الماتىدا قايىر سۇرايتىندارعا قارسى رەيد جۇرگىزىلەدى
باسپا ءسوز قىزمەتىنىڭ حابارلاۋىنشا، قايىر-ساداقا سۇرايتىندار قوعامدىق ورىندارداعىلاردىڭ مازاسىن الادى. وسى ماسەلەنىڭ الىن الۋ ءۇشىن «قايىرشى» جەدەل-پروفيلاكتيكالىق شاراسى وتكىزىلۋدە.
«ارنايى رەيد جۇرگىزەتىن توپ قۇرىلدى. ونىڭ قۇرامىندا پوليتسيا، پروكۋراتۋرا، جۇمىسپەن قامتۋ ورتالىعى مەن اكىمدىك وكىلدەرى بار. وتكەن ءبىر تاۋلىك ىشىندە قايىرشىلىقپەن اينالىسقان 63 ادامدى انىقتادىق. ونىڭ ىشىندە 7 كامەلەتكە تولماعان بالا بار. ق ر اكىمشىلىك قۇقىق بۇزۋشىلىق تۋرالى كودەكسىنىڭ 449-بابى بويىنشا 13 ادام اكىمشىلىك جاۋاپكەرشىلىككە تارتىلدى. پوليتسيا باسقارماسىنا جەتكىزىلگەن ادامدارعا ماماندار ءتۇسىندىرۋ جۇمىستارىن جۇرگىزدى. سونداي-اق، ولاردى تۇراقتى جۇمىسپەن قامتاماسىز ەتۋ ءۇشىن اۋداندىق جانە وبلىستىق جۇمىسپەن قامتۋ ورتالىقتارىنا اقپاراتتار جولداندى»، - دەدى الماتى قالالىق جەرگىلىكتى پوليتسيا باسقارماسىنىڭ باسشىسى تورەحان يسين.
اۆتور: الما مۇقانوۆا