+7 (701) 759 90 19
4 °С : نۇر-سۇلتان
7 °С : الماتى
USD 389.86 EUR 435.32
RUB 6.12 CNY 55.12
جاڭالىقتار

كانادالىق كومپانيا اقتوبەنىڭ جولدارىن جوندەۋگە ۇسىنىس ءبىلدىردى

11 قازان 10:50
:ءبولىسۋ
كانادالىق كومپانيا اقتوبەنىڭ جولدارىن جوندەۋگە ۇسىنىس ءبىلدىردى

اقتوبە. قازاقپارات - اقتوبەدە جول جوندەۋ سالاسىنا جاڭا يننوۆاتسيا ەنگىزۋ جونىندە اۋقىمدى جيىن ءوتتى.

بۇل تۋرالى وبلىس اكىمىنىڭ باسپا ءسوز قىزمەتىنە سىلتەمە جاساپ قازاقپارات ءتىلشىسى حابارلايدى.

وبلىس اكىمى وڭداسىن ءورازاليننىڭ قاتىسۋىمەن قوبدا اۋدانىندا جيىن ءوتتى. وعان وبلىستىق اۆتوموبيل جولدارى جانە جولاۋشىلار كولىگى باسقارماسىنىڭ باسشىسى، وڭىردەگى 20 دان استام مەردىگەر كومپانيا باسشىلارى جانە كانادالىق «CanRos GRP Inc» يننوۆاتسيالىق ماتەريالدار كومپانياسىنىڭ پرەزيدەنتى يۋري تاراسوۆ پەن «Cypher Environmental» ءوندىرۋشى كومپانياسىنىڭ باس ينجەنەرى دجەيمي گلادەن، اقتوبە وبلىسى جول سالاسى، جول اكتيۆتەرى ساپاسىنىڭ ۇلتتىق ورتالىعى، قازاقستاندىق جول عىلىمي-زەرتتەۋ ينستيتۋتىنىڭ ماماندارى قاتىستى.

«ءبىزدىڭ الدىمىزدا 2025 -جىلعا دەيىن جاقسى جانە قاناعاتتانارلىق جول ساپاسىنىڭ كولەمىن %95 نەمەسە 4,7 مىڭ شاقىرىمعا جەتكىزۋ ماقساتى تۇر. جىل سايىن وبلىستىق، اۋداندىق ماڭىزى بار 500 شاقىرىم جول جوندەلۋى ءتيىس بولعانىمەن، بيۋدجەتتەن بولىنەتىن قارجى 300 شاقىرىم جولدى جوندەۋگە مۇمكىندىك بەرەدى»، - دەپ اتاپ ءوتتى ايماق باسشىسى.

جول جوندەۋگە جۇمسالاتىن قارجىنى ۇنەمدەپ ءارى ساپالى توسەۋگە كانادالىق «CanRos GRP Inc» كومپانياسى نيەت ءبىلدىرىپ وتىر. وسى جىلدىڭ قىركۇيەك ايىندا «شۇبارقۇدىق- ويىل- قوبدا- سول- يلەسك» باعىتىنداعى جولدىڭ 3 شاقىرىمىن ءوز قاراجاتتارىنا ساراپتامالىق جوندەۋدەن وتكىزۋدى باستاعان.

اۆتوموبيل جولدارى جانە جولاۋشىلار كولىگى باسقارماسىنىڭ باسشىسى مالىمبەت يبراشەۆتىڭ سوزىنشە، كانادالىق كومپانيا ءونىمىن قازاقستان تەرريتورياسىندا ساتۋعا رۇقسات الىپ، ساراپتاما جۇمىسى ماقۇلدانسا، اقتوبە جولدارىن جوندەۋمەن اينالىسۋى مۇمكىن. شەتەلدىك كومپانيا باسشىسى يۋري تاراسوۆ كاسىپورىننىڭ جۇمىسىن تانىستىردى.

كوپتەگەن ەلدەردە جوندەۋ جۇمىستارىن جۇرگىزگەنىن اتاپ ءوتتى. بيۋدجەت قارجىسىن ۇنەمدەۋگە ۋادە بەرگەن كومپانيا جول جوندەۋدە قيىرشىق تاستى پايدالانبايدى. بۇل ءتاسىل شالعاي اۋىلدارعا تاس جەتكىزۋ، جوندەۋ جۇمىستارىن جەڭىلدەتپەك. ماسەلەن، ءبىر شاقىرىم جولدى جوندەۋگە ادەتتە 40 ميلليون تەڭگە جۇمسالسا، كانادالىق كاسىپورىننىڭ ءتاسىلىن قولدانعان جاعدايدا 28 ميلليون تەڭگە جاراتىلادى.

ايتا كەتەيىك، وبلىستا جەرگىلىكتى ماڭىزى بار اۆتوموبيل جولدارىنىڭ ۇزىندىعى 5 مىڭ كم قۇرايدى. ونىڭ ىشىندە تەك 2,6 مىڭ شاقىرىمى نەمەسە %53 جاقسى جانە قاناعاتتانارلىق جاعدايدا.



اۆتور: التىناي ساعىندىقوۆا


باستى سوزدەر: ايماق,
:ءبولىسۋ
پئكئر قالدئرؤ
+7
جئبةرؤ
ونلاين قىزمەتكەرلەر
رەداكتور
ريزابەك نۇسىپبەك
ريزابەك نۇسىپبەك
954-049
رەداكتور
بەيسەن سۇلتان
بەيسەن سۇلتان
954-049
رەداكتور
كۇنسۇلتان وتارباي
كۇنسۇلتان وتارباي
954-049

مۇراعات