ەلباسى: حالىق دەنساۋلىعى - ورنىقتى دامۋ مەن باقۋاتتىلىق نەگىزى

نۇر-سۇلتان. قازاقپارات - ەلباسى نۇرسۇلتان نازاربايەۆ ەلوردادا ءوتىپ جاتقان ونكولوگياداعى دۇنيەجۇزىلىك كوشباسشىلار سامميتىنىڭ قاتىسۋشىلارىنا قۇتتىقتاۋ حات جولدادى، دەپ حابارلايدى قازاقپارات ءتىلشىسى.

ەلباسىنىڭ قۇتتىقتاۋىن سامميت بارىسىندا ۇكىمەت باسشىسىنىڭ ورىنباسارى بەردىبەك ساپاربايەۆ وقىپ بەردى.

«قازاقستان استاناسىندا ءوتىپ جاتقان وبىرمەن كۇرەس كوشباسشىلارىنىڭ دۇنيەجۇزىلىك سامميتىندە سىزدەرگە زور ءىلتيپاتىمدى بىلدىرەمىن. قاشاندا ادامنىڭ ەڭ باستى بايلىعى - ونىڭ دەنساۋلىعى. بىراق قورشاعان ورتا احۋالىنىڭ ناشارلاۋى، از قوزعالۋدىڭ ءومىر سالتىنا اينالۋى، دۇرىس تاماقتانباۋ سوزىلمالى دەرتتەردىڭ، سونىڭ ىشىندە ونكولوگيالىق اۋرۋلاردىڭ كوبەيۋىنە اكەپ سوقتىردى. قازاقستان بۇل جاھاندىق ۇردىستەرگە بەلسەنە ءۇن قوسىپ كەلەدى»، - دەلىنگەن ەلباسىنىڭ قۇتتىقتاۋىندا.

نۇرسۇلتان نازاربايەۆ 2018 -جىلى قازاقستاندا ونكولوگيالىق اۋرۋلارمەن كۇرەستىڭ 2022 -جىلعا دەيىگى كەشەندى جوسپارى بەكىتىلگەنىن اتاپ ءوتتى.

«بيىل ونكولوگيا ۇلتتىق ورتالىعىنىڭ قۇرىلىسى باستالدى، وندا وبىردى دياگنوستيكالاۋ مەن ەمدەۋدىڭ ەڭ وزىق تەحنولوگيالارىن قولدانۋ جوسپارلانىپ وتىر. الايدا ونكولوگيالىق اۋرۋ ەرتەرەك انىقتالسا، ونى ەمدەۋ وڭايىراق بولادى. بۇل رەتتە اۋرۋدى ەرتەرەك انىقتاۋدىڭ اسا ماڭىزدى كەزەڭى - العاشقى مەديتسينالىق- سانيتارلىق كومەك. وسىدان تۋرا ءبىر جىل بۇرىن الەمنىڭ 194 ەلى دۇنيەجۇزىلىك دەنساۋلىق ساقتاۋ ۇيىمىنىڭ العاشقى مەديتسينالىق- سانيتارلىق كومەك جونىندەگى استانا دەكلاراتسياسىن ءبىراۋىزدان قابىلدادى. استانا دەكلاراتسياسى مەديتسينالىق قىزمەتپەن جاپپاي قامتۋعا، ادام دەنساۋلىعىن ساقتاۋعا قول جەتكىزۋ ۋشىن الەمدىك قوعامداستىق كوشباسشىلارىن العاشقى مەديتسينالىق- سانيتارلىق كومەكتىڭ ءرولىن كۇشەيتۋگە ۇندەدى. دامىعان العاشقى مەديتسينالىق- سانيتارلىق كومەك كوپتەگەن اۋرۋدىڭ، ونىڭ ىشىندە وبىردىڭ ساپالى پروفيلاكتيكاسىنا، دەرتتى ەرتە انىقتاۋعا، ءتيىمدى ەمدەۋگە سەپتىگىن تيگىزەدى».

ەلباسى قازاقستان ءۇشىن حالىق دەنساۋلىعى - ورنىقتى دامۋ مەن باقۋاتتىلىق نەگىزى ەكەنىن اتاپ ءوتتى.

«سامميتكە بەلسەنە اتسالىسقاندارىڭىز ءۇشىن بارشاڭىزعا العىس ايتىپ، تابىس تىلەيمىن، جۇمىستارىڭىز جەمىستى بولسىن!» - دەپ تۇيىندەگەن نۇرسۇلتان نازاربايەۆ قۇتتتىقتاۋىندا.

ەسكە سالا كەتسەك، ەلوردادا كەشە ونكولوگياداعى دۇنيەجۇزىلىك كوشباسشىلار سامميتىنىڭ جۇمىسى باستالعان بولاتىن. فورۋم جۇمىسىنا حالىقارالىق وبىرعا قارسى وداق (UICC) پرەزيدەنتى، جوعارى مارتەبەلى حانشايىم دينا مايرەد، قازاقستان دەنساۋلىق ساقتاۋ ءمينيسترى ەلجان ءبىرتانوۆ قاتىسۋدا.

اۆتور: ايان بەكەن ۇلى