مينيستر: كوپبالالى وتباسىلارعا شاعىن نەسيە بەرۋ مەرزىمى ۇلعايتىلماق

نۇر-سۇلتان. قازاقپارات – ق ر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ اتىراۋ وبلىسىنىڭ تۇرعىندارىنا پرەزيدەنت جولداۋىن ءتۇسىندىردى.

بۇل تۋرالى قازاقپارات مينيسترلىكتىڭ باسپا ءسوز قىزمەتىنە سىلتەمە جاساپ حابارلايدى.

ق ر پرەمەر-ءمينيسترىنىڭ ورىنباسارى بەردىبەك ساپاربايەۆتىڭ اتىراۋ وبلىسىنا جۇمىس ساپارى اياسىندا ق ر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ «Nur Otan»  پارتياسىنىڭ وبلىستىق فيليالىنىڭ قوعامدىق قابىلداۋ بولمەسىندە اتىراۋ قالاسىنىڭ تۇرعىندارىن قابىلدادى.

سونىمەن قاتار، ماحامبەت اۋدانىنىڭ تۇرعىندارىمەن كەزدەسىپ، ق ر پرەزيدەنتى قاسىم-جومارت توقايەۆتىڭ قازاقستان حالقىنا جولداۋىنىڭ نەگىزگى باعىتتارى تۋرالى ايتتى.

قالا تۇرعىندارىمەن كەزدەسۋدەن كەيىن ەڭبەك ءمينيسترى اتىراۋ قالاسىنىڭ جۇمىسپەن قامتۋ ورتالىعىندا بولدى. جۇمىسپەن قامتۋ ورتالىعىنىڭ قىزمەتكەرلەرىمەن اڭگەمەلەسۋ بارىسىندا ءبىرجان نۇرىمبەتوۆ پرەزيدەنتتىڭ جولداۋىندا بيزنەستى قولداۋدىڭ جاڭا تۇرلەرىن بەلسەندى تۇردە ەنگىزۋ قاجەتتىلىگى ايقىن كورسەتىلگەنىن، بۇل الەۋمەتتىك اسپەكتىلەرگە - ءبىرىنشى كەزەكتە كوپبالالى جانە تابىسى از وتباسىلار ءۇشىن وتباسىلىق بيزنەس قۇرۋعا باسا نازار اۋدارىلاتىنىن اتاپ ءوتتى. سوندىقتان جۇمىسپەن قامتۋ ورتالىعىنىڭ قىزمەتكەرلەرى وسى وتباسىلاردىڭ ەڭبەككە قابىلەتتى مۇشەلەرىن ناتيجەلى جۇمىسقا تارتۋعا ەرەكشە نازار اۋدارۋى كەرەك.

«مەملەكەت باسشىسىنىڭ كوپبالالى انالاردى ميكرو جانە شاعىن بيزنەسكە تارتۋ جونىندەگى تاپسىرماسىن ورىنداۋ ماقساتىندا ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ «ەڭبەك» مەملەكەتتىك باعدارلاماسىنا وزگەرىستەر ەنگىزىلەتىن بولادى. جاڭا بيزنەستىڭ تۇراقتىلىعىن قامتاماسىز ەتۋ ءۇشىن كوپ بالالى وتباسىلاردىڭ جوبالارىنا ميكروكرەديت بەرۋ مەرزىمىن ۇلعايتۋ ۇسىنىلادى. كرەديتتى وتەۋ كەزىندە قارجىلىق اۋىرتپالىقتى ازايتۋ ءۇشىن نومينالدى پايىزدىق مولشەرلەمەنى تومەندەتۋدى ۇسىنامىز. جەتكىلىكتى كەپىلدىك قامتاماسىز ەتىلمەگەن وتباسىلار ءۇشىن اۋىلدار مەن قالالارعا بولىنبەستەن ءبىر وپەراتور ارقىلى ميكروكرەديتتەرگە كەپىلدىك بەرۋ تەتىكتەرىن كەڭەيتۋ جوسپارلانۋدا»، - دەدى مينيستر.

وسىدان كەيىن ءبىرجان نۇرىمبەتوۆ ماحامبەت اۋدانىنىڭ تۇرعىندارىمەن كەزدەسىپ، 2020 ج. 1 -قاڭتارىنان باستاپ مۇقتاج ازاماتتارعا ا ا ك قالاي كورسەتىلەتىنىن ەگجەي- تەگجەيلى ءتۇسىندىردى.

«مەملەكەت كومەككە مۇقتاج ادامدارعا، اسىرەسە بالالار مەن كوپبالالى وتباسىلارعا كومەكتەسەدى. ەڭبەككە قابىلەتتى ازاماتتار جۇمىس ىستەۋى كەرەك. مەملەكەت جۇمىسقا ورنالاسۋعا نەمەسە شاعىن بيزنەسپەن اينالىسۋعا كومەكتەسەدى. مەملەكەتتىك كومەككە - كوپبالالى وتباسىلاردى قولداۋ، تابىسى تومەن وتباسىلارعا اتاۋلى الەۋمەتتىك كومەك كورسەتۋ، تابىسى از وتباسىلارداعى بالالارعا كەپىلدەندىرىلگەن الەۋمەتتىك پاكەتى كىرەدى»، - دەدى ول.

ءمينيستردىڭ ايتۋىنشا، كوپبالالى وتباسىلارعا قولداۋ كورسەتۋ رەسپۋبليكالىق بيۋدجەتتەن مەملەكەتتىك جاردەماقىلار ەنگىزۋ ارقىلى قامتاماسىز ەتىلەتىن بولادى. بۇل مەملەكەتتىك جاردەماقى بارلىق كوپبالالى وتباسىلارعا (4 نەمەسە ودان دا كوپ كامەلەتكە تولماعان بالاسى بار)، تابىسىنا قاراماستان تولەنەدى.