ءتورت ەلدىڭ بىلىكتى حيرۋرگتەرى اقتوبەدە تەگىن وتالار جاسادى

اقتوبە. قازاقپارات - اقتوبەدە قازاقستاندىق حيرۋرگتەر قوعامىنىڭ ەكىنشى پلەنۋمى باستالدى. پرەنۋم اياسىندا ون ناۋقاسقا كۇردەلى وتا جاسالدى، دەپ حابارلايدى قازاقپارات ءتىلشىسى.

اقتوبە وبلىسىنىڭ دەنساۋلىق ساقتاۋ باسقارماسى، قازاقستان حيرۋرگتەر قوعامى جانە ا. ن. سىزعانوۆ اتىنداعى ۇلتتىق عىلىمي حيرۋرگيا ورتالىعى ۇيىمداستىرعان حالىقارالىق پلەنۋمنىڭ تاقىرىبى - «قازاقستان رەسپۋبليكاسىنىڭ قازىرگى زامانعى شۇعىل حيرۋرگيا اسپەكتىلەرى جانە باسىم باعىتتارىنىڭ دامۋى».

ەكى كۇنگە جالعاساتىن جيىنعا قازاقستاننان بولەك، كورەيا، رەسەي، ليتۆا ەلدەرىنىڭ بىلىكتى ماماندارى كەلدى. «اقتوبە وبلىسىندا مەديتسينانى دامىتۋدىڭ مەملەكەتتىك باعدارلامالارى ءساتتى جۇزەگە اسىرىلۋدا. وڭىردە جاڭا زاماناۋي مەديتسينالىق نىساندار سالىندى. ەسكى ەمدەۋ مەكەمەلەرىنىڭ كوپشىلىگى جوندەۋدەن ءوتىپ، جاڭارتىلدى، جاڭا جابدىقتارمەن جاساقتالدى. وبلىستا ترانسپلانتولوگيا، كارديوحيرۋرگيا، ونكولوگيا، بالالار حيرۋرگياسى، رەابيليتولوگيا، رەپرودۋكتولوگيا، وفتالمولوگيا جانە مەديتسينالىق عىلىم مەن تاجىريبەنىڭ باسقا دا بولىمدەرى قارقىندى دامىپ كەلەدى»، - دەدى وبلىس اكىمى وڭداسىن ورازالين.

شارا بارىسىندا ايماق باسشىسى وتاندىق ءۇش حيرۋرگكە جانە اقتوبەلىك ازاماتتارعا 12 رەت ءساتتى وتا جاساعان وڭتۇستىك كورەيالىق حيرۋرگ كۆانگ ۆۋنگ ليگە «اقتوبەگە 150 جىل» مەرەكەلىك مەدالىن تابىستادى.

سونىمەن قاتار، اقتوبەدە 20 رەت ءساتتى وتا جاساعان سەدات يىلدىرىم مەن جەرگىلىكتى 4 دارىگەر اقتوبەدەگى مەديتسينانىڭ دامۋىنا قوسقان ۇلەسى ءۇشىن العىس حاتتارمەن ماراپاتتالدى. «العاشقى كۇنى شەبەرلىك ساباعى ءوتىپ، ءار ەلدىڭ ۇزدىك حيرۋرگتەرى 10 كۇردەلى وتا جاسادى. ونىڭ ىشىندە بۇيرەك اۋىستىرۋ بار. ايەلدەردىڭ ءسۇت بەزىنە، ءوت جولىنا وتا جاسالدى. مۇنداي كەزدەسۋلەر مەديتسينا سالاسىنىڭ دامۋىنا ۇلكەن سەپتىگىن تيگىزەدى. جەرگىلىكتى حيرۋرگتەر وتا كەزىندە تاجىريبە جيناۋعا مۇمكىندىك الدى»، - دەدى وبلىستىق دەنساۋلىق ساقتاۋ باسقارماسىنىڭ باسشىسى اسەت قاليەۆ.

اۆتور: التىناي ساعىندىقوۆا