اتىراۋ وبلىسىندا قانشا شەتەلدىك ازامات ەڭبەك ەتەدى

اتىراۋ. قازاقپارات - شەتەلدىك جۇمىس كۇشىن تارتاتىن قازاقستاندىق كومپانيالار قازاقستان رەسپۋبليكاسىنىڭ ەڭبەك جانە كوشى-قون زاڭدارىن ساقتاۋعا مىندەتتى جانە ءبىزدىڭ ازاماتتارىمىزدىڭ قۇقىقتارىن بۇزۋعا جول بەرمەۋى كەرەك.

بۇل تۋرالى ق ر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ اتىراۋ وبلىسىنا ساپارى بارىسىندا ايتتى، دەپ حابارلايدى قازاقپارات.

ب. نۇرىمبەتوۆ ق ر پرەمەر-ءمينيسترىنىڭ ورىنباسارى بەردىبەك ساپاربايەۆتىڭ اتىراۋ وبلىسىنا جۇمىس ساپارى اياسىندا «بولاشاق- اتىراۋ» ج ش س مۇناي-گاز وڭدەۋ زاۋىتىنىڭ باسشىلىعىمەن جانە ەڭبەك ۇجىمىمەن كەزدەستى. ونىڭ بارىسىندا مينيستر شەتەلدىك جۇمىس كۇشىن تارتاتىن كاسىپورىندار ەڭبەك زاڭناماسىن بۇزۋعا جول بەرمەۋى جانە جالاقى تولەۋدە تەڭ جاعدايلاردى قامتاماسىز ەتۋى تيىستىگىن قاداپ ايتتى.

«ىشكى ەڭبەك نارىعىن قورعاۋ ماقساتىندا شەتەلدىك مامانداردى رەسپۋبليكاعا تارتۋ ءۇشىن جىل سايىن كۆوتا بەلگىلەنەدى. 2019 -جىلعا ارنالعان كۆوتا 48,7 مىڭ بىرلىك مولشەرىندە بەكىتىلدى (جۇمىس كۇشىنە %0,54). 2019 -جىلعى 1 -قىركۇيەكتەگى جاعداي بويىنشا، جەرگىلىكتى اتقارۋشى ورگاندار شەتەلدىك جۇمىس كۇشىن تارتۋعا 18 مىڭ 533 رۇقسات بەردى جانە ۇزارتىلدى. شەتەلدىكتەردى جۇمىسقا 2425 كومپانيا تارتۋدا، وندا 531 مىڭ قازاقستاندىق ازامات نەمەسە قىزمەتكەرلەردىڭ جالپى سانىنىڭ %96 جۇمىس ىستەيدى. مينيسترلىك باس پروكۋراتۋرامەن بىرلەسىپ 50 دەن استام شەتەلدىك قىزمەتكەرلەردى تارتاتىن كاسىپورىنداردى تەكسەرۋگە باستاماشىلىق جاسادى.

اعىمداعى جىلعى 8 -قازانداعى جاعداي بويىنشا 49 كاسىپورىنعا تەكسەرىس جۇرگىزۋ اياقتالدى، ەڭبەك جانە كوشى-قون زاڭناماسىن بۇزۋدىڭ 791 فاكتىسى انىقتالدى، ونىڭ ىشىندە 24 كاسىپورىندا ەڭبەكاقى تولەۋ جانە سىياقى تولەۋ بويىنشا سايكەسسىزدىكتىڭ 476 فاكتىسى انىقتالدى. 

ماسەلەن، اتىراۋ وبلىسىندا «نەفتەسترويسەرۆيس ل ت د» ج ش س- دا ساعاتتىق تاريفتىك مولشەرلەمە جەرگىلىكتى ينجەنەرگە 568 تەڭگە، ال شەتەلدىك قىزمەتكەرگە 6500 تەڭگە كولەمىندە تاعايىندالدى. مۇنداي تاجىريبەگە جول بەرىلمەيدى! جۇمىس بەرۋشىلەر قازاقستان ازاماتتارى مەن شەتەلدىك قىزمەتكەرلەرگە تەڭ ەڭبەك جاعدايىن قامتاماسىز ەتۋى ءتيىس»، - دەدى ءبىرجان نۇرىمبەتوۆ.

