الماتى وبلىسىندا ىشەك قۇرىلىسى كەۋدە تۇسىندا ورنالاسقان ءسابي دۇنيەگە كەلدى

تالدىقورعان. قازاقپارات - الماتى وبلىسىندا ىشەك قۇرىلىسى كەۋدە تۇسىندا ورنالاسقان ءسابي دۇنيەگە كەلدى.

دارىگەرلەردىڭ ايتۋىنشا، مۇنداي اۋىتقۋمەن تۋىلعان نارەستەلەردىڭ 95 پايىزى شەتىنەپ كەتەدى، دەپ حابارلايدى قازاقپارات ءتىلشىسى.

قىركۇيەكتىڭ 29- كۇنى سارقان اۋداندىق ورتالىق اۋرۋحاناسىندا ىشەك قۇرىلىسى كەۋدە تۇسىندا ورنالاسقان ءسابي دۇنيەگە كەلگەن. 30- قىركۇيەك كۇنى سابيگە دەرەۋ وتا جاسالىپ، بالانىڭ ىشەك قۇرىلىسى ورنىنا قويىلعان. ال 3- قازان كۇنى نارەستە كۋۆەز اپپاراتىمەن الماتى وبلىستىق بالالار اۋرۋحاناسىنا جەتكىزىلگەن.

«نارەستەنىڭ ىشەك قۇرىلىسى، كوك باۋىرى بارلىعى كەۋدە تۇسىنا جىلجىپ كەتىپ، وكپەنى قىسقان. قازىر بارلىق ورگاندار ءوز ورنىنا قويىلدى. بالاعا وتا ءساتتى جاسالدى. ءسابي قازىر رەانيماتسيادان حيرۋرگيا بولىمىنە شىعارىلدى. جۇما كۇنى اناسىمەن بىرگە ۇيىنە جىبەرەمىز دەپ جوسپارلاپ وتىرمىز»، - دەدى الماتى وبلىستىق بالالار اۋرۋحاناسىنىڭ باس دارىگەرى مارات دوسقاليەۆ.

سونداي- اق باس دارىگەردىڭ ايتۋىنشا، تالدىقورعاندا 21 - قىركۇيەك كۇنى ىشەگى ءتۇيىلىپ قالعان ءسابي دۇنيەگە كەلگەن. قازىر ول نارەستەگە العاشقى وتا جاسالىپ، جاعدايى باقىلاۋدا. الداعى ۋاقىتتا نارەستەگە تاعى وتا جاسالاتىن بولادى.

اۆتور: سامال قابىشيەۆا