قۋاندىق بيشىمبايەۆ ءوز كىناسىن تولىق مويىندادى - كوميتەت

نۇر- سۇلتان. قازاقپارات – ق ر  ءى ءى م قىلمىستىق اتقارۋ جۇيەسى كوميتەتى بۇرىنعى ۇلتتىق ەكونوميكا ءمينيسترى قۋاندىق بيشىمبايەۆتىڭ بوستاندىققا شىعۋىن ءتۇسىندىردى، دەپ حابارلايدى قازاقپارات.

«2019 -جىلدىڭ 25 - قىركۇيەگىندە شىمكەنت قالاسى اباي اۋداندىق سوتى ق. بيشىمبايەۆتى مەرزىمىنەن بۇرىن شارتتى تۇردە بوساتۋ تۋرالى ءوتىنىشحاتتى قارادى جانە قاناعاتتاندىردى. سوت شەشىمى 2019 -جىلدىڭ 11 - قازانىندا كۇشىنە ەنگەن. بۇعان دەيىن ق. بيشىمبايەۆ راقىمشىلىق جاساۋدى ءوتىنىپ، مەملەكەت باسشىسىنا جۇگىنگەن ەدى. 2019 -جىلدىڭ اقپانىندا بۇل ءوتىنىش جازا مەرزىمىن قىسقارتۋ تۇرىندە ماقۇلدانعان»، - دەپ حابارلادى  ق ر ءى ءى م  ق ا ج كوميتەتىنىڭ باسپا ءسوز قىزمەتى.

مەرزىمىنەن بۇرىن شارتتى تۇردە بوساتۋ تۋرالى ءوتىنىشتى قاراۋ كەزىندە سوتتالۋشىنىڭ اباقتىداعى مىنەز- قۇلقى، كىناسىن تولىق مويىنداۋى سىندى باس بوستاندىعىنان ايىرۋدى قاجەت ەتپەيتىنىن كورسەتەتىن جاعدايلار ەسكەرىلەدى.

«قۋاندىق بيشىمبايەۆ ءوز ايىبىن تولىق مويىنداعان جانە وكىنىش بىلدىرگەن. سوت تاعايىنداعان وتەماقىنى تولەگەن. جازاسىن وتەۋ بارىسىندا ق. بيشىمبايەۆ ءوزىن بايىپتى ۇستاعان جانە مادەني شارالارعا بەلسەنە قاتىسقان. جازانىڭ قالعان بولىگىن ەكس- مينيستر پروباتسيالىق باقىلاۋدا وتەيدى»، - دەلىنگەن حابارلامادا.

ايتا كەتەيىك، بۇگىن شىمكەنت قالاسىنىڭ تۇرمەسىندە جازاسىن وتەپ جاتقان قۋاندىق بيشىمبايەۆ بوستاندىققا شىقتى. 2019 -جىلى 13 - اقپاندا سوتتالۋشى قۋاندىق بيشىمبايەۆ پرەزيدەنت جارلىعىمەن راقىمشىلىققا ءىلىنىپ، جازاسىن وتەۋ مەرزىمى 10 جىلدان 4 جىلعا قىسقارعان. بۇگىندە جازاسىنىڭ ۇشتەن ەكى بولىگىن وتەپ قويعان. 167/3 تۇزەۋ مەكەمەسىنىڭ باسشىلىعى وعان جاقسى مىنەزدەمە بەرگەن.

ەسكە سالا كەتسەك، وتكەن جىلدىڭ ناۋرىز ايىندا بۇرىنعى ۇلتتىق ەكونوميكا ءمينيسترى مەن وسى ىسكە قاتىستى وزگە دە ايىپتالۋشىلارعا ۇكىم شىققان ەدى. سوت ۇكىمىمەن قۋاندىق بيشىمبايەۆتىڭ مۇلكى تاركىلەنىپ، 10 جىلعا سوتتالدى. سونىمەن بىرگە، ول ءومىر بويىنا مەملەكەتتىك قىزمەتتە جۇمىس ىستەۋ قۇقىعىنان ايىرىلدى. بيىلعى 4 - قاڭتار كۇنى قۋاندىق بيشىمبايەۆ شىمكەنتتەگى قاۋىپسىزدىگى ورتاشا تۇزەۋ مەكەمەسىنە اۋىستىرىلعان بولاتىن .

اۆتور: ايجان سەرىكجان قىزى