ساپاربايەۆ قازاقستاندا قاتەرلى ىسىك اۋرۋلارمەن كۇرەس قالاي جۇرگىزىلىپ جاتقانىن ايتتى

None
None
نۇر-سۇلتان. قازاقپارات - ۇكىمەت باسشىسىنىڭ ورىنباسارى بەردىبەك ساپاربايەۆتىڭ ايتۋىنشا، قازاقستاندا 182 مىڭ ادام ونكولوگيالىق اۋرۋلارعا شالدىققان، دەپ حابارلايدى قازاقپارات ءتىلشىسى.

«ءبىزدىڭ ەلدىڭ پرەزيدەنتى مەن ۇكىمەتتىڭ كۇش سالۋىمەن قازاقستاندا ونكولوگيالىق اۋرۋلاردى ازايتۋ، دەرتتى ەرتەرەك انىقتاۋ باعىتىندا كەشەنشى شارالار قولعا الىنعان. قازىرگى تاڭدا قازاقستاندا ونكولوگيالىق اۋرۋلارعا شالدىققان ادامداردىڭ سانى - 182 مىڭ. ونىڭ 36 مىڭى قاتەرلى ىسىككە شالدىققان. ونكولوگيالىق اۋرۋلاردان كەلەتىن ءولىم-ءجىتىم سانىن ازايتۋ ءۇشىن بارىنشا ءتيىستى شارالار قولعا الىنعانىن ايتا كەتكىم كەلەدى. تەك سوڭعى جىلى ءولىم- ءجىتىمنىڭ 5 پايىزى وسى اۋرۋلاردان كەلگەن. بۇل رەتتە ءتيىمدى شارالاردىڭ ءبىرى - دياگنوستيكا ەكەنىن بىلەسىزدەر. ياعني، اۋرۋدىڭ الدىن الا انىقتاۋدىڭ ماڭىزى وتە زور. سوڭعى ۋاقىتتا بىزدە اۋرۋدى الدىن الا انىقتاۋ دەڭگەيى 28 پايىزعا كوتەرىلدى»، - دەدى بەردىبەك ساپاربايەۆ.

پرەمەر-ءمينيستردىڭ ورىنباسارىنىڭ ايتۋىنا قاراعاندا، قازاقستاندا ونكولوگيالىق اۋرۋلاردى ازايتۋ، الدىن الا دياگنوستيكالاۋ جۇمىسىمەن ارنايى عىلىمي- زەرتتەۋ ينستيتۋتى، ۇلتتىق ونكولوگيا جانە ترانسپونتولوگيا ورتالىعى مەن ايماقتارداعى 16 ونكولوگيالىق ديسپانسەر جۇمىس جۇرگىزەدى.

«قازاقستاندا سكرينينگتى زەرتتەۋ تۇراقتى تۇردە وتەدى. ەلىمىزدە ونكولوگيالىق اۋرۋلارمەن كۇرەستىڭ 2018-2022 -جىلدارعا ارنالعان كەشەندى جوسپارى قولعا الىنعان. بۇل كەشەندى جوسپاردىڭ نەگىزگى ماقساتى - اۋرۋدىڭ الدىن الۋ، دياگنوستيكا، بۇل سالاداعى كادرلاردى دايارلاۋ جانە قايتا دايارلاۋ. بۇل جوسپاردى ورىنداۋ ءۇشىن ەل بيۋدجەتىنەن 35 ميلليارد تەڭگە، سونىمەن بىرگە، ونكولوگيالىق اۋرۋلاردى ءدارى- دارمەكپەن قامتاماسىز ەتۋگە 12 ميلليارد تەڭگە قاراستىرىلعان. ياعني، بۇل باعىتتا جۇمسالعان قاراجات سوڭعى جىلدارى 5 ەسەگە ۇلعايدى»، - دەدى ول.

ەسكە سالا كەتسەك، ەلوردادا كەشە ونكولوگياداعى دۇنيەجۇزىلىك كوشباسشىلار ءسامميتىنىڭ جۇمىسى باستالعان بولاتىن. فورۋم جۇمىسىنا حالىقارالىق وبىرعا قارسى وداق (UICC) پرەزيدەنتى، جوعارى مارتەبەلى حانشايىم دينا مايرەد، قازاقستان دەنساۋلىق ساقتاۋ ءمينيسترى ەلجان ءبىرتانوۆ قاتىسۋدا.

ەلباسى نۇرسۇلتان نازاربايەۆ بۇگىن ونكولوگياداعى دۇنيەجۇزىلىك كوشباسشىلار سامميتىنىڭ قاتىسۋشىلارىنا قۇتتىقتاۋ حات جولدادى.

اۆتور: ايان بەكەن ۇلى

سوڭعى جاڭالىقتار