نۇرسۇلتان نازاربايەۆ ازەربايجان پرەزيدەنتىمەن كەزدەستى
بۇل تۋرالى قازاقپارات ەلباسىنىڭ باسپا ءسوز قىزمەتىنە سىلتەمە جاساپ حابارلايدى.
كەزدەسۋ بارىسىندا ەلباسى ەكى ەل قاتىناستارىنىڭ دامۋىنداعى وڭ ديناميكانى اتاپ ءوتتى.
«بۇل مەنىڭ قازاقستاننىڭ تۇڭعىش پرەزيدەنتى مارتەبەسىندە سىزدەرگە العاش كەلۋىم. ەلىمىزدە ەكونوميكالىق دامۋ باعدارلامالارىن جۇزەگە اسىرۋ جانە تاۋەلسىزدىكتى نىعايتۋ جۇمىستارى جالعاسۋدا. ءبىزدىڭ قارىم-قاتىناسىمىز قارقىندى دامىپ جاتىر. قازىر بىزدە ىنتىماقتاستىقتى كەڭەيتۋ ءۇشىن ءبىراز مۇمكىندىك بار. ساۋدا كولەمىن ارتتىرۋ ماڭىزدى. ءبىز ءتيىستى لوگيستيكانى قۇردىق. ەرتەڭ تۇركى كەڭەسىنىڭ وتىرىسى وتەدى. مەن قۇرمەتتى ءتوراعا مارتەبەسىن قۋانا قابىلدادىم، ويتكەنى مەملەكەتتەرىمىزدىڭ اراسىنداعى ىنتىماقتاستىقتى نىعايتۋعا ۇلەس قوسۋدى جالعاستىرا بەرگىم كەلەدى»، - دەدى نۇرسۇلتان نازاربايەۆ.
ءوز كەزەگىندە يلحام اليەۆ ەلباسىنا تۇركى كەڭەسىنىڭ وتىرىسىنا كەلگەنى ءۇشىن العىس ءبىلدىردى جانە ونىڭ ەكىجاقتى قاتىناستاردى نىعايتۋعا قوسقان ۇلەسىن اتاپ ءوتتى.
«قازاقستاننىڭ تۇڭعىش پرەزيدەنتىن ازەربايجان جەرىندە قارسى الۋ ءبىز ءۇشىن زور مارتەبە. ءسىز ازەربايجاننىڭ ۇلكەن دوسىسىز. كوپتەگەن حالىقارالىق ماسەلەلەر بويىنشا ءارقاشان ءبىزدىڭ ەلىمىزدى قولدادىڭىز. ءسىزدىڭ تۇركى تىلدەس ەلدەر اراسىنداعى ىنتىماقتاستىقتى نىعايتۋداعى ۇلەسىڭىز وراسان. مەرەيتويلىق ءسامميتتىڭ باكۋدە ءوتىپ جاتقانىنا ءبىز وتە قۋانىشتىمىز»، - دەدى ازەربايجان رەسپۋبليكاسىنىڭ پرەزيدەنتى.
سونىمەن قاتار، يلحام اليەۆ قازاقستان استاناسىنىڭ سالىنۋى باكۋ قالاسىنىڭ دامۋىنا ۇلگى بولعانىن ايتتى.
«مەن قازاقستان استاناسىنىڭ تەز وزگەرگەنىن بايقادىم. ەكسپو كورمەسىن تاماشالاعان كەزدە قۇرىلىستىڭ اۋقىمى مەن ساۋلەتتىك شەبەرلىگىنە ريزا بولدىم. قازاقستاننىڭ بارلىق جەتىستىكتەرى ءسىزدىڭ اتىڭىزبەن بايلانىستى»، - دەدى ازەربايجان رەسپۋبليكاسىنىڭ پرەزيدەنتى.
