تۇركى كەڭەسىنە مۇشە مەملەكەتتەر سانى ارتۋى ىقتيمال
شارا بارىسىندا ءسوز سويلەگەن قىرعىزستان سىرتقى ىستەر ءمينيسترى شىڭعى ايداربەكوۆ اتالعان ۇيىمنىڭ كەڭەيەيتىنگىنە ءۇمىت ارتاتىندىعىن ايتتى، دەپ حابارلايدى قازاقپارات ءتىلشىسى.
ءسوز باسىندا ش. ايداربەكوۆ قىرعىزستان ءتوراعالىق ەتكەن كەزەڭدە وزبەكستاننىڭ تۇركى كەڭەسىنە قوسىلۋ تۋرالى شەشىم قابىلداعانىنا ريزاشىلىق تانىتىپ، وزبەك ارىپتەسى ا. كاميلوۆتى قۇتتىقتادى. سونىمەن قاتار ول ۇيىمنىڭ مۇنان ارى دا كەڭەيۋگە مۇددەلىك تانىتاتىندىعىن اتاپ ءوتىپ، تۇرىكمەنستاننىڭ دا وزبەكستاننان ۇلگى الاتىندىعىنا ءۇمىت ارتاتىندىعىن ءبىلدىردى.
«وزبەكستاننىڭ سىرتقى ىستەرى كاميلوۆ مىرزاعا ۇيىمىمىزدىڭ تولىققاندى مۇشەسى رەتىندە قوش كەلدىڭىز دەمەكپىن. بۇل قىرعىز تاراپىنىڭ ءتوراعالىعى كەزىندە قابىلدانعان وتە ماڭىزدى شەشىم بولدى»، - دەدى ش. ايداربكوۆ.
قازىرگى ۋاقىتتا 2019 -جىلدىڭ 15 - قازانىندا باكۋدە وتەتىن تۇركى كەڭەسىنىڭ 7- سامميتىندە دايىندىق ءجۇرىپ جاتىر.
تۇركى كەڭەسى قازاقستان رەسپۋبليكاسىنىڭ تۇڭعىش پرەزيدەنتى - ەلباسى نۇرسۇلتان نازاربايەۆتىڭ باستاماسىمەن قۇرىلعان بولاتىن. قازىرگى تاڭدا ازەربايجان، قازاقستان، قىرعىزستان جانە تۇركيا تۇركى كەڭەسىنىڭ مۇشە مەملەكەتتەرى بولىپ تابىلادى. 2018 -جىلى تۇركى كەڭەسىنىڭ 6- ءسامميتى بارىسىندا ماجارستان تۇركى كەڭەسى جانىندا باقىلاۋشى مارتەبەگە يە بولدى. 2019 -جىلى وزبەكستان تۇركى كەڭەسىنە قوسىلۋ تۋرالى شەشىم قابىلدادى. ۇيىم اياسىنداعى ءتۇرلى شارالارعا، ونىڭ ىشىندە تۇركى كەڭەسىنىڭ سامميتىنە تۇرىكمەنستاندا قاتىسىپ تۇرادى.
ەستەرىڭىزگە سالا كەتسەك، 2018 -جىلدان بەرى تۇركى تىلدەس مەملەكەتتىك ىنتىماقتاستىعى كەڭەسىنە قىرعىزستان ءتوراعالىق ەتەدى.