تۇركىستاندا رۋحاني كەلىسىم كۇنى اتالىپ ءوتتى
ەل بىرلىگىن ناسيحاتتاعان جۇزدەسۋدى تۇركىستان وبلىسىنىڭ قوعامدىق دامۋ باسقارماسى ۇيىمداستىردى، دەپ حابارلايدى قازاقپارات ءتىلشىسى.
تۇركىستان تورىندە بوي كوتەرگەن 6 قاناتتى كيىز ۇيدە وبلىستاعى 6 ءدىني كونفەسسيا باسشىلارى جينالدى. كيىز ءۇيدىڭ ۋىقتارىن قاداۋعا كونفەسسيا وكىلدەرى دە اتسالىسقانىن ايتا كەتكەن ءجون. كەزدەسۋدى وبلىس اكىمىنىڭ ورىنباسارى ساكەن قالقامانوۆ اشىپ، جۇرگىزىپ وتىردى. ول ءدىني كونفەسسيا جەتەكشىلەرىمەن تانىسىپ، ءدىن سالاسى بويىنشا پىكىر الماستى. ەل بىرلىگى مەن ءدىنارالىق قارىم- قاتىناستاردى نىعايتۋ ماسەلەلەرىن تالقىلادى.
«قازاق حالقى ءاردايىم بەيبىتشىلىكتى، تاتۋلىقتى جوعارى باعالاعان. وزگەلەردەن كومەگىن اياماعان. ادالدىقتى، مەيىرىمدى جوعارى قويعان. وسى يگى قاسيەت قازىر دە ۇلتىمىزدىڭ بويىنان وشكەن جوق. ەلباسىمىز نۇرسۇلتان ءابىش ۇلى نازاربايەۆتىڭ سىندارلى ساياساتىنىڭ ارقاسىندا بەيبىتشىلىك پەن دوستىقتى نىعايتۋدىڭ جاراسىمدى ۇلگىسى قالاندى. قازاقستاندا الەمدىك دىندەر كوشباسشىلارى سەزدەرىنىڭ تۇراقتى ءوتۋى سونىڭ ايعاعى. تۇركىستان وبلىسىندا دا ءتۇرلى كونفەسسيا وكىلدەرى تاتۋ- ءتاتتى ءومىر ءسۇرىپ كەلەدى. كەزىندە ورتا ازيانىڭ ءدىني ءارى رۋحاني ورتالىعى بولعان تۇركىستان قالاسى ەلدى بىرلىككە شاقىراتىن ميسسياسىن جالعاستىرا بەرەدى» ، - دەدى س. قالقامانوۆ.
كەزدەسۋ بارىسىندا قازاقستان مۇسىلماندارى ءدىني باسقارماسىنىڭ تۇركىستان وبلىسى بويىنشا وكىل يمامى اقتامبەردى مۇسابەك، «شىمكەنت ەپارحياسىنىڭ تۇركىستان قالاسىنداعى سۆياتو- نيكولسكيي پريحودى» جەرگىلىكتى ءدىني بىرلەستىگىنىڭ جەتەكشىسى ۆيتالي سموليانوۆ جانە باسقا دا ءدىن وكىلدەرى ءسوز سويلەدى.
ارنايى كيىز ۇيدە قازاقتىڭ ۇلتتىق تاعامدارى مەن سالت- ءداستۇرى ناسيحاتتالىپ قانا قويماي، وڭىردەگى ەتنوس وكىلدەرىنىڭ دە ءدامدى تاعامدارى جۇرتشىلىققا ۇسىنىلدى. قابىلداۋ سوڭىندا ءدىني كونفەسسيا جەتەكشىلەرىنە مەرەكەگە وراي العىس حاتتار مەن سىيلىقتار تاپسىرىلدى.
1992 -جىلعى 18 - قازان كۇنى الماتى قالاسىندا بۇكىلالەمدىك رۋحاني كەلىسىم كونگرەسىنىڭ 1- سەسسياسى ءوتتى. كونگرەسكە قاتىسۋشىلار قازاننىڭ 18ءىن رۋحاني كەلىسىم كۇنى - قاقتىعىستار مەن جانجالدارعا شەكتەۋ قويۋ، تاتۋلىققا تالپىنۋ، جاقىن ادامدارعا قايىرىمدىلىق پەن جاردەم جاساۋ كۇنى دەپ جاريالاۋعا شاقىرعان مانيفەست قابىلدادى.
