تۇركىستان وبلىسى نەگە قۇرىلدى - ەلباسى ءتۇسىندىردى
سۇحبات بارىسىندا نۇرسۇلتان نازاربايەۆ تۇركىستان وبلىسىنىڭ قۇرىلۋىنا قاتىستى ساۋالعا جاۋاپ بەردى.
«ول كوپتەن ويدا جۇرگەن ماسەلە ەدى. ءتىپتى وسى ەلوردانى تاڭداعان كەزدە دە مەن سونى ويلاعانمىن. كىشىگىرىم قالا، ول جەرگە ەلوردانى اپارا المايتىن بولدىق. سەبەبى بۇل ءبىزدىڭ رۋحاني وردامىز. ءتىپتى، تۇركى الەمىنىڭ رۋحاني ورتالىعى. قوجا احمەت ياساۋيدىڭ شىعارمالارى مەن وي- پىكىرى دە سول جەردە تۋعان. سوندىقتان وسىنداي باياعىدان بەلگىلى، تاريحتا جازىلىپ كەلە جاتقان، 1500 جىلدىق تاريحى بار وڭتۇستىكتەگى قالانى جانداندىرۋىمىز قاجەت. قۇدايعا شۇكىر، حالىق جەتكىلىكتى. كوپتەن بەرى قالاي جاسايمىز دەپ ويلاپ كەلە جاتىر ەدىم. استانانى سالعاننان كەيىن ونشا قاراجات تا بولعان جوق. شىمكەنت ميلليون حالقى بار قالا بولعاننان كەيىن ونى ورتالىققا تىكەلەي باعىناتىن الماتى، استانا سياقتى قالا جاساماق بولدىق. سوندىقتان تۇركىستاندى وبلىس ورتالىعى دەپ جاريالادىم»، - دەدى ەلباسى.
قازاقستان تۇڭعىش پرەزيدەنتى مۇنداي باستاماسىن وزگە دە تۇركى مەملەكەتتەرى قولداعاندىعىن اتاپ ءوتتى.
«مەن دۇرىس شەشىم دەپ ويلايمىن. كەرەمەت قالانىڭ ورتالىعى سالىنىپ جاتىر. نەشە ءتۇرلى مۋزەيلەر، قوجا احمەت ياساۋيدىڭ، قازاق تاريحىنىڭ، تۇركى تاريحىنىڭ مۋزەيى سالىنۋدا. ۇلكەن عيماراتتار، قوناق ۇيلەر، مەديا ورتالىقتار، مەكتەپتەر، اۋرۋحانالار، ساياباقتار، بارلىعى سالىنىپ جاتىر»، - دەدى ن. نازاربايەۆ.
ەلباسى تۇركىستانعا بۇگىنگە دەيىن جۇزدەگەن مىڭ تۋريست كەلەتىن بولسا، الداعى ۋاقىتتا ونىڭ سانى ارتاتىندىعىن جەتكىزدى.
اۆتور: مارلان جيەمباي