بايىرعى سىعاناق قالاشىعىنان التىن بۇيىمدار تابىلدى

قىزىلوردا. قازاقپارات - قىزىلوردا وبلىسىندا ورىن تەپكەن سىعاناق قالاسىنا جۇرگىزىلگەن قازبا بارىسىندا كونە قورىم ورىندارى ارشىلدى.

سونداي-اق، XIII-XIV عاسىرلارعا جاتاتىن التىن اشەكەي بۇيىمدار تابىلدى، دەپ حابارلايدى قازاقپارات ءتىلشىسى.

سوڭعى جىلداردا سىعاناق قالاسىنا ارحەولوگيالىق قازبا جۇمىستارى جۇرگىزىلىپ كەلەدى. ارحەولوگتاردىڭ قازبا جۇمىستارى بارىسىندا كونە قورىمى ورىندارى ارشىلدعان.

قىزىلوردا وبلىستىق مادەنيەت، مۇراعاتتار جانە قۇجاتتاما باسقارماسىنىڭ باسشىسى ميرا ءابۋوۆانىڭ ايتۋىنشا، كەزىندە قازاق حاندىعىنىڭ باستى ورداسىنىڭ ءبىرى بولعان سىعاناق قالاشىعىن زەرتتەۋ بارىسىندا ناتيجەلى جۇمىستار اتقارىلىپ كەلەدى.

«بۇگىندە تۇڭعىش پرەزيدەنت - ەلباسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» باعدارلاماسى اياسىندا كوپتەگەن ءىس- شارالار جۇزەگە اسىپ كەلەدى. اتالمىش باعدارلامانىڭ «قازاقستاننىڭ كيەلى جەرلەرىنىڭ گەوگرافياسى» جوباسى بويىنشا وبلىستا وڭىرلىك قاسيەتتى ورىندار ءتىزىمى تولىقتىرىلىدى. وعان قوسا رەسپۋبليكالىق «قاسيەتتى قازاقستان» ەنسيكلوپەديالىق جيناققا ءبىزدىڭ وبلىستان جالپىۇلتتىق 12 نىسان، وڭىرلىك 60 تاريحي نىسان ۇسىنىلدى. سونىمەن قاتار، بيىل وبلىستىق بيۋدجەت ەسەبىنەن قىشقالا، جانكەنت، سىعاناق، سورتوبە، ءبابىش مولا قالاشىقتارىنا قازبا جۇمىستارى جۇرگىزىلدى. بيىل سىعاناق قالاسىنا جۇرگىزىلگەن قازبا بارىسىندا كونە قورىم ورىندارى ارشىلدى. XIII-XIV عاسىرلارعا جاتاتىن التىن اشەكەي بۇيىمدار تابىلىپ، بۇل دۇنيەلەر عىلىمي زەرتتەۋگە بەرىلدى»، - دەدى ميرا ابۋوۆا.

قازىرگى تاڭدا تابىلعان تاريحي ورىندار مەن زاتتاي ەكسپوناتتارعا عىلىمي-زەرتتەۋلەر جۇرگىزىلۋدە. سونداي-اق، باسقارما باسشىسى كەلەسى جىلى اباي قۇنانباي ۇلىنىڭ 175 جىلدىعىنا ارنالعان احمەت جۇبانوۆ پەن لاتيف حاميديدىڭ «اباي» وپەراسىنان ءۇزىندى، ياعني كونسەرتتىك نۇسقاسىن قويۋ جوسپارلانۋدا ەكەنىن اتاپ ءوتتى.

بۇدان بۇرىن قىزىلوردادا جاستارعا قورقىت اتامۇراسى ناسيحاتتالدى.

اۆتور: ءادىلجان ۇمبەت