شۇبات پەن قىمىز قىتايعا ەكسپورتتالادى

None
None
نۇر- سۇلتان. قازاقپارات - ەلىمىزدە قۇرعاق شۇبات پەن قىمىزدى قىتايعا ەكسپورتتاعىسى كەلەتىن كاسىپكەرلەر بار. قىتاي تاراپىنان دا بۇل ونىمدەرگە قىزىعۋشىلىق جوعارى. بۇل تۋرالى دۇنيەجۇزىلىك ستاندارتتار كۇنىنە وراي وتكەن فورۋمدا ايتىلدى، دەپ حابارلايدى قازاقپارات ءتىلشىسى.

«قۇرعاق شۇباتقا كەلەتىن بولساق، تۇركىستان وبلىسىندا Golden Camel دەپ اتالاتىن ۇلكەن ينۆەستيتسيالىق جوبا بار. بۇگىنگى فورۋمدا ايتىپ وتكەنىمدەي، ول كومپانيانىڭ ونىمدەرى قىتاي ستاندارتتارىنا ساي»، - دەيدى «قازاقستان ستاندارتتاۋ جانە سەرتيفيكاتتاۋ ينستيتۋتى» ر م ك باس ديرەكتورىنىڭ ورىنباسارى ەركەجان ءامىرحانوۆا.

بۇدان بولەك، قىتايدىڭ ستاندارتتاۋ ورگانى - ءسۇت ونىمدەرى قاۋىمداستىعى ستاندارتى نەگىزىندە ۇلتتىق ستاندارتىن جاساۋدى قولعا العان.

«قىتاي ستاندارتىن قازاقستاندىق ونىمگە قولدانۋعا رۇقسات الۋىمىز كەرەك بولدى. قاجەتتى قۇجاتتى جىبەرىپ، رۇقسات الدىق. بۇل قازاقستاندىق كومپانيا قىتايداعى ءسۇت ونىمدەرى قاۋىمداستىعى ستاندارتىن قابىلداۋ قۇقىعىن الدى. بۇگىنگى تاڭدا قۇرعاق شۇبات اۋىل شارۋاشىلىعى مينيسترلىگى ۆەتەرينارلىق تالاپتار بويىنشا قول قويعان حاتتاماعا كىردى. بۇل حاتتاما وسى ءونىمدى ەكسپورتتاۋعا جول اشادى»، - دەيدى ەركەجان ءامىرحانوۆا.

سونداي- اق، ەركەجان ماعاۋين قىزى قىتايدا قۇرعاق شۇباتقا قاتىستى ستاندارت جوق ەكەنىن ايتتى.

«قىمىز - ەرەكشە ءونىم. قىتايلار بۇل ءونىمدى كوپ تۇتىنا بەرمەيدى، ءبىراق بۇگىنگى تاڭدا قىزىعۋشىلىق ارتىپ كەلەدى. ولاردا قىمىزعا قاتىستى ستاندارت جوق بولعاندىقتان، ءوزىمىزدىڭ ۇلتتىق ستاندارتىمىزدى ۇسىنىپ، قىتاي تىلىنە اۋدارىپ بەردىك. ودان كەيىن بۇل ستاندارت قىتايدىڭ دەنساۋلىق ساقتاۋ مينيسترلىگىندە تالقىلانىپ، ارنايى زەرتتەۋدەن وتەدى»، - دەيدى ول.

قىتايدىڭ دەنساۋلىق ساقتاۋ مينيسترىلىگى تاماق ونىمدەرىنىڭ قاۋىپسىزدىگىنە قاتىستى قوسىمشا تالاپتار قوسۋدى ۇسىنعان.

«ءبىز ولاردىڭ تالابىن ورىندادىق، ەندى جاۋاپ كۇتىپ وتىرمىز. ولار ءبىزدىڭ ۇلتتىق ستاندارت نەگىزىندە قىمىزعا قاتىستى قىتايدىڭ ۇلتتىق ستاندارتىن جاسايدى. تەحنيكالىق تالاپتاردى ورىنداۋ وتە ماڭىزدى. قىتايلار ءۇشىن قىمىزدىڭ ءدامىنىڭ اشىلىعى تاڭسىق دۇنيە بولدى. ال بۇل - ءبىز ءۇشىن قالىپتى جاعداي»، - دەيدى ەركەجان ءامىرحانوۆا.

اۆتور: زارينا قاھارمان

سوڭعى جاڭالىقتار