قارجى ءمينيسترى سمايىلوۆ قاي مينيسترلىكتەر بيۋدجەتتى يگەرە الماي جاتقانىن ايتتى
«رەسپۋبليكالىق بيۋدجەت %19 جانە جەرگىلىكتى بيۋدجەتتەر %7 وسكەنىن اتاپ ءوتۋ كەرەك. ۇلتتىق قوردىڭ اكتيۆتەرى 2018 -جىلدىڭ 9 ايىمەن سالىستىرعاندا 15 پايىزعا ءوسىپ، 26 تريلليون 447 ميلليارد تەڭگەنى قۇرادى. شىعىندار بيۋدجەتتىڭ بارلىق دەڭگەيلەرىندە جوعارى پروتسەنتپەن يگەرىلدى. ەسەپتى كەزەڭنىڭ كورسەتكىشتەرى وسى جىلدى جوعارى دەڭگەيدە اياقتاۋعا بارلىق مۇمكىندىك بار ەكەنىن كورسەتەدى»، - دەدى ءاليحان سمايىلوۆ ۇكىمەت وتىرىسىندا.
ونىڭ ايتۋىنشا، جىل باسىنان بەرى رەسپۋبليكالىق بيۋدجەتكە 4 تريلليون 817 ميلليارد تەڭگە تابىس تۇسكەن. بۇل جوسپاردان 61 ميلليارد تەڭگەگە كوپ.
«2018 -جىلعى 1 -قازانداعى جاعدايمەن سالىستىرعاندا كىرىستىڭ ءوسۋ قارقىنى %118,5، ياعني 751 ميلليارد تەڭگەنى قۇرادى. بۇل سومانىڭ 738 ميلليارد تەڭگەسى - سالىق. سالىق بولىنىسىندە نەگىزگى ءوسۋ قوسىلعان قۇن - 421 ميلليارد تەڭگە، كورپوراتيۆتىك تابىس - 184 ميلليارد تەڭگە جانە حالىقارالىق ساۋدا مەن سىرتقى وپەراتسيالارعا سالىناتىن 125 ميلليارد تەڭگە سالىققا كەلەدى»، - دەدى ول.
ءاليحان سمايىلوۆ اتاپ وتكەندەي، كىرىس بويىنشا جوسپار نۇر-سۇلتان قالاسىن قوسپاعاندا بارلىق وڭىرلەردە ارتىعىمەن ورىندالعان.
«ال رەسپۋبليكالىق بيۋدجەتتىڭ شىعىندارى 8 تريلليون 541 ميلليارد تەڭگەنى قۇرادى. ورىندالماۋ سوماسى - 14,3 ميلليارد تەڭگە. ونىڭ 5,7 ميلليارد تەڭگەسى - ۇنەمدەلگەن قاراجات. 8,6 ميلليارد تەڭگە يگەرىلمەي جاتىر. بۇل 2018 -جىلدىڭ 9-ايىمەن سالىستىرعاندا بەس ەسە از. ەڭ كوپ يگەرىلمەگەن سوما مىنا اكىمشىلەردە قالىپتاستى: ەكولوگيا، گەولوگيا جانە تابيعي رەسۋرستار مينيسترلىگى - 1,5 ميلليارد تەڭگە، جوعارعى سوت - 1,2 ميلليارد تەڭگە، مادەنيەت جانە سپورت مينيسترلىگى - 992 ميلليون تەڭگە، ساۋدا جانە ينتەگراتسيا مينيسترلىگى - 947 ميلليون تەڭگە. قارجى يگەرمەۋدىڭ نەگىزگى سەبەپتەرى - كونكۋرستىق راسىمدەردى ۇزاق وتكىزۋ، ورىندالعان جۇمىس اكتىلەرىن ۋاقتىلى ۇسىنباۋ، قازىناشىلىق ورگاندارىنا تىركەۋگە شارتتار مەن قوسىمشا كەلىسىمدەردى كەش ۇسىنۋ»، - دەدى ول.
اۆتور: ايان بەكەن ۇلى