ۇكىمەت باعانىڭ ءوسۋىن باقىلاۋدا ۇستاپ وتىر - ءاليحان سمايىلوۆ

نۇر-سۇلتان. قازاقپارات – ق ر ۇكىمەتى الەۋمەتتىك ماڭىزى بار ازىق- تۇلىك باعاسىنىڭ ءوسۋى سەبەپتەرىن زەردەلەپ جاتىر.

بۇل تۋرالى سەناتتىڭ جالپى وتىرىسىندا پرەمەر- ءمينيستردىڭ ءبىرىنشى ورىنباسارى - قارجى ءمينيسترى ءاليحان سمايىلوۆ ءمالىم ەتتى، دەپ حابارلايدى قازاقپارات ءتىلشىسى.

«شىنىمەن دە ينفلياتسيا ماسەلەسى ماڭىزدى، سەبەبى حالىقتىڭ ءومىر ءسۇرۋ دەڭگەيىنە، ناقتى اقشالاي تابىسقا تىكەلەي اسەر ەتەدى. سوندىقتان بۇل ماسەلە ۇكىمەتتىڭ تۇراقتى باقىلاۋىندا. ءبىز وسى تاقىرىپتى اي سايىن جەرگىلىكتى اتقارۋ ورگانداردىڭ قاتىسۋىمەن قاراستىرامىز. ينفلياتسياعا توقتالاتىن بولساق، بۇگىندە جىلدىق ينفلياتسيا بەلگىلەنگەن دالىزدە تۇر جانە 5,3 پايىزدى قۇرادى. جىل سوڭىنا دەيىن وسى دالىزدە ساقتالادى دەپ ويلايمىز. ياعني، 5,3-5,5 پايىز دەڭگەيىندە قالۋى مۇمكىن»، - دەدى ءا. سمايىلوۆ سەناتورلار ساۋالىنا جاۋاپ بەرە وتىرىپ.

وسى ورايدا ول ۇكىمەت ازىق- تۇلىك باعاسىنىڭ ءوسۋى ماسەلەسىن تۇراقتى تۇردە زەردەلەپ وتىرعانىن اتاپ ءوتتى.

«الەۋمەتتىك ماڭىزى بار ازىق- تۇلىككە باعانىڭ ءوسۋى ماسەلەسىن سەلەكتورلىق رەجىمدە تۇراقتى تۇردە قاراستىرامىز. بۇل تۇرعىدا باعانىڭ وسۋىنە ىقپال ەتكەن فاكتورلارعا تالداۋ جاسالىپ، ءتيىستى قاجەتتى شارالاردى قابىلدايمىز»، - دەدى ۇكىمەت باسشىسىنىڭ ءبىرىنشى ورىنباسارى.

اۆتور: رۋسلان عابباسوۆ