دەنساۋلىق ساقتاۋ ءمينيسترى ەشكىمنەن جاسىرىنىپ جۇرگەن جوق - داۋرەن ابايەۆ
«دەنساۋلىق ساقتاۋ سالاسىنا قاتىستى سوڭعى قايعىلى جاعداي - ءارتۇرلى، ءبىر-بىرىمەن بايلانىسى جوق وقيعالار (اتىراۋداعى ءسابي ءولىمى، الماتىداعى دارىگەرلەردىڭ تۇتقىندالۋى مەن جاس دارىگەرلەردىڭ ۆيدەوۇندەۋى). ءار جاعداي بويىنشا جەكە جۇمىس جۇرگىزۋ كەرەك. مەنىڭ ويىمشا، وسى رەتتە مەنىڭ ارىپتەسىم ەلجان ءبىرتانوۆ قاستىق ويلاعاندار ءۇشىن قولايلى نىساناعا اينالعان سەكىلدى. ەشتەڭە بىتىرمەگەن ادامدى عانا ەشكىم سىنامايدى. ال دەنساۋلىق ساقتاۋ مينيسترلىگى سوڭعى جىلدارى قىرۋار جۇمىس جۇرگىزدى. سالادا جۇيەلى وزگەرىستەر بولىپ جاتىر. مۇنداي جاعدايدا اشىقتىق پەن ساپانى باقىلاۋ ىسىنە پايدا تاپپايتىن كوڭىلى تولمايتىندار قاشان دا تابىلادى»، - دەدى داۋرەن ابايەۆ «اشىق ديالوگ» باعدارلاماسىندا.
مينيستر اتالمىش ۆيدەونى كورگەنىن ايتتى.
«مينيسترلىكتىڭ مالىمدەمەسىنە الىپ-قوسارىم جوق. ەرەجە مەن زاڭ بار. وعان باعىنۋ كەرەك. مەملەكەت بولاشاق دارىگەرلەر ءۇشىن قاراجات ءبولدى. ال ولار وقۋ بىتكەننەن كەيىن بىردەن جىبەرگەن جۇمىستا ىستەۋگە مىندەتتەلدى. ولاردىڭ ءبارى دە ءتيىستى قۇجاتقا قول قويعان. بۇل مامانداردىڭ ءبارىن كادرلار دەفيتسيتى انىق سەزىلەتىن اۋىلدار، اۋدان ورتالىقتارى، اۋرۋحانالار كۇتىپ تۇر. اينالىپ كەلگەندە بۇل - اۋقىمدى تاجىريبە. ەشقانداي رەزيدەنتۋرا اتالعان مىندەتتەمەلەردەن باس تارتۋ جولىنا اينالا المايدى. بۇل - كەلىسىمنىڭ بۇزىلۋى»، - دەدى ول.
داۋرەن ابايەۆ بۇل جەردە ماسەلە مينيستردە ەمەس ەكەنىن اتاپ ءوتتى.
«بۇل جەردە ماسەلە مينيستردە ەمەس. ولار كىمدى بولسىن ورنىنان كەتىرۋدى تالاپ ەتە الادى. الايدا كەلىسىمگە قول قويدىڭ با، مىندەتتەمەگە ساي جۇمىس ىستەۋگە تۋرا كەلەدى. جالپى، بۇل ماسەلەگە قاتىستى دەنساۋلىق ساقتاۋ ءمينيسترى ەشكىمنەن جاسىرىنىپ جۇرگەن جوق. سىناعانداردىڭ بارىمەن كەزدەسىپ ءجۇر. ديالوگقا دايىن ەكەنىن ءاردايىم مالىمدەيدى»، - دەدى داۋرەن ابايەۆ.
اۆتور: ايان بەكەن ۇلى