ەلىمىزدەگى «قوسارلانعان بيلىك» تۋرالى اڭگىمەنى قاشقىن ۇرىلار شىعارىپ ءجۇر - نازاربايەۆ
«مەن مۇنىڭ بارلىعىن ەستىپ، وقىپ وتىرمىن. بۇل قۋلىق ارەكەتتەن شىعىپ وتىر. وسەكتى قازاقستاندا تۇراقتىلىقتى قالامايتىن ادامدار ادەيى شىعارىپ وتىر. وسى جەردە توبەلەستىڭ، قوسارلانعان بيلىكتىڭ بولعان قالايدى. ءبىزدىڭ وتانىن ساتقان قاشقىن ۇرىلار، انا جاقتان حالىقتىڭ تىنىش ءومىرىن بۇزۋ ءۇشىن وسىنداي اقپاراتتاردى تاراتىپ وتىر. مۇنىڭ ەشقانداي نەگىزى جوق. سەبەبى قازاقستان باسقارۋدىڭ پرەزيدەنتتىك فورماسى بار ۋنيتارلى مەملەكەت سانالادى»، - دەدى ق ر تۇڭعىش پرەزيدەنتى.
ەلباسىنىڭ اتاپ وتۋىنشە، مۇنداي فورما فرانسيا، رەسەي، ا ق ش بيلىگىندە بار.
«ياعني، قاسىم- جومارت توقايەۆتى بۇكىل حالىق سايلاعان. ول - پرەزيدەنت. ماعان قاتىستى ايتار بولسام، سىزدەرگە ول دا بەلگىلى. زاڭعا سايكەس مەن قاۋىپسىزدىك كەڭەسىنىڭ ءتوراعاسىمىن. ءبىراق، بۇل القالىق ورگان، مەن ءتوراعامىن. ال ول جەردە ەلدىڭ بارلىق باسشىلارى مۇشە بولىپ سانالادى جانە ءبىز قاتەلىك جىبەرمەۋ ءۇشىن ۇجىم بولىپ شەشەمىز. مەنىڭ دە مارتەبەم كونستيتۋتسيالىق زاڭمەن ەلباسى دەپ ايقىندالعان. مەنىڭ مىندەتىم - ەڭ الدىمەن قاۋىپسىزدىك كەڭەسىنىڭ جۇمىسىن قامتاماسىز ەتۋ، «نۇر وتان» پارتياسىنا، قازاقستان حالقى اسسامبلەياسىنا باسشىلىق جاساۋ. بۇعان قوسا قۇرىلۋىنا ءوزىم قاتىسقان كوپتەگەن حالىقارالىق ۇيىمدار ماعان اتالعان ورگانداردىڭ قۇرمەتتى ءتوراعاسى بولۋدى ۇسىندى. دەمەك، جۇمىس جەتەدى. شاقىرىپ جاتىر. مەن ول جاققا بارامىن. ويتكەنى، قازاقستاننىڭ مۇددەسىن قورعاپ، قازاقستانعا جاڭا دوستار، ينۆەستورلار تابامىن. وسى تۇرعىدا جۇمىس ىستەلىپ جاتىر. ارينە، پرەزيدەنت توقايەۆ مەنىمەن اقىلداسادى. ماعان جۇگىنگەن كەزدە ءوزىمنىڭ ومىرلىك مول تاجىريبەممەن ەل ءۇشىن بولىسەمىن»، - دەدى ەلباسى.
اۆتور: مارلان جيەمباي