ەڭبەك، الەۋمەتتىك قورعاۋ جانە كوشى-قون كوميتەتىنىڭ مالىمەتى بويىنشا، جىلدىڭ باسىنان باستاپ اتىراۋ وبلىسىندا 364 جۇمىس بەرۋشى 9 مىڭنان استام شەتەلدىك ازاماتتى جۇمىسقا تارتقان، ونىڭ ىشىندە ءبىرىنشى ساناتقا (باسشىلار مەن ولاردىڭ ورىنباسارلارى) - 63 (%0,7)، ەكىنشىسى ساناتقا (قۇرىلىمدىق بولىمدەر باسشىلارى) - 1475 (%16,5)، ءۇشىنشى ساناتقا (ماماندار) - 5332 (%59)، ءتورتىنشى ساناتقا (بىلىكتى جۇمىسكەرلەر) 1146 (%13) ادام قابىلدانعان. سونداي-اق ماۋسىمدىق جۇمىسكەرلەردىڭ سانى - 910 (%10.11)، ىشكى كورپوراتيۆتىك نەگىزدە اۋىستىرىلعاندار - 78 (%1) ادام.

«سونداي-اق، رەسپۋبليكا بويىنشا تەكسەرۋ بارىسىندا شەتەلدىك قىزمەتكەرلەردىڭ بەرىلگەن رۇقساتقا نەمەسە جاسالعان ەڭبەك شارتىنا سايكەس كەلمەيتىن ماماندىق بويىنشا جۇمىس اتقارۋىنىڭ 183 فاكتىسى انىقتالدى. جۇرگىزىلگەن جۇمىس ناتيجەلەرى بويىنشا 447 رۇقسات كەرى قايتارىلدى. انىقتالعان ءتارتىپ بۇزۋشىلىق فاكتىلەرى بويىنشا جۇمىس بەرۋشىلەرگە 50 ۇيعارىم بەرىلىپ، 33,7 ميلليون تەڭگەدەن استام سوماعا 83 اكىمشىلىك ايىپپۇل سالىندى»، - دەپ تولىقتىردى ءبىرجان نۇرىمبەتوۆ.

مۇناي جانە گاز وڭدەۋ زاۋىتىنىڭ ەڭبەك ۇجىمىمەن كەزدەسۋدەن كەيىن مينيستر «№3 ارنايى الەۋمەتتىك قىزمەت كورسەتۋ ورتالىعى» ك م م-گە بارىپ، «ۆەنەرا» ينكليۋزيۆتى دامىتۋ ورتالىعىنىڭ جۇمىسىمەن تانىستى.

سونىمەن قاتار، ول «اتامەكەن» ۇ ك پ- نىڭ ايماقتىق فيليالىندا بولىپ، ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋدىڭ «ەڭبەك» مەملەكەتتىك باعدارلاماسىن ىسكە اسىرۋ اياسىندا جۇمىسپەن قامتۋعا جاردەمدەسۋدىڭ بەلسەندى شارالارىنا تارتىلعان اتىراۋلىقتارمەن كەزدەستى. ءوز ءىسىن اشۋعا ميكروكرەديتتەر مەن گرانتتار العان كاسىپكەرلەر مينيسترگە وزدەرىنىڭ جەتىستىكتەرى تۋرالى ايتىپ بەردى.

ءبىرجان نۇرىمبەتوۆ كەزدەسۋگە قاتىسۋشىلاردى مەملەكەت باسشىسىنىڭ قازاقستان حالقىنا جولداۋىندا ايتىلعان تاپسىرماسى بويىنشا، ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ كوپبالالى جانە تابىسى تومەن وتباسىلاردى بيزنەسكە تارتۋدىڭ مەملەكەتتىك باعدارلاماسىنىڭ تەتىكتەرىن جەتىلدىرۋگە باعىتتالعان ۇسىنىستارىمەن تانىستىردى.

بۇدان بۇرىن ۆەدومستۆو باسشىسى اتىراۋ وبلىسىنىڭ تۇرعىندارىنا ق ر پرەزيدەنتى قاسىم-جومارت توقايەۆتىڭ قازاقستان حالقىنا جولداۋىنىڭ نەگىزگى باعىتتارىن ءتۇسىندىرىپ، اتاۋلى الەۋمەتتىك كومەك كورسەتۋدىڭ جاڭا تەتىكتەرى تۋرالى اڭگىمەلەگەن ەدى.