ەلوردانىڭ تاجىريبەسىن باسقا قالالار دا پايدالانا الادى - مينيستر
«حابار» ارناسىنداعى «اشىق ديالوگ» باعدارلاماسىندا مينيسترگە «ەلورداعا ەرەكشە ماڭىز بەرىلىپ كەتكەن جوق پا؟ باسقا دا قالالار بار ەمەس پە؟» دەگەن سۇراق قويىلدى.
«ەلباسىنىڭ ءوزى دە ەلوردانىڭ دامۋىنا ەرەكشە ءمان بەرىپ وتىر. استانا - ءبىزدىڭ قالا قۇرىلىسىن جۇرگىزۋدەگى درايۆەرىمىز. بۇل - مودەلدى قالا. ونىڭ بۇكىل ينفراقۇرىلىمى ءبىز تاۋەلسىزدىك العان ۋاقىتتا سالىنعان. سول سەبەپتى ونىڭ كەلبەتىنە قاتىستى پرەزيدەنتتىڭ ەسكەرتۋى، تاپسىرماسى مەن سىنىن بارلىق ايماقتاردىڭ اكىمى ەسكەرۋى كەرەك. بۇل - ينۆەستيتسيا تارتۋ، تۇتىنۋشىلىق باعانىڭ ءوسىمى، قالا شەتىن، قىلمىسپەن كۇرەستى كۇشەيتۋگە قاتىستى ماسەلەلەر»، - دەدى داۋرەن ابايەۆ «اشىق ديالوگ» باعدارلاماسىندا.
مينيستر استانادا جالپى رەسپۋبليكالىق دەڭگەيدەگى ءىرى ينفراقۇرىلىمدىق جوبالار جۇزەگە اسىرىلىپ جاتقانىن ەسكە سالدى.
«وسى ينفراقۇرىلىمنىڭ تابىستىلىعىنا قاراي ونى كەڭ تاراتۋ مۇمكىندىگى ارتا تۇسەدى. ياعني، بۇل تاجىريبەنى باسقا وڭىرلەرگە دە قولدانۋعا بولادى. قاراپايىم مىسالداردى كەلتىرەيىن: «سمارت- سيتي» ەلەمەنتتەرىن ەنگىزۋ، ينتەللەكتۋالدىق كولىك جۇيەسىن دامىتۋ، بەينەباقىلاۋ جۇرگىزۋ. بۇنى ەسكەرسەك، وسىنداي وتىرىستاردىڭ ماڭىزى ارتا تۇسەدى. وتىرىستا ايتىلعان اشىق اڭگىمە قالا بيلىگىنە ايقىن باعىت بەرەدى»، - دەدى ول.
ەسكە سالا كەتسەك، وسى اپتادا قازاقستان پرەزيدەنتى قاسىم-جومارت توقايەۆ ەلوردانى ودان ارى دامىتۋ ماسەلەلەرى جونىندەگى ءماجىلىس وتكىزىپ، قالانىڭ ءبىرقاتار پروبلەماسىنا توقتالىپ، ولاردى شەشۋگە باعىتتالعان ناقتى تاپسىرمالار بەرگەن ەدى.
اۆتور: ايان بەكەن ۇلى