قازاقستاندا قاتەرلى ىسىكتىڭ الدىن الۋ ءۇشىن بالالارعا تەگىن ەكپە سالىنادى

نۇر-سۇلتان. قازاقپارات – ق ر دەنساۋلىق ساقتاۋ مينيسترلىگىنىڭ باس ونكولوگ-دارىگەرى، قازاق ۇلتتىق ونكولوگيا جانە راديولوگيا ينستيتۋتىنىڭ ديرەكتورى ديليارا قايداروۆانىڭ ايتۋىنشا، اتا-انانىڭ رۇقساتىمەن بالالارعا جاتىر موينى قاتەرلى ىسىگىنە قارسى ۆاكسياناتسيا جۇرگىزىلەدى، دەپ حابارلايدى قازاقپارات ءتىلشىسى.

«وبىرمەن كۇرەستە مەديكتەر بيۋدجەتتەن قاراجاتتى كوبىرەك سۇراساق، كەي ساياساتكەرلەردىڭ تۇسىنبەي قالاتىنى بار. الايدا ونكولوگيالىق اۋرۋلاردىڭ ءۇشىنشى، ءتورتىنشى ساتىسىنداعى ناۋقاستاردى دا ەمدەۋ كەرەك. ول ءۇشىن قاراجات بولۋگە تۋرا كەلەدى. مىنە، سوندىقتان بۇگىنگى سامميتتىڭ تاڭەرتەڭگى ءبولىمى وبىرمەن كۇرەستەگى ساياسات پەن بيۋدجەتكە ارنالدى. ءدارى-دارمەك قىمبات. بۇگىن ۋرۋگۆاي ۇكىمەتىنىڭ وكىلدەرىمەن كەزدەسكەندە ولار دا ءدارى-دارمەكتى سىرتتان ساتىپ الاتىنىن ەستىدىك. ياعني، ونكولوگيالىق اۋرۋلاردى ناعىز ساپالى ءدارى-دارمەكپەن ەمدەۋ كەرەك. وسى سامميتتى پايدالانا وتىرىپ، دۇنيەجۇزىلىك دەنساۋلىق ساقتاۋ ۇيىمىنان، قاتەرلىك ىسىكتى زەرتتەۋ اگەنتتىگىنەن ءدارى-دارمەك باعاسىن ارزانداتۋدا كومەك سۇراپ وتىرمىز»، - دەدى ديليارا قايداروۆا ونكولوگياداعى دۇنيەجۇزىلىك كوشباسشىلار سامميتىندە تىلشىلەرگە بەرگەن سۇحباتىندا.

ونىڭ ايتۋىنشا، ءار ەلدە وبىرعا قارسى ءدارى-دارمەكتىڭ باعاسى ءارتۇرلى. ءبارى تاسىمالداۋشىعا بايلانىستى.

«قازىر ءوزىنىڭ تيىمدىلىگىن دالەلدەگەن سكرينينگتىڭ ءۇش ءتۇرىن قالدىردىق. 2018 -جىلى جاتىر موينىنىڭ قاتەرلى ىسىگى بويىنشا سكرينينگتەن ءوتۋ جاسىن 30 عا دەيىن تۇسىردىك. وسىدان كەيىن ءارتۇرلى جاستاعى ايەلدەر كەلە باستادى. ولار تەگىن تەكسەرىستەن وتە الادى. تەكسەرىلگىسى كەلەتىن ايەلدەردىڭ سانى 1 ميلليونعا جەتىپ جىعىلعاننان كەيىن مەملەكەت بۇل باعىتتا تاعى دا بيۋدجەتتەن قارجى ءبولدى. دۇنيەجۇزىلىك دەنساۋلىق ساقتاۋ ۇيىمى جاتىر موينى قاتەرلى ىسىگىن ۆاكسيناتسيا ارقىلى الدىن الۋعا بولاتىن دەرتتەر قاتارىنا جاتقىزادى. ءبىز جاس قىز بالالارعا اتا- انانىڭ رۇقساتىمەن جاتىر موينى قاتەرلى ىسىگى ۆاكسيناتسياسىن تەگىن ەگۋدى ۇسىنباقپىز. ياعني، اتا- انا رۇقسات بەرسە، بالاسىنا تەگىن ۆاكسيناتسيا جاسايمىز»، - دەدى ول.

ديليارا قايداروۆانىڭ ايتۋىنشا، ءدال وسىنداي ۆاكسيناتسيانىڭ ارقاسىندا اۆستراليا مەملەكەتى جاتىر موينى قاتەرلى ىسىگىنە شالدىعۋ دەڭگەيىن ەداۋىر ازايتقان.

ەسكە سالا كەتسەك، كەشە ەلوردادا ونكولوگياداعى دۇنيەجۇزىلىك كوشباسشىلار سامميتىنىڭ جۇمىسى باستالعان بولاتىن. فورۋم جۇمىسىنا حالىقارالىق وبىرعا قارسى وداق (UICC) پرەزيدەنتى، جوعارى مارتەبەلى حانشايىم دينا مايرەد، قازاقستان دەنساۋلىق ساقتاۋ ءمينيسترى ەلجان ءبىرتانوۆ قاتىسۋدا.

ەلباسى نۇرسۇلتان نازاربايەۆ بۇگىن ونكولوگياداعى دۇنيەجۇزىلىك كوشباسشىلار سامميتىنىڭ قاتىسۋشىلارىنا قۇتتىقتاۋ حات جولدادى .

اۆتور: ايان بەكەن ۇلى