بيىك وكشە كوپتەگەن اۋرۋلارعا سەبەپ

نۇر-سۇلتان. قازاقپارات - قىز-كەلىنشەكتەر بيىك وكشە كيگەندى ۇناتادى. بيىك وكشەلى اياق كيىمدەر ءجۇرىس-تۇرىستى ءساندى ەتكەنىمەن دەنساۋلىققا زالالىن كەلتىرەدى.

دارىگەرلەردىڭ ايتۋى بويىنشا، ادامنىڭ تابانى مەن ومىرتقاسى 23 جاسقا دەيىن ءوسىپ، جەتىلەدى. سوندىقتان ماماندار وسى جاسقا دەيىن بيىك وكشە مەن ءبىز وكشەلى اياق كيىمدى قولدانۋدا وتە اباي بولۋدى ۇسىنادى. وكشەسى بيىك جانە تار اياق كيىمدى كوپ كيگەندە اياقتىڭ الدىڭعى بولىگىنە كۇش ءتۇسىپ، باشپايلاردىڭ قيسايۋىنا الىپ كەلەدى.

بيىك وكشەنى جاقسى كورەتىندەردە پلانتارلىق فاستسيت ءجيى كەزدەسەدى، ول - تابان سۇيەگىنىڭ ۇلكەيۋى. جانە ۇنەمى كيىلەتىن بيىك وكشەنىڭ اسەرىنەن ۋاقىت وتە كەلە اياقتىڭ احيلل ءسىڭىرى ءوز قالىبىنان وزگەرىپ، جايتابان اياق كيىممەن ءجۇرۋ مۇمكىن ەمەس بولىپ قالادى. بۇل جاعداي تەك وتا جاساۋ ارقىلى عانا ەمدەلەدى.

سونىمەن قاتار، وكشە بيىكتەگەن سايىن ومىرتقاعا تۇسەتىن كۇش تە ارتا بەرەدى. بيىك (8 س م- دەن جوعارى) وكشەلى اياق كيىمدى ۇزاق ۋاقىت كيۋدىڭ اسەرىنەن ومىرتقاارالىق جارىق (ومىرتقا اراسىندا ەت ءوسۋ، گرىجا)، بەل اۋرۋلارى، بۋىنداردىڭ جىلجۋى، ءسىڭىر سوزىلۋ سياقتى اۋرۋلار ءجيى ۇشىرايدى. سكوليوز (ومىرتقانىڭ ءبىر بۇيىرگە قيسايۋى) بار ادامدارعا بيىك وكشە كيۋگە بولمايدى، قاۋىپتى.

سوندىقتان بيىك وكشە كيگەندە اياعىڭىز تالىپ، اۋىرا باستاسا، مۇنداي اياق كيىمدەردەن باس تارتقانىڭىز دۇرىس. ەگەر ءسىز كۇنى بويى بيىك وكشەلى اياق كيىممەن ءجۇرىپ، كەشكە نە ۇيىقتار الدىندا اياعىڭىزدىڭ ءسىڭىرى تارتىلىپ (سيرەك ءارى ءجاي عانا بولسا دا)، ءىسىپ، اۋىرسىنۋلار بولسا، ۆاريكوزدىڭ (اياق قان تامىرلارىنىڭ كەڭەيۋى) العاشقى بەلگىلەرى بولۋى مۇمكىن. باستى بايلىق - دەنساۋلىعىڭىزدى ءوز قولىڭىزبەن قۇرتىپ الماڭىز.