كاسىپقوي بوكس: «قازاق جاۋىنگەرى» العاش رەت ەل نامىسىن قورعايدى

نۇر- سۇلتان. قازاقپارات - قىتايدا تۋىپ- ءوسىپ، «قازاق جاۋىنگەرى» لاقاپ اتىمەن كاسىپقوي بوكستا ونەر كورسەتىپ جۇرگەن قانداسىمىز ەلشات نىعمەتوللا قازاق ەلىنىڭ نامىسىن قورعايتىن بولدى، دەپ حابارلايدى قازاقپارت ءتىلشىسى.

BoxRec پورتالىنىڭ مالىمەتىنە قاراعاندا، «قازاق جاۋىنگەرى» 12 - قازان كۇنى الماتى قالاسىندا وتەتىن «جەتىسۋ جاۋىنگەرلەرى» كاسىپقوي بوكس كەشىندە رينگكە شىعىپ، فيليپپيندىك بوكسشى اردين ديالەمەن (35-14-4,17ك و) قولعاپ تۇيىستىرەدى.

ايتا كەتەرلىگى، ەلشات نىعمەتوللا كاسىپقوي رينگتەگى 16-جەكپە- جەگىندە قازاقستاننىڭ نامىسىن قورعايدى.

ەلشات نىعمەتوللا - قازاقستاندىق تانىمال بوكسشى قانات يسلامنىڭ (26-0,21ك و) جەرلەسى. 25 جاستاعى سپورتشى 2014 -جىلى كاسىپقوي بوكسقا اۋىسىپ، 2016 -جىلى WBO تۇجىرىمى بويىنشا قىتاي چەمپيونى، 2018 -جىلى WBC تۇجىرىمى بويىنشا ازيا چەمپيونى اتانعان بولاتىن.

ەسكە سالايىق، 12 - قازان كۇنى الماتىدا م ت ك Global پروموۋتەرلىك كومپانياسىنىڭ ۇيىمداستىرۋىمەن «جەتىسۋ جاۋىنگەرلەرى» كاسىپقوي بوكس كەشى وتەدى. بوكس كەشىندە كاسىپقوي بوكستا ەندى ونەر كورسەتىپ جۇرگەن جانە دەبيۋتتىق جەكپە- جەگىن وتكىزەتىن قازاقستاندىق جاس بوكسشىلار شارشى الاڭعا شىعادى.

اۆتور: مۇحتار قاليموللا ۇلى