اقساقالوۆ جۇمىسىن اقساتقان اۋدان اكىمدەرىن جازاعا تارتۋدى ۇسىندى
جارتى جىلدىقتىڭ قورىتىندىسى بويىنشا ءۇش اۋدان اكىمى سوگىس العان بولاتىن، دەپ حابارلايدى قازاقپارات ءتىلشىسى.
س ق و اكىمى باسپا ءسوز قىزمەتىنىڭ مالىمەتىنشە، ءوڭىردىڭ 9 ايداعى الەۋمەتتىك- ەكونوميكالىق دامۋ كورسەتكىشتەرىنىڭ قورىتىندىلارى تالقىلانعان اكىمدىك وتىرىسى ءوتتى. اۋىل شارۋاشىلىعىندا ءوسىم بار، مال ءونىمى پايىز103,2 ارتقان. بورداقىلاۋ الاڭدارى جانە ەكسپورتقا باعىتتالعان ءسۇت فەرمالارى سالىنىپ جاتىر. الايدا قايتا وڭدەۋ سالاسىنا كوڭىل بولگەن ءجون. وبلىستىڭ كەي اۋداندارىندا بۇل جۇمىستار اقساپ جاتىر.
«اۋىل شارۋاشىلىعى ونىمدەرىن قايتا وڭدەۋ بىزدە ازىرشە دۇرىس دامىماعان. باسىم بولىگى شيكىزاتقا كەتەدى»، - دەدى س ق و اكىمى قۇمار اقساقالوۆ.
وبلىسقا وتكەن توعىز ايدا 152 ميلليارد تەڭگە ينۆەستيتسيا قۇيىلدى. جىل سوڭىنا دەيىن جالپى 240 ميلليارد تەڭگە تارتۋ كوزدەلگەن، ءوسىم 9 پايىز بولماق.
«جىل باسىندا 9 پايىزعا ارتتىرامىز دەگەن مەجەمىز بولدى. ءىس جۇزىندە ودان دا كوپ بولۋى قاجەت. ءبىر اپتا بۇرىن ارنايى ەكونوميكالىق ايماقتى قۇردىق. ول ءوز ناتيجەسىن بەرۋى ءتيىس. كوپسالالى، ءارى ەكسپورتقا جۇمىس ىستەيتىندەرگە كوپ جەڭىلدىكتەر قاراستىرىلعان. ءقازىردىڭ وزىندە بيزنەس وكىلدەرى تاراپىنان قىزىعۋشىلىق بار»، - دەدى ءوڭىر باسشىسى.
قۇرىلىس سالاسىندا جۇمىس كەرىسىنشە سىلبىر. جىل باسىنان 57,9 ميلليارد تەڭگەنىڭ جۇمىسى اتقارىلعان. بۇل وتكەن جىلدىڭ وسى مەرزىمىمەن سالىستىرعاندا 98,2 پايىز تومەن. كەي اۋداندار كورسەتكىشتەردى ورىنداماي وتىر.
«اقشا بولىنۋدە، ناتيجە جوق. ءبىرىنشى جارتى جىلدىقتىڭ قورىتىندىسى بويىنشا كورسەتكىشتەرگە قول جەتكىزبەگەن اۋدان اكىمدەرى سوگىس الدى. 9 اي بويىنشا دا اپپارات ءتيىستى ۇسىنىستاردى جاساسىن. قايتا جازا السا، «بۇل لاۋازىمىنا سايكەس ەمەس» دەگەندى بىلدىرەدى. بۇل جاعدايدا قىزمەتىنەن كەتۋ تۋرالى ارىزدى جازۋلارى ءتيىس. بۇل باسقارمالارعا دا قاتىستى»، - دەدى قۇمار اقساقالوۆ.
ەسكە سالا كەتەيىك، 6 ايدىڭ قورىتىندىسى بويىنشا الەۋمەتتىك- ەكونوميكالىق كورسەتكىشتەردى ورىنداماعان شال اقىن، جامبىل جانە مامليۋت اۋداندارىنىڭ اكىمدەرى سوگىس العان بولاتىن.
اۆتور: اقەركە داۋرەنبەك قىزى