مۇمكىن بە؟» دەگەن سۇراققا جاۋاپ ىزدەيدى.
«قالالاردا كولىك قوزعالىسىن شەكتەسەك، اۆاريالىق قىزمەتتەر نە ىستەمەك؟ وزدەرى قوزعالا المايتىن ادامدار شە؟ مانچەستەر ۋنيۆەرسيتەتىنىڭ قالانى جوبالاۋ ينستيتۋتىنىڭ زەرتتەۋشىلەرىنىڭ ايتۋىنشا، كولىكتەر لەگىن ازايتۋ ەكولوگياعا پايدالى بولعانىمەن، قوعامنىڭ ءومىرىن كولىك قۇرالدارىنسىز ەلەستەتۋ مۇمكىن ەمەس»، دەپ جازادى ول.
اۆتور: ايكۇمىس بولاتبەك