داستان ورازبەكوۆ: «توپجارعان» - تالانتتىلاردىڭ تالاسقا ءتۇسىپ، تانىلاتىن الاڭى
نۇر- سۇلتان. قازاقپارات - تالانتتىلاردىڭ توبىن قۇرعان «Topjargan» جوباسىنىڭ ەكىنشى ماۋسىمىن «حابار» تەلەارناسىنان ءار سەنبى سايىن، ساعات 19.20 دا تاماشالاي الاسىزدار، دەپ حابارلايدى قازاقپارات.
«حابار» اگەنتتىگىنىڭ ەڭ اۋقىمدى جوبالارىنىڭ ءبىرى، ءبىرىنشى ماۋسىمى كوپتىڭ كوڭىلىنەن شىققان «Topjargan» مۋزىكالىق جوباسىنىڭ كەزەكتى شىعارىلىمىن جىبەرىپ الماڭىزدار. ەلىمىزدىڭ تۇكپىر- تۇكپىرىندەگى تالانتتى جاستاردىڭ باعىن اشاتىن مۋزىكالىق شوۋىن - «حابار» ارناسىنان، سونداي-اق، YouTube جەلىسىندەگى حابارshow ارناسىنان live رەجىمىندە، ءار سەنبى سايىن ساعات 19.20 دا تاماشالاي الاسىزدار.
جوبا قاتىسۋشىلارىنىڭ دەنى تالعامى مەن تالانتى باسىم تۇسكەن جاندار دەپ اعىنان جارىلدى، تورەشىلەر تىزگىنىندەگى ەسترادا ءانشىسى داستان ورازبەكوۆ.
«قاتىسۋشىلارىمىزدىڭ دەڭگەيى قۋانتاتىن جاعداي. كوبىندە زاماناۋي اندەرگە توقتالىپ جاتقانى قۋانتادى. «Topjargan» جوباسى - تالانتتى انشىلەردىڭ الاڭىنا اينالا ءبىلدى، ءبىرتالاي ءوزىن ءوزى كورسەتە الماي جۇرگەن، تانىتا الماي جۇرگەن انشىلەرىمىگە مۇمكىندىك سىيلاي ءبىلدى. ناقتىراق ايتسام، «Topjargan» - تالانتتىلاردىڭ تالاسقا ءتۇسىپ، تانىلاتىن الاڭى. مەن ءۇشىن ەڭ قيىنى - بىرەۋدىڭ تاعدىرىن ءبىر جاققا قاراي بۇرىپ، اقاۋىن بەتىنە ايتۋ. ءبىراق ءبىز سول ءۇشىن دە تورەشىمىز. ونى سەسكەنىپ، ەگەر ۇيالشاقتاپ، اياۋشىلىق تانىتساق - ەركەلىكپەن تاماقتاندىراتىن سياقتىمىز. سول سەبەپتى ادىلەتتىلىكتى الدىعا قويىپ، دۇرىس تاڭداۋ جاساۋعا تىرىسىپ باعامىن»، - دەدى ءانشى داستان ورازبەكوۆ.
بيىلعى جىلعى «توپجارعان» مۋزىكالىق بايگەسىنە شەت ەلدىك انشىلەر دە قاتىسىپ، باعىن سىناۋدا. ەسەسىنە، تارتىستىڭ كورىگى قانىعىراق، جۇلدەنىڭ ءيىسى انىعىراق بولاتىنى ءسوزسىز. اسىعى الشىسىنان ءتۇسسىن دەيتىن، جەڭىمپاز تۇعىرىندا تۇرسىن دەيتىن ءوز تاڭداۋىڭىزدى جاساعىڭىز كەلسە - ءار سەنبى سايىن «حابار» ارناسىنان كورىگى قىزعان كونكۋرستى تاماشالاڭىز.
ايتا كەتەيىك، «Topjargan» مۋزىكالىق شوۋىنا قاتىسۋشىلار جەڭىمپاز اتانۋ ءۇشىن ءوزارا سايىسقا تۇسەدى. ءار كەزەڭدە وزا شاپقان ءتورت قاتىسۋشى مارتەبەلى ورىنعا جايعاسادى جانە ءوز بيىگىنەن تومەندەمەۋ ءۇشىن بار ونەرىن پاش ەتەدى. ال سوڭعى كەزەڭگە جەتكەن قاتىسۋشىلاردىڭ ونەرىن كورەرمەن داۋىس بەرۋ ارقىلى باعالاي الادى.
«Topjargan» مۋزىكالىق شوۋىن - «حابار» ارناسىنان، سونداي-اق، YouTube جەلىسىندەگى حابارshow ارناسىنان live رەجىمىندە، ءار سەنبى سايىن ساعات 19.20 دا تاماشالاي الاسىزدار.