ەلوردادا قازاقتىڭ تانىمال كومپوزيتورلاردىڭ ءان كەشى ءوتتى
«بۇل كونسەرت وسىمەن ءۇشىنشى جىل ءوتىپ جاتىر. بيىلعى كونسەرتتىڭ ەرەكشەلىگى سول، كەش سيمفونيالىق وركەستردىڭ سۇيەمەلدەۋىمەن ءوتىپ جاتىر. بىزدە جىل سايىن جاس انشىلەر اراسىندا تىڭداۋ بايقاۋى ءوتىپ تۇرادى، ودان وتكەن ارتىستەردى قاتارىمىزعا قابىلداپ، ولار ءوز ونەر قورجىندارىن ۇمىتىلىپ بارا جاتقان اندەرمەن تولىقتىرىپ وتىرادى»، - دەدى نۇر-سۇلتان قالاسى مەملەكەتتىك اكادەميالىق فيلارمونياسىنىڭ كلاسسيكا جانە ۆوكال ءبولىمىنىڭ كوركەمدىك جەتەكشىسى، مادەنيەت سالاسىنىڭ ۇزدىگى ارايلىم راحىم قىزى.
ونىڭ ايتۋىنشا، ايتۋلى كەشكە 20 ءانشى 20 ۇمىتىلىپ بارا جاتقان اندەردى ورىنداعان.
«بىزدە جوسپار بويىنشا جىل بويى بەرەتىن كونسەرتتەردىڭ ءتىزىمى بار. بۇگىنگى كونسەرت سونىڭ ءبىرى، ياعني افيشالىق كونسەرتتەر قاتارىنا جاتادى. ءبىر جىلدا ءبىز 40 قالالىق جانە رەسپۋبليكالىق دەڭگەيدە افيشالىق كونسەرت بەرەمىز، ودان بولەك جاناما كونسەرتتەر بار. سونداي-اق، الداعى قاراشا ايىندا «كەزدەر-اي» اتتى رەترو كونسەرت وتەدى، ودان بولەك 11 -جەلتوقساندا اۋىل، تۋعان جەر تاقىرىبىنا ارنالعان كونسەرت ۇيىمداستىرماقپىز. جانە 23 -جەلتوقساندا جىلدى قورىتىندىلاپ «جاڭا جىلعا جاڭا ءان» اتتى كەش كونسەرتىن وتكىزگەلى جاتىرمىز»، - دەدى ول.
فيلارمونيا وكىلىنىڭ سوزىنە قاراعاندا، بۇگىنگى كونسەرت سيمفونيالىق وركەستردىڭ سۇيەمەلدەۋىمەن جاندى داۋىستا وتكەن.
«وسىنداي كونسەرتتەر ءجيى ۇيىمداستىرىلۋى كەرەك. حالىق ەسكى اندەردى ساعىنادى. سەبەبى قازىر جەڭىل اندەر وتە كوپ. بىزگە كونسەرتكە شاقىرسا قۋانا- قۋانا كەلەمىز. بۇگىنگى كونسەرتتە كومپوزيتور تەمىرجان بازاربايەۆتىڭ «تاماشا» ءانىن ورىندايمىن»، - دەدى ق ر ەڭبەگى سىڭگەن ءارتىس باعدات سامەدينوۆا.
ايتۋلى ءان كەشىندە ەلىمىزگە تانىمال ءابىلاحات ەسبايەۆ، سىدىق مۇحامەدجانوۆ جانە تەمىرجان بازاربايەۆ سەكىلدى كومپوزيتورلاردىڭ اندەرى ورىندالدى. ال اندەردى ورىنداعان ساحنا جۇلدىزدارى قاتارىندا نۇرجامال ۇسەنبايەۆا، باعدات سامەدينوۆا، التىناي جورابايەۆا، ايگۇل قوسانوۆا، ەستاي مۇقاشەۆ، ديانا ماي جانە تاعى باسقا ونەر مايتالماندارى بولدى.
اۆتور: ءالي يبرايەۆ