قىزىلوردالىق جاس جىراۋلار ازەربايجاندا جۇلدەلى بولدى

قىزىلوردا. قازاقپارات - باكۋدە وتكەن ءداستۇرلى ورىنداۋشىلاردىڭ حالىقارالىق فەستيۆالىندا قازاقستاندىقتار جۇلدەلى بولدى، دەپ حابارلايدى قازاقپارات ءتىلشىسى.

حالىقارالىق فەستيۆال 7-9 -قازان كۇندەرى وتكىزىلدى. وعان دۇنيەجۇزىنىڭ 9 ەلىنەن 15 ونەرپاز كەلدى. كوپشىلىك الدىندا شىققان دۇلدىلدەر قازاقستاندىق شۇعىلا مارحابا مەن اراي وڭعار قىزى بولدى. قوس ونەرپاز قارماقشى اۋدانىنداعى كوشەنەي رۇستەمبەكوۆ اتىنداعى جىراۋلار ۇيىندە ءتالىم العان.

حالىقارالىق فەستيۆالدە شۇعىلا مارحابا ءۇشىنشى ورىن السا، اراي وڭعار قىزى ارنايى ديپلوممەن ماراپاتتالدى. جاس ونەرپازداردى اتالمىش شاراعا زاۋرە كارىبايەۆا مەن ءدىنيسلام توقسانبايەۆ دايىنداپ الىپ باردى.

قارماقشى اۋدانىندا جىراۋلار ءۇيى جاس ۇرپاقتى ۇلتتىق ونەرگە باۋلۋ باعىتىندا يگىلىكتى ىستەردى جۇزەگە اسىرىپ وتىر. تۇڭعىش پرەزيدەنت - ەلباسى نۇرسۇلتان نازاربايەۆتىڭ «بولاشاققا باعدار: رۋحاني جاڭعىرۋ» باعدارلاماسى بويىنشا اتالمىش ونەر ورداسىندا ونەگەلى ىستەر لايىقتى جالعاسىن تاۋىپ كەلەدى.

اۆتور: ءادىلجان ۇمبەت