قازاقستاندىق ءۇش فيلم تاجىكستاندا كورسەتىلەدى

الماتى. قازاقپارات - قازاقستاندىق ءۇش فيلم تاجىكستاندا كورسەتىلەدى، دەپ حابارلايدى قازاقپارات «قازاق فيلمگە» سىلتەمە جاساپ.

دۋشانبە قالاسىندا 16-20 -قازان ارالىعىندا تاجىك كينوسىنىڭ كۇنىنە وراي دەرەكتى فيلمدەرگە ارنالعان «ديدور» حالىقارالىق كينوفەستيۆالى وتەدى. بۇل بايقاۋدىڭ حالىقارالىق كونكۋرستىق باعدارلاماسىندا رەجيسسەر ۆلاديمير تيۋلكين تۇسىرگەن «13 شاقىرىم» دەرەكتى فيلمى كورسەتىلەدى.

اتالعان دەرەكتى فيلم سەرىك بودانبايەۆ ەسىمدى زاعيپ تۋرالى باياندايدى. قىستاۋدان ءوز اۋىلىنا قاراي بەت العان باستى كەيىپكەر ءوز ءومىرىنىڭ ەلەۋلى ساتتەرىن ەسكە الىپ، ءوز بويىنداعى قۇندىلىقتارىنىڭ سىرىن اشادى. كينوتۋىندىنى ق ر مادەنيەت جانە سپورت مينيسترلىگى تاپسىرىسى بويىنشا ش. ايمانوۆ اتىنداعى «قازاق فيلم» كينوستۋدياسى تۇسىرگەن.

«ديدور» كينوفەستيۆالىنىڭ كونكۋرستان تىس - الەمدىك اۆتورلىق دەرەكتى فيلمدەرگە ارنالعان باعدارلاماسى شەڭبەرىندە «قازاق فيلم» كينوستۋدياسى شىعارعان «اتا كاسىپ» (رەج. بەرىك جاحانوۆ) جانە «چۋۆاش حالقى. قازاقستان - مەنىڭ ەكىنشى وتانىم» (رەج. دينارا مانابايەۆا) اتتى دەرەكتى فيلمدەر كورسەتىلەدى.

اتالمىش كينوفەستيۆال تاجىكستان ۇكىمەتى جانە «تاجىكفيلم» مەملەكەتتىك ۇيىمىنىڭ قولداۋىمەن ۇيىمداستىرىلعان. جالپى كينوفەستيۆال (كوركەم جانە انيماتسيالىق بايقاۋى) دۋشانبە قالاسىندا 2004 -جىلدان باستاپ وتكىزىلەدى. بيىل ۇيىمداستىرىلعان دەرەكتى فيلمدەر فەستيۆالى العاش رەت وتكىزىلمەك.

ۇيىمداستىرۋشىلاردىڭ ايتۋىنا قاراعاندا بيىل فەستيۆالگە قاتىسۋعا 200 گە جۋىق فيلم ءۇمىت بىلدىرگەن. ناتيجەسىندە بايقاۋدىڭ ىرىكتەۋ كوميسسياسى 15 ەلدەن 57 دەرەكتى ءفيلمدى تاڭداپ العان.