قازاقستاندا ەت، نان جانە جارما باعاسى قىمباتتادى

نۇر-سۇلتان. قازاقپارات - ۇلتتىق بانك ءتوراعاسىنىڭ ايتۋىنشا، قازاقستاننىڭ قارجى نارىعىنداعى جاعداي تۇراقتى، دەپ حابارلايدى قازاقپارات ءتىلشىسى.

«قارجى نارىعىنداعى جاعداي تۇراقتى ينفلياتسيا تارگەتتەلگەن 4-6 پايىزدىق دالىزىنەن اسقان جوق. قىركۇيەكتە جىلدىق ينفلياتسيا 5,3 پايىزعا دەيىن باياۋلادى. الدىڭعا ايدا ول 5,5 پايىز بولعان ەدى. ازىق-تۇلىك تاۋارلارى باعاسىنىڭ ءوسۋى ينفلياتسياعا بارىنشا اسەر ەتكەنىن اتاپ ءوتۋ كەرەك. 2017 -جىلدىڭ باسىنان بەرى ول ەڭ جوعارعى 9,1 پايىزدىق دەڭگەيگە جەتتى. ەت باعاسى - 13,5 پايىزعا، نان، توقاش ونىمدەرى مەن جارما - 12,7 پايىزعا ءوستى. ولاردىڭ ينفلياتسيالىق ۇلەسى - 1 پايىز. بۇل تاۋارلار الەمدىك باعا مەن ەكسپورت كولەمىنىڭ ءوسۋى اياسىندا قىمباتتادى»، - دەدى ۇلتتىق بانك ءتوراعاسى ۇكىمەت وتىرىسىندا.

ەربولات دوسايەۆتىڭ ايتۋىنا قاراعاندا، ازىق-تۇلىككە جاتپايتىن اقىلى قىزمەتتەر باعاسى ينفلياتسيانى تەجەۋگە ىقپال ەتۋدە.

«ازىق- تۇلىككە جاتپايتىن اقىلى قىزمەتتەر باعاسىنىڭ جىلدىق ءوسىمى 5,4 پايىز بولدى. بۇل 2015 -جىلعى قازاننان بەرى مينيمۋم بولىپ وتىر»، - دەدى ول.

ەربولات دوسايەۆتىڭ سوزىنە سەنسەك، جىل قورىتىندىسى بويىنشا ينفلياتسيا بەلگىلەنگەن دالىزدە قالادى.

«ينفلياتسيا 5,7-5,8 پايىزدىق دەڭگەيدە قالىپتاسادى»، - دەدى ول.

اۆتور: ايان بەكەن ۇلى