وسكەمەندە مۇقاعالي ماقاتايەۆ تۋرالى كوركەم فيلم ءتۇسىرىلىپ جاتىر

وسكەمەن. قازاقپارات - «قازاق فيلم» كينوستۋدياسى وسكەمەندە مۇقاعالي ماقاتايەۆ تۋرالى فيلم ءتۇسىرىپ جاتىر. بۇل اقپاراتتى وسكەمەن قالاسىنىڭ اكىمدىگى راستادى، دەپ حابارلايدى «قازاقپارات» ءتىلشىسى.

دالىرەك ايتساق، ءتۇسىرىلىم جۇمىستارى كوكتەمدە باستالعان بولاتىن. ودان كەيىن سانكت- پەتەربور، الماتى شاھارلارىندا جالعاستى. قازاق ادەبيەتىنىڭ كلاسسيگى تۋرالى كوركەم فيلمنىڭ رەجيسسەرى - بولات قالىمبەتوۆ. ونىڭ ايتۋىنشا، جاڭا كينو كارتينادا اقىن ءومىرىنىڭ سوڭعى جىلدارى ايشىقتالماق. ال وسكەمەننىڭ ستاحانوۆ، مەتاللۋرگ سىندى كوشەلەرىندەگى ەسكى ۇيلەر سول كەزدەرگە ساي كەلەتىن كورىنەدى. ماماندار كۇزگى كورىنىستەردى ءتۇسىرىپ الۋ ءۇشىن شىعىس شاھارىنا قايتا ات باسىن بۇرىپ وتىر.

وسىعان بايلانىستى قالاداعى ترامۆايلار ۋاقىتشا توقتاتىلعانىن ايتا كەتەيىك. تۇرعىندار ءۇشىن ازداعان كەلەڭسىزدىك تۋىنداعانىمەن، كولىك كومپانياسى جولاۋشىلارعا جاعدايدى تۇسىندىرە الدى. رەلس 30 مينۋتتان كۇنىنە ءۇش رەت جابىلعان ەكەن.

- قالامىزدا مۇقاعالي ماقاتايەۆ تۋرالى فيلمنىڭ ءبىراز بولىگى ءتۇسىرىلدى. ءتۇسىرىلدى دەيتىنىمىز، بۇگىنمەن اياقتالىپ وتىر. ەستەرىڭىزدە بولسا، كوكتەمدە دە ءتۇسىرىلىم جۇمىستارى جۇرگىزىلگەن ەدى... وسىعان بايلانىستى جول 30 مينۋتتان ءۇش مارتە جابىلدى. ەندى بولدى. كەلەڭسىزدىك قايتالانبايدى، - دەدى «وسكەمەن كولىك كومپانياسى» ج ش س- نىڭ باسشىسى ميحايل چايكا.

اۆتور: ەسەنتاي ايت ۇلى