جانكۇيەرلەر سوچي اۋەجايىندا ديماشتى گۇلدىڭ استىندا قالدىردى

سوچي. قازاقپارات - رەسەيدىڭ سوچي قالاسىنا ۇشىپ كەلگەن قازاقستاندىق ءانشى ديماش قۇدايبەرگەندى جانكۇيەرلەرى اۋەجايدان گۇلدەرمەن جانە دۋ قول شاپالاقپەن قارسى الدى، دەپ حابارلايدى قازاقپارات.

ءانشىنىڭ Instagram-داعى فان-اككاۋنتى اۋەجايعا رەسەيلىك، قىتايلىق، ءتىپتى امەريكالىق جانكۇيەرلەر جينالعانىن جازدى. «بارلىعى ەرتەڭگى كونسەرتتى تاعاتسىزدانا كۇتەدى»، - دەلىنگەن وندا.

فوتو جانە ۆيدەوكادرلاردان جينالعان جۇرت قازاقستاندىق ءارتىستى گۇلدەردىڭ استىندا قالدىرعانىن كورۋگە بولادى. ءبىر شوق گۇلىن تارتۋ ەتكەن فاناتتاردىڭ ءبىرى ولاردى ءوزىنىڭ باعىندا وسىرگەنىن ايتىپ ءوتتى.

ايتا كەتەيىك، 18 -قازان كۇنى سوچي قالاسىندا WOW- ارەنا جاڭا كونسەرتتىك، ويىن-ساۋىق الاڭى اشىلادى. ديماش قۇدايبەرگەن نىساننىڭ اشىلۋ سالتاناتىنا وراي جەكە كونسەرتىن وتكىزەدى. ال 19 -قازاندا مۇندا ارالاس جەكپە-جەكتەن Fight Nights Global-دىڭ تيتۋلدىق ايقاسى وتەدى. الاڭدا الي باگاۋتينوۆ پەن جالعاس جۇماعۇلوۆ كۇش سىناسادى.

«بۇل الاڭ ءتۇرلى كونسەرتتىك، سپورتتىق شارالاردىڭ وتكىزىلۋىنە ارنالعان. مۇندا ارنايى قوناق رەتىندە شاقىرىلىپ وتىرمىن. 18 -قازان كۇنى كونسەرتكە كەلىڭىزدەر»، - دەدى ءانشى ارنايى تۇسىرىلگەن ۆيدەودا.

ايتا كەتەيىك، د. قۇدايبەرگەن قاراشا ايىندا جاپونيا استاناسى توكيودا وتەتىن ABU TV Song فەستيۆالىندە ونەر كورسەتەدى. سونداي-اق ق ر مادەنيەت جانە سپورت مينيسترلىگىنىڭ ۇيىمداستىرۋىمەن 10 -جەلتوقساندا نيۋ-يوركتە (ا ق ش) «Arnau tour ENVOY» جەكە كونسەرتىن بەرەدى. تاياۋدا كونسەرتتىڭ پروموروليگى جاريالاندى.

اۆتور: ميرا تولەندى قىزى