قۋاندىق بيشىمبايەۆ مەرزىمىنەن بۇرىن بوساپ شىقتى

شىمكەنت. قازاقپارات - بۇگىن شىمكەنت قالاسىنىڭ تۇرمەسىندە جازاسىن وتەپ جاتقان قۋاندىق بيشىمبايەۆ بوستاندىققا شىقتى. بۇرىنعى ۇلتتىق ەكونوميكا ءمينيسترىن مەرزىمىنەن بۇرىن بوساتۋ تۋرالى قاۋلىنى اباي اۋداندىق سوتىنىڭ سۋدياسى مارات ءشارىپوۆ شىعارعان، دەپ حابارلايدى قازاقپارات ءتىلشىسى.

اتالعان سوتتىڭ باسپا ءسوز قىزمەتىنىڭ مالىمەتىنشە، قۋاندىق بيشىمبايەۆ قىلمىستىق پروتسەسسۋالدىق كودەكستىڭ 72-بابى بويىنشا جازاسىن وتەپ جاتقان.

«ول جازاسىن وتەۋ مەرزىمىنىڭ ەكىدەن ءبىر بولىگىن وتەپ قويعان جانە 167/3 تۇزەۋ مەكەمەسىنىڭ باسشىلىعى وعان جاقسى مىنەزدەمە بەرگەن. وسى جايتتاردى ەسكەرگەن سۋديا قىلمىستىق پروتسەسسۋالدىق كودەكستىڭ 476, 480 جانە 483 باپتارىن نەگىزگە الا وتىرىپ، سوتتالعان بيشىمبايەۆتى 1 جىل 3 اي 13 كۇن بۇرىن بوساتۋ تۋرالى قاۋلى قابىلداعان» دەلىنگەن باسپا ءسوز قىزمەتىنىڭ حابارلاماسىندا.

ايتا كەتەيىك، بۇل قاۋلى 25 - قىركۇيەك كۇنى قابىلدانىپ، كەشە 10 - قازان كۇنى كۇشىنە ەنگەن. وسى قاۋلىعا وراي بۇگىن قۋاندىق بيشىمبايەۆ تۇرمەدەن بوساپ، بوستاندىققا شىقتى.

ەسكە سالا كەتسەك، بۇعان دەيىن سوتتالعان ءمينيستردىڭ قورعاۋشىسى ونىڭ جازاسىن وتەۋ ءتارتىبىن وزگەرتۋدى سۇراعان بولاتىن.

ايتا كەتسەك، وتكەن جىلدىڭ ناۋرىز ايىندا بۇرىنعى ۇلتتىق ەكونوميكا ءمينيسترى مەن وسى ىسكە قاتىستى وزگە دە ايىپتالۋشىلارعا سوت ۇكىمى شىققان ەدى. سوت ۇكىمىمەن قۋاندىق بيشىمبايەۆتىڭ مۇلكى تاركىلەنىپ، 10 جىلعا سوتتالدى. سونىمەن بىرگە، ول ءومىر بويىنا مەملەكەتتىك قىزمەتتە جۇمىس ىستەۋ قۇقىعىنان ايىرىلدى. بيىلعى 4 - قاڭتار كۇنى قۋاندىق بيشىمبايەۆ شىمكەنتتەگى قاۋىپسىزدىگى ورتاشا تۇزەۋ مەكەمەسىنە اۋىستىرىلعان بولاتىن.

اۆتور اينۇر اقبايەۆا