قاسىم-جومارت توقايەۆ تۇرىكمەنستان پرەزيدەنتىمەن كەزدەستى
كەزدەسۋ بارىسىندا تاراپتار قازاقستان مەن تۇرىكمەنستان اراسىنداعى ءوزارا سەنىم مەن اشىقتىققا قۇرىلعان ساياسي تۇسىنىستىكتىڭ جوعارى ەكەنىن اتاپ ايتتى.
قازاقستان پرەزيدەنتى تۇرىكمەن كوشباسشىسىنا قوناقجايلىلىعى ءۇشىن ريزاشىلىعىن ءبىلدىرىپ، ونىڭ قازاق- تۇرىكمەن قارىم-قاتىناسىنا قوسقان ۇلەسىنە توقتالدى.
«كيەلى تۇرىكمەن جەرىنە تابانىم تيگەن العاشقى ساتتەردەن باستاپ ماعان كورسەتكەن قۇرمەتىڭىزگە ريزامىن. ءوزىنىڭ اسەمدىگىمەن كوز تارتاتىن اشحاباد قالاسىنا تاعى كەلگەنىمە قۋانىشتىمىن. مەنىمەن بىرگە ۇلكەن دەلەگاتسيا كەلدى. ءبىزدىڭ كوپتەگەن پەرسپەكتيۆالى جوبالارىمىز بار. ەلدەرىمىز اراسىنداعى ارىپتەستىك وتە جوعارى دەڭگەيدە دامىپ كەلەدى دەپ ويلايمىن. بۇل تۇرعىدا قازاقستاننىڭ تۇڭعىش پرەزيدەنتى نۇرسۇلتان ءابىش ۇلى نازاربايەۆ پەن ءوزىڭىزدىڭ ۇلەستەرىڭىز زور»، - دەدى قاسىم-جومارت توقايەۆ.
مەملەكەتتەر باسشىلارى ەكىجاقتى كەزدەسۋدىڭ كۇن تارتىبىندەگى ايماقتاعى جاعداي، ءارتۇرلى حالىقارالىق فورمات شەڭبەرىندەگى ءوزارا ءىس-قيمىلدار سەكىلدى اۋقىمدى ماسەلەلەر تالقىلادى.
