الەمدەگى ەنى ەڭ قىسقا ءۇي نە ءۇشىن سالىنعانىن بىلەسىز بە؟

نۇر-سۇلتان. قازاقپارات - ⅩⅩ عاسىردا تەحنولوگيا مەن اقپاراتتىڭ دامۋىنىڭ ارقاسىندا قالاداعى عيماراتتار بيىك ەتىپ سالىندى.

قالاعا ادامداردىڭ اعىلىپ كەلۋىنەن جەر جەتىسپەۋشىلىگى دە سەزىلە باستادى. ءبىراق الەمدەگى ەنى ەڭ قىسقا ءۇي باسقا سەبەپپەن قۇرىلعان. ليۆان استاناسى بەيرۋتداعى Al Ba'sa اتتى ءۇي تەڭىز جاعالاۋىنداعى الاقانداي جەردە بوي كوتەرگەن. بۇل عيماراتتىڭ ۇزىندىعى 4 مەتر دە، ەنى 60 سانتيمەتر عانا.

مۇنداي ەرەكشە ءۇيدى ءىنىسى اعاسىنا قاسارىسىپ، ادەيى سالعان. اعا مەن ءىنى ورتاسىنداعى كيكىلجىڭ 1950-جىلدارى باستالعان. ولاردىڭ اكەسى ولىمىنەن سوڭ تەڭىز جاعالاۋىنداعى شاعىن جەردى ۇلدارى مەن قىزدارىنا مۇرا ەتىپ قالدىرعان. پەرزەنتتەرى بۇل جەردە «نە سالۋ كەرەك؟» دەگەن سۇراق اينالاسىندا باس قاتىرىپ، ءبىر شەشىمگە كەلە الماعان. جاعداي جەردىڭ ءبىر بولىگىن ۇكىمەت قالا قاجەتتىلىگى ءۇشىن الىپ قويعاننان سوڭ ءتىپتى قيىنداعان. ۇكىمەت كەنجە ۇلعا تيەسىلى جەردىڭ ءبىر بولىگىن الىپ قويعان. ال اعاسى ءوز جەرىنە ءۇي سالىپ العان.

بۇعان رەنجىگەن ءىنىسى وزىنە تيەسىلى الاقانداي جەرگە، اعاسىنا قىرسىعىپ كوپ قاباتتى ءۇي تۇرعىزعان.

بۇل عيمارات قابىرعالارى ۇلكەن ۇلدىڭ ۇيىنەن بيىك بولعاندىقتان، تەڭىز كورىنىسىن جاۋىپ تاستاعان. ناتيجەسىندە اعاسىنىڭ ءۇيى بىردەن ارزانداپ كەتكەن. ۋاقىت وتە Al Ba'sa-دا باسقا وتباسى تۇرعان. كەيىن ءۇي قاڭىراپ بوس قالعان. سوعىس كەزىندە ول جەرگە بوسقىندار تىعىلعان. وتباسى ارازدىعىنىڭ سيمۆولىنا اينالعان عيمارات ءالى دە بۇزىلماي تۇر. ۇكىمەتتىڭ ايتۋىنشا، ونى بۇزىپ ورنىنا باسقا بىردەڭە سالۋ ءتيىمسىز.