شەتەل اۋە كومپانيالارىنىڭ قازاقستانعا جاڭا رەيستەرى ارتا ما؟

نۇر-سۇلتان. قازاقپارات - ءبىرقاتار شەتەلدىك اۋە كومپانيالارى قازاقستانعا جاڭا رەيستەردى اشۋعا قىزىعۋشىلىق تانىتىپ وتىر.

بۇل تۋرالى «قازاقپارات» اگەنتتىگىنە ق ر ي ي د م ازاماتتىق اۆياتسيا كوميتەتىنەن ءمالىم ەتتى، دەپ حابارلايدى قازاقپارات ءتىلشىسى.

«ق ر يندۋستريا جانە ينفراقۇرىلىمدىق دامۋ مينيسترلىگى ازاماتتىق اۆياتسيا كوميتەتى تاراپىنان قازاقستانعا اۋە ساپارلارىن ورىنداۋ ءۇشىن شەتەلدىك جاڭا اۋە كومپانيالارىن تارتۋ بويىنشا جۇمىستار تۇراقتى نەگىزدە جۇرگىزىلۋدە. جىل سايىن قازاقستاننىڭ وزگە مەملەكەتتەرمەن اۋە بايلانىسىن كەڭەيتۋ تۇرعىسىندا اۆياتسيالىق بيلىك وكىلدەرىمەن كوپتەگەن كەزدەسۋلەر وتكىزىلەدى. قازىرگى ۋاقىتتا ەلىمىزگە جاڭا رەيستەردى اشۋعا جانە ولاردى كەڭەيتۋگە نيەت بىلدىرگەن ءبىرقاتار شەتەل اۋە كومپانيالارى بار»، - دەلىنگەن ۆەدومستۆو مالىمەتىندە.

اتاپ ايتقاندا، الداعى جىلدارى دوحا (QatarAirways, 2020 -جىلى)، شانحاي (ChinaEastern, 2021 -جىلى) ، دۋباي (Emirates, 2021 -جىلى)، تەل-اۆيۆ (SCAT، 2020 -جىلى)، سينگاپۋر (2020 -جىلى)، نيۋ-يورك (2023 -جىلى) باعىتتارىندا رەيستەردى اشۋ جوسپارلانعان. سونىمەن قاتار، ۆارشاۆاعا رەيستەر (LOTPolishAirlines, 2020 -جىلى) سانىن ارتتىرۋ كوزدەلگەن.